திருவண்ணாமலை மாவட்டம் ஆரணியை அடுத்த காமக்கூர் கிராமத்தைச் சேர்ந்தவர் அண்ணாமலை, இவரது தம்பி தியாகராஜன். இவர்களது குடும்பத்துக்கு சொந்தமான 16 ஏக்கர் விவசாய நிலம் உள்ளது. இந்த நிலத்தின் உரிமை தியாகராஜனின் மகள் சாமுண்டீஸ்வரி பெயரில் உள்ளதாக கூறப்படுகிறது. பின்னர் முறையாக பாகப்பிரிவினை செய்து கொண்டுள்ளதாகவும் கூறப்படுகிறது. இதில் சுமார் ஒன்றே முக்கால் ஏக்கர் நிலம் தொடர்பான பிரச்னை சாமுண்டீஸ்வரிக்கும், அண்ணாமலை மகள் சாவித்திரிக்கும் இடையே இருந்து வந்ததுள்ளது.
இது தொடர்பாக ஆரணி சார்பு நீதிமன்றத்தில் 2014 ஆம் ஆண்டு முதல் வழக்கு நடந்து வருகிறது. நீதிமன்றத்தில் வழக்கு நடந்து வருவதால் தனது பாத்தியத்தில் உள்ள நிலத்துடன், பிரச்னைக்குரிய நிலத்திலும் சாவித்திரி விவசாயம் செய்து வந்துள்ளார். இந்நிலையில் சொத்தின் உரிமை தன்னிடம் இருப்பதாகக் கூறி சாமுண்டீஸ்வரி ஆரணி களம்பூர் காவல் துறையில் புகார் அளித்துள்ளார். ஆனால், சாவித்திரியின் உறவினர்கள் காவல்துறையில் பணி செய்து வருவதால் அவர்களின் உதவியுடன் சாமுண்டீஸ்வரின் புகார் மீது நடவடிக்கை எடுக்கப்படாமல் இருந்து வந்துள்ளது.
இதனால் சாமுண்டீஸ்வரி வேலூர் சரக காவல் ஆணையர் வனிதாவிடம் தனது புகார் மீது நடவடிக்கை எடுக்கவில்லை என மேல்முறையீட்டு புகார் அளித்துள்ளார். அதன்படி, இந்த விவகாரத்தில் உரிய நடவடிக்கை எடுக்கும்படி களம்பூர் காவல் துறையினருக்கு வனிதா உத்தரவிட்டார்.
அதன்பேரில் களம்பூர் காவல் துறையினர் காமக்கூர் சென்று சாவித்திரி, சாமுண்டீஸ்வரி தரப்பிடம் பேச்சுவார்த்தை நடத்தியுள்ளனர். அப்போது நீதிமன்றத்தில் தீர்ப்பு வரும் வரை பிரச்னைக்குரிய நிலத்தில் இருவருமே வரக்கூடாது என்று அறிவுறுத்தியுள்ளனர். மேலும் நிலத்தை சமன்படுத்தவும் முயன்றுள்ளனர். அப்போது சாவித்திரி தரப்பும், காமக்கூர் கிராம மக்களும் சேர்ந்து பயிரிட்டு அறுவடைக்கு தயாராக உள்ள பயிர்களை நாசம் செய்யக்கூடாது என்று கூறி தடுத்துள்ளனர்.
இதுபற்றி காவல் துணை கண்காணிப்பாளர் ஜெரீனாபேகத்துக்கு களம்பூர் காவல் துறையினர் தகவல் தெரிவித்தனர். அதன் பேரில் அங்கு சென்ற ஜெரீனாபேகம் பிரச்னைக்குரிய நிலத்தில் பயிரிட்டிருந்த நெற்பயிரை டிராக்டர் வைத்து சமன் செய்ய உத்தரவிட்டு, தனது காரை சாலையில் நிறுத்தி பாதுகாப்பாக நின்று கொண்டிருந்துள்ளார்.
அப்போது சாவித்திரி, காவல் துணை கண்காணிப்பாளர் ஜெரீனாபேகத்திடம், அதிகாரியாக இருந்து கொண்டு ஒருதலைபட்சமாக செயல்படக்கூடாது. தீர்ப்பு வந்தவுடன் அதன்படி நான் நடந்து கொள்கிறேன். தற்போது நெற்பயிர் வளர்ந்து, கதிர் விடும் நிலையில் உள்ளது. நெற் பயிர் குழந்தைக்கு சமம். அந்த நெற்பயிரை அழிக்க வேண்டாம் என்று சொல்லுங்கள் என்று கூறி காலில் விழுந்து கதறியுள்ளார். ஆனால் அவரை தள்ளிவிட்டுள்ளார் ஜெரீனா பேகம்.
பின்னர், டிராக்டருக்கு முன் விழுந்து என் மீது ஏற்றிய பிறகு பயிரை அழியுங்கள் என்று சாவித்திரி தடுத்துள்ளார். அப்போது பெண் காவலரை விட்டு அந்தப் பெண்ணை அப்புறப்படுத்த ஜெரீனாபேகம் உத்தரவிட்டுள்ளார்.
தொடர்ந்து, அவரிடம் நீங்களும் ஒரு பெண் தானே. என் நெற் பயிரை நாசம் செய்யலாமா என்று கேட்டுள்ளார். என்னையே எதிர்த்து பேசுகிறாயா? நீ எங்கு வேண்டுமானாலும் போ. என்னை ஒன்றும் செய்ய முடியாது என்று மிரட்டல் பாணியில் கூறியதுடன், நிலத்தை டிராக்டரை கொண்டு தொடர்ந்து சமன்படுத்த ஜெரீனாபேகம் உத்தரவிட்டுள்ளார்.
அறுவடைக்கு தயாராக இருந்த நெற்பயிரை அழித்த சம்பவம் பெரும் பரபரப்பை ஏற்படுத்தியது. இது தொடர்பான வீடியோ தொலைக்காட்சி மற்றும் சமூக வலை தளங்களில் வெளியானது. இந்த சம்பவத்திற்குப் பிறகு சாவித்ரி இறந்துவிட்டார். கடந்த 2017 ஆம் ஆண்டு இந்த நிகழ்வில் சாவித்திரி என்ற பெண் மீதான மனித உரிமை மீறல் தொடர்பாக மாநில மனித உரிமை ஆணையம் தாமாகவே முன்வந்து வழக்குப் பதிவு செய்தது.
இந்த வழக்கை விசாரித்த மாநில மனித உரிமை ஆணைய உறுப்பினர் துரை ஜெயசந்திரன், உயிரிழந்த பெண்ணின் சார்பில் அவரது கணவர் கிருஷ்ணன், மகன் வடிவேலன், யுவராஜ் மற்றும் மகள் கோமதி, லாவண்யா உள்ளிட்ட 5 பேருக்கு தலா 1 லட்சம் ரூபாயை 4 வார காலத்திற்குள் இழப்பீடாக அளிக்க வேண்டும் என்றும் இந்த தொகையை காவல் கண்காணிப்பாளர் ரெஜினா பேகத்திடம் இருந்த வசூலித்து வழங்கவும் உத்தரவிட்டார்.
மேலும், காவல் துணை கண்காணிப்பாளர் ரெஜினா பேகத்திற்கு எதிராக ஒழுங்கு நடவடிக்கை எடுக்கவும் தமிழ்நாடு அரசிற்கு மாநில மனித உரிமை ஆணையம் பரிந்துரை செய்து உத்தரவிட்டுள்ளது.
