சென்னையில் முழுவதும் பொருத்தப்பட்டுள்ள சிசிடிவி கேமராக்களில் உள்ள தொழில்நுட்ப குறைபாடுகளை நீக்கும் வகையில் "சைபர் ஹேக்கத்தான்" என்ற போட்டியை நடத்த திட்டமிட்டு, அதில் வெற்றி பெறும் அணியினருக்கு 1 லட்சம் ரூபாய் ரொக்கப் பரிசு மற்றும் சான்றிதழ் வழங்கப்படும் என்று சென்னை காவல்துறை அறிவித்தது. இந்த போட்டியில் சிசிடிவி கேமராக்களில் பதிவாகும் வாகனங்களின் பதிவு எண்களை மங்கலாக இல்லாமல் தெளிவாக காட்டும் வகையிலும், பதிவாகும் குற்றவாளிகளின் முகங்களை தெளிவுபடுத்தி காட்டும் வகையிலும், இரவு நேரங்களில் அதிக வெளிச்சத்துடன் வரும் வாகனங்களின் பதிவு எண்களை தெளிவாக காட்டும் வகையிலும் என்று மொத்தம் 8 தலைப்புகளின் கீழ் 3 பேர் கொண்ட குழுவாக பங்கேற்க அறிவுறுத்தப்பட்டது.சென்னை காவல்துறை ஆணையர் அலுவலகத்தில் டிசம்பர் 3 மற்றும் 10ஆம் தேதிகளில் இரண்டு கட்டங்களாக சைபர் ஹேக்கத்தான் போட்டி நடைபெற்றது.
இந்த போட்டிக்கு விண்ணப்பிக்க நவம்பர் 30ஆம் வரை கால அவகாசம் விதிக்கப்பட்ட நிலையில் சைபர் வல்லுனர்கள் மற்றும் கல்லூரி மாணவர்கள் ஏராளமானோர் இப்போட்டியில் பங்கேற்று தங்கள் திறமைகளை வெளிப்படுத்தினர். இந்நிலையில் போட்டியில் வெற்றி பெற்ற குழுவினருக்கு ரொக்கப் பரிசு மற்றும் சான்றிதழ் வழங்கும் நிகழ்ச்சி கிண்டியில் உள்ள அண்ணா பல்கலைகழகத்தில் நேற்று (டிசம்பர் 26) நடைபெற்றது. இந்நிகழ்ச்சியில் சென்னை காவல் ஆணையர் சங்கர் ஜிவால் பங்கேற்று போட்டியில் முதல் மூன்று இடங்களைப் பிடித்த குழுவினருக்கு ரொக்கப்பரிசு மற்றும் சான்றிதழ்களை வழங்கினார்.
இந்த நிகழ்ச்சிக்குப் பின் செய்தியாளர்களை சந்தித்த அவர், சைபர் குற்றங்களுக்கும் குற்றவாளிகளுக்கும் எல்லைகள் இல்லை. உலகின் எந்த மூலையில் இருந்தும் எங்கு வேண்டுமானாலும் குற்றச் செயலில் ஈடுபட முடியும். சென்னையில் சைபர் குற்றங்களை விசாரிக்க 5 காவல் நிலையங்கள் உருவாக்கப்பட்டுள்ளன. இன்னும் சில ஆண்டுகளில் தானியங்கி முறையில் போக்குவரத்தை கட்டுப்படுத்தும் திட்டம் கொண்டுவரப்படவுள்ளது. பல்வேறு இடங்களில் சென்சார் முறையில் இயக்கப்பட்டு வந்த தானியங்கி முறையிலான போக்குவரத்து கட்டுப்பாட்டை சென்னையில் சிசிடிவியை பயன்படுத்தி உருவாக்க திட்டமிட்டு வருகிறோம்.
பொதுமக்களை அச்சுறுத்தும் வகையில் வாகனங்களை ஓட்டுவோரின் வாகனங்கள் பறிமுதல் செய்யப்பட்டு வருகிறது. புத்தாண்டு அன்று சாலை விதிமீறல்களில் ஈடுபடும் இளைஞர்கள் மற்றும் மாணவர்கள் மீது கடும் நடவடிக்கை எடுக்கப்படும். வாகனங்கள் ஓட்டி வருபவர்கள் 18 வயதிற்கு கீழ் உள்ளவர்கள் என்றால் அவர்களின் பெற்றோர் மீது வழக்குப்பதிவு செய்யப்படும். புத்தாண்டை முன்னிட்டு சென்னையில் கேளிக்கை கொண்டாட்டங்கள் நடத்த திட்டமிட்டுள்ள நட்சத்திர விடுதி உரிமையாளர்களுடன் வரும் 29ஆம் தேதி ஆலோசனை கூட்டம் நடத்தி, கரோனா வழிகாட்டு நெறிமுறைகள் குறித்து ஆலோசனை வழங்க உள்ளோம் எனத் தெரிவித்தார்.
இதையும் படிங்க: கூரியர் கடையில் மிக்சி வெடிப்பு.. கர்நாடகாவில் மீண்டும் பதற்றம்..
