சென்னை: கரோனா பரவல் காரணமாக, இரண்டு ஆண்டுகள் நேரடி வகுப்புகள் நடைபெறாத நிலையில் கடந்த ஆண்டு செப்டம்பர் மாதம் 10, 12ஆம் வகுப்புகளுக்குப் பள்ளிகள் தொடங்கப்பட்டன. அதனைத்தொடர்ந்து கரோனா 3ஆவது அலையின் காரணமாக ஜனவரி மாதத்தில் பள்ளிகள் மீண்டும் மூடப்பட்டன.
அதன்பின் மார்ச் மாதம் 1முதல் 12ஆம் வகுப்பு வரை அனைவருக்கும் பள்ளிகள் திறக்கப்பட்டன. தொடர்ந்து தற்போது நேரடி வகுப்புகள் நடைபெற்றுவருகின்றன. பொதுத்தேர்வினை எழுதாமல் நேரடியாக 11,12ஆம் வகுப்பிற்கு வந்துள்ள மாணவர்களின் நலனைக்கருத்தில் கொண்டு, மாணவர்கள் பயமின்றி தேர்வை எதிர்கொள்ள 10,12ஆம் வகுப்பு மாணவர்களுக்கு திருப்புதல் தேர்வுகளை பள்ளிக்கல்வித்துறை அறிவித்தது. அதன்படி இரண்டு திருப்புதல் தேர்வுகள் நடத்தி முடிக்கப்பட்டுள்ளன. அதில் நடத்தி முடிக்கப்பட்ட அலகுகளில் இருந்து மட்டுமே கேள்விகள் கேட்கப்பட்டன.
இதனை அடிப்படையாகக் கொண்டு 10,12ஆம் வகுப்பு பொதுத்தேர்வில் நடத்தி முடிக்கப்பட்ட பாடங்களிலிருந்து மட்டுமே கேள்விகள் கேட்கப்பட வேண்டும் என மாணவர்கள் மற்றும் ஆசிரியர்கள் கோரிக்கை வைத்தனர்.
கரோனா தொற்றால் நடப்பாண்டில் நேரடி வகுப்புகள் தொடங்குவதற்கு காலதாமதம் ஆனதால், பாடத்திட்டங்கள் குறைக்கப்பட்டு அறிவிக்கப்பட்டது. 10,12ஆம் வகுப்பு மாணவர்களுக்கு 30 விழுக்காடு பாடங்கள் குறைக்கப்பட்டு 70 விழுக்காடுப்பகுதிகள் மட்டுமே நடத்தப்பட்டன.
இந்த நிலையில் பள்ளிகளில் மாணவர்களுக்கு குறைக்கப்பட்ட பாடத்திட்டங்களில் இருந்தே பொதுத்தேர்வு நடத்தப்படும் என்றும்; குறைக்கப்பட்ட பாடத்திட்டங்களில் இருந்தே வினாத்தாள்கள் தயார் செய்யப்படும் என்றும் கூறப்பட்டுள்ளது.
மேலும் குறைக்கப்பட்ட பாடத்திட்டத்தை விரைந்து நடத்தி முடிக்க வேண்டும் எனவும் அறிவுறுத்தப்பட்டுள்ளது.
இதையும் படிங்க: ஊர் கெத்தை காட்டுவதில் போட்டி - பேராசிரியர்கள் எதிரே மாணவர்கள் மோதல்
