தமிழ்நாடு சட்டப்பேரவையில் நேரமில்லா நேரத்தின்போது பேசிய கூட்டுறவுத்துறை அமைச்சர் செல்லூர் ராஜூ, ‘மறைந்த முதலமைச்சர் பெயரை எதிர்க்கட்சித் தலைவர் அடிக்கடி சொல்கிறார், இது தவறு, இதை சபாநாயகர் தடுக்க வேண்டும், இல்லையெனில், நாங்களும் அவர்களின் தலைவர் பெயரைச் சொல்லி பேசுவோம்’ என கூறினார்.
அப்போது குறிப்பிட்ட ஸ்டாலின், ‘நான் பெரும்பாலும், மறைந்த அம்மையார் பெயரை குறிப்பிடுவதை தவிர்க்கிறேன். தவிர்க்க முடியாத சில தருணங்களில் பெயரைக் குறிப்பிட்டிருக்கிறேன். அதில் தவறு ஒன்றும் இல்லை. நீங்களும், கலைஞர் பெயரை குறிப்பிட்டிருக்கிறீர்கள். அவையில் அது பதிவும் ஆகியிருக்கிறது. இதை ஒரு குற்றச்சாட்டாக அமைச்சர் கூறுவது சரியல்ல’ என்றார்.
இதையடுத்து பேசிய சபாநாயகர் தனபால், ‘மறைந்த தலைவர்கள், முதலமைச்சர்கள் பெயரைக் குறிப்பிடுவது சரியாக இருக்காது. யாருடைய பெயரையுமே குறிப்பிட வேண்டாம். அவ்வாறு குறிப்பிடும் போது மரியாதையுடன் குறிப்பிட வேண்டும்’ என உறுப்பினர்களுக்கு அறிவுறுத்தினார்.
