தமிழ்நாடு சட்டப்பேரவைத் தேர்தலை முன்னிட்டு, பொதுமக்கள் தங்கள் சொந்த ஊர்களுக்கு சென்று வாக்களிக்க ஏதுவாக தமிழ்நாடு அரசுப் போக்குவரத்துக் கழகம் சார்பில், சிறப்பு பேருந்துகள் இயக்கம், பாதுகாப்பு ஏற்பாடுகள் குறித்த ஆலோசனைக் கூட்டம் போக்குவரத்துத்துறை செயலாளர் சி.சமயமூர்த்தி தலைமையில் இன்று (மார்ச் 23) தலைமைச் செயலகத்தில் காணொலி காட்சி வாயிலாக நடைபெற்றது.
இதில், காவல்துறை உயர் அலுவலர்கள், துறை அலுவலர்கள், போக்குவரத்துக் கழக மேலாண் இயக்குநர்கள் கலந்து கொண்டனர்.
வரும் சட்டப்பேரவைத் தேர்தலை முன்னிட்டு, 01.04.2021 முதல் 05.04.2021 வரையிலான நாட்களுக்கு சென்னையிலிருந்து தினசரி இயக்கக்கூடிய 2,225 பேருந்துகளுடன், சிறப்புப் பேருந்துகளாக 3,090 பேருந்துகள் என ஆகமொத்தம் 14,215 பேருந்துகள் சென்னையிலிருந்து இயக்கப்படும்.
கோயம்புத்தூர், திருப்பூர், சேலம், பெங்களூரு ஆகிய இடங்களிலிருந்து பல்வேறு பகுதிகளுக்கு 2, 644 சிறப்பு பேருந்துகள் இயக்கப்படுகின்றன. இதில், 01.04.2021 முதல் 03.04.2021 வரையில் நாள்தோறும் இயக்கப்படும் பேருந்துகள், மற்றும் சிறப்பு பேருந்துகள் கோயம்பேடு எம்.ஜி.ஆர். பேருந்து நிலையத்திலிருந்து இயக்கப்படும்.
விடுமுறை நாளான ஞாயிறு (04.04.2021) மற்றும் திங்கட்கிழமை (05.04,20211) ஆகிய இரு நாட்களுக்கு மட்டும் பேருந்துகள் பொங்கல், தீபாவளி நாட்களில் இயக்கப்பட்டது போல் கே.கே.நகர், பூந்தமல்லி, தாம்பரம், தாம்பரம் சானிடோரியம், கோயம்பேடு உள்ளிட்ட ஐந்து தற்காலிக பேருந்து நிலையங்களில் இருந்து இயக்கப்படும்.
தேர்தல் முடிந்து பிற நகரங்களில் இருந்து சென்னைக்கு 06.04.2021 முதல் 07.042021 வரை தினசரி இயக்கப்படுகின்ற 2,225 பேருந்துகளுடன் 2,115 சிறப்பு பேருந்துகள் இயக்கப்படும்.
சேலம், மதுரை, திருச்சி, தேனி ஆகிய இடங்களிலிருந்து திருப்பூர் மற்றும் கோயம்புத்தூருக்கும் சேலம், திருண்ணாமலை, வேலூர் ஆகிய இடங்களிலிருந்து பெங்களூருக்கும் என மொத்தம் 1,738 சிறப்பு பேருந்துகள் இயக்கப்படும்.
சிறப்புப் பேருந்துகள் அனைத்தும் தமிழக அரசு விதித்துள்ள நோய் தடுப்பு வழிக்காட்டு நெறிமுறைகளை பின்பற்றி இயக்கப்படும். பயணிகள் கூட்ட நெரிசலை தவிர்க்கும் வகையில் இணையதளம் மூலமாகவும், கோயம்பேடு பேருந்து நிலையத்தில் அமைக்கப்பட்டுள்ள முன்பதிவு மையங்கள் மூலமும், முன்பதிவு செய்து கொள்ளலாம் என தெரிவிக்கப்பட்டுள்ளது.
