சென்னை: பள்ளிக் கல்வித்துறையால் நடத்தப்படும் மாதிரிப் பள்ளிகளில் படிக்கும் மாணவர்களுக்கு தேசிய அளவிலான நுழைவுத்தேர்வுகளை எதிர்கொள்வதற்கான பயிற்சி கடந்த 2 ஆண்டுகளாக வழங்கப்பட்டு வருகிறது. கடந்த ஆட்சிக் காலத்தில் மாணவர்களுக்கு 2018ஆம் ஆண்டு முதல் நீட் தேர்வினை எதிர்கொள்வதற்கான பயிற்சிகளும் அளிக்கப்பட்டது.
அதில் மாணவர்கள் அதிகளவில் தேர்ச்சி பெறாமல் இருந்ததால், அரசுப் பள்ளி மாணவர்களுக்கு மருத்துவப்படிப்பில் 7.5 சதவீதம் உள் ஒதுக்கீடு வழங்கப்பட்டன. அரசுப் பள்ளியில் படித்த மாணவர்கள் தனியார் கல்லூரியில் கட்டணத்தை செலுத்த முடியாத நிலையை கருத்தில் கொண்டு அவர்களுக்கான கட்டணத்தை அரசே செலுத்தியது.
அதனைத் தொடர்ந்து திமுக ஆட்சிக்கு வந்தப் பின்னர் 2022ஆம் ஆண்டு முதல் தொழில்கல்வி படிப்பிலும் அரசுப் பள்ளி மாணவர்களுக்கு 7.5 சதவீதம் இட ஒதுக்கீடு அளிக்கப்பட்டன. அவர்களுக்கான கட்டணத்தையும் அரசே செலுத்தி வருகிறது. இந்த நிலையில் நன்றாக படிக்கும் மாணவர்களை பல்வேறுப் போட்டித்தேர்வின் அடிப்படையில் தேர்வுச் செய்தப் பின்னர், மாதிரிப் பள்ளிகளில் சேர்த்து பயிற்சி அளிக்கின்றனர்.
இவர்களுக்கு இந்தியாவின் முன்னணி கல்வி நிறுவனங்களில் சேர்வதற்கான போட்டித் தேர்வுகளை எதிர்கொள்வதற்கான பயிற்சிகளும் அளிக்கப்பட்டது. அதில் 250 மாணவர்கள், தேர்ச்சி பெற்று முன்னணி கல்வி நிறுவனங்களில் சேர்ந்துள்ளனர். இவர்களை பாராட்டி சான்றிதழ்களையும், பரிசுகளையும் முதலமைச்சர் மு.க.ஸ்டாலின் வழங்கினார்.
மேலும் அரசு மாதிரி பள்ளிகளில் பயின்று ஐஐடி (IIT), ஐஏஎஸ்சி (IASC), ஐஐஐடி (IIIT), தேசிய சட்டப் பள்ளி உள்ளிட்ட நாட்டின் முதன்மை உயர்கல்வி நிலையங்களில் சேர்ந்த அரசு பள்ளி மாணவர்களுக்கான பாராட்டு விழா கடந்த 9ஆம் தேதி நடைபெற்றது. இதில் பங்கேற்ற மாணவர்கள் பலர் 8ஆம் வகுப்பு, 9ஆம் வகுப்பு , 10ஆம் வகுப்பு வரை தனியார் பள்ளிகளில் பயின்று, 11 மற்றும் 12ம் வகுப்பினை அரசு மாதிரி பள்ளிகளில் பயின்று தற்போது நாட்டின் முதன்மை உயர்கல்வி நிலையங்களில் சேர்ந்துள்ளனர்.
இவர்களுக்கான கட்டணங்களையும் அரசே ஏற்றுக் கொண்டுள்ளதாக மாணவர்கள் தெரிவித்துள்ளனர். அந்த வகையில், கடந்த ஆண்டு ஆகஸ்ட் மாதம் நாட்டின் முதன்மை உயர்கல்வி நிலையங்களில் சேரும் 6 முதல் 12 ஆம் வகுப்பு வரை அரசு பள்ளிகளில் பயின்ற மாணவர்களுக்கான கட்டணத்தை அரசே ஏற்கும் என்ற அரசாணையில் தற்போது தளர்வு கொண்டுவரப்பட்டுள்ளது தெரியவந்துள்ளது.
எனினும் அரசின் இந்த நடவடிக்கை முரண்பாடாக அமைந்திருப்பதாக கல்வியாளர்கள் குற்றம் சாட்டியுள்ளனர். மருத்துவம், பொறியியல் உள்ளிட்ட பல்வேறு உயர்கல்வி படிப்புகளில் 7.5 விழுக்காடு இட ஒதுக்கீட்டின் கீழ் சேரும் அரசு பள்ளி மாணவர்கள், 6 முதல் 12 ஆம் வகுப்பு வரை கண்டிப்பாக அரசு பள்ளிகளில் படித்திருக்க வேண்டும் என்று தெரிவிக்கப்பட்டுள்ளது.
அதன்படி இதற்கான சான்றிதழை அந்தந்த அரசு பள்ளி தலைமை ஆசிரியர்களிடம் பெற்று வர வேண்டும் என்றும் தெரிவிக்கப்பட்டு இருந்தது. ஆனால் அரசு மாதிரி பள்ளிகளில் மட்டும் இப்படி வேறு மாதிரியான நடைமுறையை எடுத்து இருக்கிறதா என்ற கேள்விகளை முன் வைக்கின்றனர் கல்வியாளர்கள்.
மேலும் அரசு இந்த விவகாரத்தில் தெளிவான முடிவை எடுக்காத பட்சத்தில், பத்தாம் வகுப்பு வரை தனியார் பள்ளிகளை படித்து, 11 மற்றும் 12 ஆம் வகுப்புகளை மட்டும் அரசு மாதிரி பள்ளிகளில் படித்து உயர்கல்வி படிப்பினை இலவசமாக படிக்கக்கூடிய நிலை, வரும் ஆண்டுகளில் அதிகரிக்கும் என்ற கருத்துக்களையும் கல்வியாளர்கள் முன்வைக்கின்றனர்.
இதையும் படிங்க: நெல்லை பள்ளி மாணவர் மீது சாதி வெறி தாக்குதல்; ஜி.வி.பிரகாஷ், மாரி செல்வராஜ் கண்டனம்!
