சென்னை தலைமைச் செயலகத்தில் உணவுத்துறை அமைச்சர் காமராஜ் செய்தியாளர்களைச் சந்தித்தார்.
அப்போது அவர் தெரிவித்ததாவது, "தமிழ்நாட்டில் 2020ஆம் ஆண்டு மேட்டூர் அணையிலிருந்து நீர் குறித்த நேரத்தில் திறக்கப்பட்டதை அடுத்து நெல் விளைச்சல் அதிகரித்துள்ளது. இதுவரை 2 லட்சத்து 37 ஆயிரத்து மெட்ரிக் டன் நெல் கொள்முதல் செய்யப்பட்டுள்ளது.
இது கடந்த திமுக ஆட்சியில் ஒப்பிடும்போது 10 மடங்கு கூடுதல். விவசாயிகளிடம் நாளொன்றுக்கு 6 லட்சம் நெல் மூட்டைகள் என 2,135 கொள்முதல் நிலையங்கள் மூலம் கொள்முதல் செய்யப்படும்.
நெல் கொள்முதல் நிலையத்தில் பணிபுரியக்கூடிய கடைநிலை ஊழியர் முதல் உயர்மட்ட அலுவலர்கள் வரை அனைவரும் விடுமுறை இல்லாமல் விவசாயிகளிடம் நெல்லை கொள்முதல் செய்து வருகின்றனர். இது குறித்த எதிர்க்கட்சிகளின் குற்றச்சாட்டு தவறானது.
நாளை (அக்.21) முதல் புகார் உள்ள நெல் கொள்முதல் மையங்களை நேரடியாக ஆய்வு செய்யப்படும். நெல் கொள்முதல் நிலையங்களில் விவசாயிகளிடம் இருந்து ஒரு ரூபாய் பெற்றால் கூட அது தவறானது.
நெல் கொள்முதல் நிலையங்களை லஞ்ச ஒழிப்பு துறை அலுவலர்கள் கவனித்து வருகின்றனர். தற்போது விவசாயிகளிடம் பெறக்கூடிய நெல் மத்திய அரசின் விதிமுறைப்படி 17 விழுக்காடு ஈரப்பதம் இருக்கவேண்டும்.
இதனை 22 விழுக்காடாக உயர்த்த வேண்டும் என மத்திய அரசிற்கு கோரிக்கை விடுக்கப்பட்டுள்ளது. இதுகுறித்து மத்திய அரசு கமிட்டி விரைவில் தமிழ்நாடு வர உள்ளது" எனத் தெரிவித்தார்.
இதையும் படிங்க: நேரடி நெல் கொள்முதல் நிலையப் பணிகளில் இடையூறு : விவசாயிகள் தவிப்பு
