சென்னை அம்பத்தூர் தொழிற்பேட்டையில் உள்ள காவலர் குடியிருப்பில் குடியிருந்து வந்த உதவி ஆய்வாளர் மணி, 2004ஆம் ஆண்டு பணி ஓய்வு பெற்றார். ஓய்வுபெற்ற பின்பும் குடியிருப்பைக் காலி செய்யாமல் குடும்பத்துடன் வசித்து வந்துள்ளார். இதனால், குடியிருப்பை காலி செய்துவிட்டு, வாடகை பாக்கிய செலுத்தும்படி அறிவுறுத்தி, அம்பத்தூர் தொழிற்பேட்டை மேலாளர் நோட்டீஸ் அனுப்பினார்.அதன்படி வீட்டை காலி செய்வதை விடுத்து, நோட்டீசை எதிர்த்து மணி சென்னை உயர் நீதிமன்றத்தில் மனுத் தாக்கல் செய்தார்.
14 ஆண்டுகளாக நிலுவையில் இருந்த இந்த வழக்கு, நீதிபதி எஸ்.எம்.சுப்பிரமணியம் முன்பு மீண்டும் விசாரணைக்கு வந்தது. அப்போது, மனுதாரர் 15 ஆண்டுகளாக வாடகை கொடுக்காமலும், வீட்டை காலி செய்யாமலும் இருப்பதாக தொழிற்பேட்டை நிர்வாகம் தரப்பில் தெரிவிக்கப்பட்டது. அவர் மீது நடவடிக்கை எடுக்கும்படி புகார் அளித்த போது, மணி ஓய்வு பெற்றதால் அவர் மீது நடவடிக்கை எடுக்க முடியாது என பரங்கிமலை காவல் கண்காணிப்பாளர் தரப்பில் தெரிவிக்கப்பட்டது.
இந்நிலையில், தமிழ்நாடு ஓய்வூதிய சட்ட விதிகளின்கீழ், ஓய்வூதியதாரரின் நடத்தை சரி இல்லாவிட்டால் அவர் மீது நடவடிக்கை எடுக்க தமிழ்நாடு அரசுக்கு அதிகாரம் உள்ளது என்று தெரிவித்த நீதிபதி, வீடு ஒதுக்கீட்டுக்கான நிபந்தனைகள், ஓய்வு பெற்றபின்பும் வீட்டை காலி செய்யாத மணிக்கு எதிராக எடுத்த நடவடிக்கை என்ன, வாடகை பாக்கியை வசூலிக்க எடுத்த நடவடிக்கை என்ன என்பன உள்ளிட்ட கேள்விகளை எழுப்பி, அதற்கு பதிலளிக்க சிட்கோ தலைவர் மற்றும் நிர்வாக இயக்குனருக்கு உத்தரவிட்டார்.
இதனையடுத்து, குடியிருப்புகளின் தற்போதைய நிலை, சட்டவிரோதமாக குடியிருப்புகளில் வசிப்பது குறித்தும் விரிவாக விசாரித்து அறிக்கை அளிக்கவும் உத்தரவிட்டு இந்த வழக்கு விசாரணையை செப்டம்பர் 23ஆம் தேதிக்கு ஒத்திவைத்தார்.
