கதை சொல்லும் பாரம்பரியம் கொண்ட இந்திய நாட்டில், நம் பாரம்பரிய கதைகளை தொடர்ந்து சொல்லி வரும்சென்னை மாங்காடுவை சேர்ந்த ஸ்ரீவித்யாவை நேற்று(செப் 27) பிரதமர் மோடி மன் கி பாத் நிகழ்ச்சியில் பாராட்டினார்.
ஒவ்வொரு மாதத்தின் கடைசி ஞாயிற்றுக்கிழமையன்றும் பிரதமர் நரேந்திர மோடி அகில இந்திய வானொலி வாயிலாக மனதின் குரல் (மன் கி பாத்) என்ற நிகழ்ச்சியில் பேசுவது வழக்கம். அதேபோல் நேற்று(செப் 27) தனது 69-ஆவது மன் கி பாத் வானொலி நிகழ்ச்சியில் நாட்டு மக்களிடம் காலை 11 மணி அளவில் உரையாற்றினார்.
அப்போது பேசியவர், "கதை சொல்லும் பாரம்பரியம் கொண்ட இந்திய நாட்டில், நம் பாரம்பரிய கதைகளைக் கூறி அதனை அதிகளவில் பொக்கிஷம் போல் பாதுகாத்து அடுத்த தலைமுறையினருக்கு கடத்தி வருவதில் கிராமப்புற மக்களுக்கு ஒரு பெரும் பங்குண்டு. ஒவ்வொரு வீட்டிலும் குழந்தைகளுக்கு கதை சொல்லும் பழக்கத்தை பெற்றோர் பழக வேண்டும்.
குடும்பத்தில் உள்ள ஒவ்வொருவரும் வாரம் ஒரு நபர் வீதம் குடும்ப உறுப்பினர்களுக்கு கதைகள் சொல்லி மகிழலாம். கரோனா தொற்று குடும்பங்களை ஒன்றாக இணைத்துள்ளது. நமது கிராமங்களின் கதைகளை குழந்தைகளுக்கு சொல்லித்தர வேண்டும்.
அதிலும் குறிப்பாக, தமிழ்நாட்டில் இசையுடன் கலந்து புராணம் உள்ளிட்ட கதைகள் வாயிலாக பாடப்படும் வில்லுப்பாட்டு மிகவும் பிரபலமானது. தமிழ்நாட்டைச் சேர்ந்த வித்யா என்பவர் வில்லுப்பாட்டை புராண கதைகள் மூலம் கூறுவது வரவேற்கத்தக்கது" என்றார்.
சென்னை மாங்காடுவை சேர்ந்த ஸ்ரீவித்யா(35) என்பவர் 2016 ஆம் ஆண்டிலிருந்து கதை சொல்லியாக தொடங்கி புராண கதைகளயும், நமது நாட்டு கலாசாரம் பண்பாடுகளையும், கலைகளையும் கதைகளாக சிறுவர்கள் முதல் பெரியவர்கள் வரை சொல்லி வருகிறார்.
இதுதொடர்பாக சென்னை மாங்காடுவை சேர்ந்த ஸ்ரீவித்யா ஈடிவி பாரத்திற்க்கு அளித்த பிரத்யேக பேட்டியில்,
”2016ஆம் ஆண்டில் இருந்து எனது பயணம் ஒரு கதை சொல்லியாக தொடங்கியது. இதுவே தற்போது என் தொழிலாக உள்ளது. குழந்தைகள், பெரியோர்கள், வயதானவர்கள் என பல்லாயிரக்கணக்கானவர்களுக்கு நமது நாட்டின் பாரம்பரிய, பிற கதைகளை கூறியிருக்கிறேன்.
அதிகப்படியான தாய்மார்களுக்கு கதை சொல்லிக் கொடுத்துள்ளேன், அவர்கள் அவர்களின் வீட்டில் இருக்கும் குழந்தைகளுக்கு சொல்லிக் கொடுக்க ஏற்றவாறு கதைகளை சொல்லிக் கொடுத்துள்ளேன்.
நமது நாட்டின் கலாசாரம், பண்பாடு சார்ந்த கதைகளை சிறுவர்களிடம் கூறும்போது, அதைப்பற்றி அவர்களால் எளிதில் உணர முடியும். நாம் இத்தகைய விஷயங்களை கதை மூலமாக சொல்வதால் அவர்கள் அதிகம் விரும்பி கேட்டு அதைப் பற்றி சிந்திப்பார்கள்.
கதை சொல்லும்போது கதைக்கேற்ப பாவனைகளை காட்டி கூறுவதால் சிறுவர்களின் கவனம் முழுவதும் கதைகளிலே யேஇருக்கும். இதன்மூலம் சிறுவர்களின் கற்பனை திறன்களும், சிந்தனைக்கும், அறிவு திறனையும் வளர்க்க முடியும். மேலும், நமது நாட்டின் கலைகளையும், பண்பாடுகளையும், கலாசாரங்களையும், புராணங்களையும் பற்றி கதைகள் மூலமாக மற்றவர்களுக்கு உணர்த்தி வருகிறேன்.
சென்றாண்டு அமெரிக்காவிற்குச் சென்று அங்கு இருப்பவர்களுக்கு நமது நாட்டு கலாசாரம், பண்பாடுகளை பற்றிய கதைகளை கூறினேன். அங்கு இருப்பவர்களுக்கு நமது நாட்டின் கதைகளைக் கேட்டு மிகவும் பிடித்து போய்விட்டது. அவர்கள் நமது நாட்டின் கலாசார பண்பாடுகளை அறிந்து கொள்ள மிகவும் விரும்பப்பட்டனர்.
மேலும் சமூக வலைதளங்களில் நமது நாட்டின் கலாசாரம், பண்பாடு பற்றிய கதைகளை தொடர்ந்து கூறி வருகிறேன். தமிழ், ஆங்கிலம், இந்தி உள்ளிட்ட மொழிகளில் கதைகளை சொல்லி வருகிறேன்.
கடந்த நான்கைந்து வருடங்களாக நான் கதை சொல்லியாக இருந்து வருகிறேன். இந்நிலையில் நேற்று (செப் 27) காலை நமது நாட்டின் பிரதமர் நரேந்திர மோடி இந்திய கலாசார, பண்பாடுகளை பற்றி கதை சொல்பவர்களைப் பற்றி பேசினார். அப்போது சென்னையை சேர்ந்த என் பெயரை அவர் குறிப்பிட்டபோது மிகவும் பெருமையாகவும், மகிழ்ச்சியாகவும் இருந்தது.
நமது நாட்டுப் பண்பாடு, கலாசாரங்களையும், கலைகளையும் கதை மூலமாக உலகம் முழுவதும் தெரிவிக்க வேண்டும் என்பதே எனது விருப்பம்” என்றார்.
இதையும் படிங்க: விவசாயிகளின் எதிர்ப்புகளை மீறி வேளாண் மசோதாக்களுக்கு ஒப்புதல்!
