சென்னை: சட்டப்பேரவையில் கேள்வி நேரத்தின்போது பேசிய திருப்பத்தூர் சட்டப்பேரவை உறுப்பினர் நல்லதம்பி, திருப்பத்தூர் தொகுதியில் வருவாய் வட்டம் வாரியாக விளையாட்டு மைதானம் அமைக்க அரசு ஆவன செய்யுமா என கேட்டார்.
இதற்கு பதிலளித்த விளையாட்டு மேம்பாட்டுத் துறை அமைச்சர் மெய்யநாதன், "விளையாட்டு வீரர்களை ஊக்குவிக்கும் வகையில், ஒலிம்பிக் போட்டியில் கலந்துகொண்ட வீரர்களுக்கு ஐந்து லட்சம் ரூபாய் நிதியுதவி வழங்கியது தமிழ்நாடு அரசு. போட்டிகளில் வெற்றி பெறுபவர்களுக்கு ஊக்கத்தொகை வழங்கப்படும் என அறிவித்ததைப் போல், பாராஒலிம்பிக்கில் வெள்ளி பதக்கம் வென்ற மாரியப்பனுக்கு இரண்டு கோடி ரூபாய் பரிசு அறிவிக்கப்பட்டுள்ளது.
விளையாட்டு அரங்குகளை உலகத்தரத்திலான கட்டமைப்புகளாக மாற்ற நடவடிக்கை எடுக்கப்பட்டு வருகிறது. மேலும், மாவட்டத்தின் தலைநகரங்களில் திறந்த வெளி, உள் விளையாட்டரங்கம், நீச்சல்குளம் அமைக்கவும் நடவடிக்கை எடுக்கப்பட்டு வருகிறது.
ஏலகிரி மலைப்பகுதியில் ஒரு ஏக்கர் நிலப்பரப்பில் உள்விளையாட்டரங்கம் அமைக்க 4 கோடியே 75 லட்சம் ரூபாய் நிதி ஒப்புதல் அளிக்கப்பட்டுள்ளது. விரைவில் இதற்கான டெண்டர் விடப்பட்டு பணிகள் தொடங்கப்படும்” எனத் தெரிவித்தார்.
இதையும் படிங்க: தனியார்மயமாக்கலை திமுக அரசு ஏற்காது - தங்கம் தென்னரசு
