சென்னை: இந்திய குடியரசுத் தலைவர் தேர்தலில் வாக்களிப்பதற்கான ஏற்பாடுகள் தமிழ்நாடு சட்டப்பேரவையில் தயார் நிலையில் உள்ளது. தமிழ்நாட்டில் நடைபெற உள்ள தேர்தலில் 234 சட்டப்பேரவை உறுப்பினர்கள், கணேசமூர்த்தி, செல்வராஜ், கார்த்தி சிதம்பரம் ஆகிய மூன்று நாடாளுமன்ற உறுப்பினர்கள் ஆகியோர் வாக்களிக்கவுள்ளனர்.
குடியரசுத் தலைவர் தேர்தலில் பாஜக தலைமையிலான ஆளும் தேசிய ஜனநாயகக் கூட்டணி சார்பில் திரவுபதி முர்முவும், அவரை எதிர்த்து, எதிர்கட்சிகளின் பொது வேட்பாளராக யஷ்வந்த் சின்ஹா போட்டியிடுகிறார்கள். குடியரசுத் தலைவர் தேர்தல் 18 ஆம் தேதி நடைபெறவுள்ளது.
தமிழ்நாடு சென்னை சட்டப்பேரவை வளாகத்தில் அமைந்துள்ள "குழுக் கூட்ட அறையில்" காலை 10 மணி முதல் மாலை 5 மணி வரை வாக்குப்பதிவு நடைபெறவுள்ளது. இத்தேர்தலை நடத்த சட்டப்பேரவைச் செயலாளர் கி. சீனிவாசன், சட்டப்பேரவைச் செயலக இணைச் செயலாளர் இரா. சாந்தி ஆகியோர், இந்தியத் தேர்தல் ஆணையத்தால் உதவி தேர்தல் அதிகாரிகளாக நியமிக்கப்பட்டுள்ளனர்.
இந்திய நாடாளுமன்றத்தின் மக்களவை, மாநிலங்களவையின் உறுப்பினர்கள், யூனியன் பிரதேசங்களின் சட்டப்பேரவை உறுப்பினர்கள், அனைத்து மாநிலங்களின் சட்டப்பேரவை உறுப்பினர்கள் குடியரசுத் தலைவர் தேர்தலில் வாக்களிக்க தகுதி பெற்றவர்கள். குடியரசுத் தலைவருக்கான தேர்தல், நாடாளுமன்றத்திலும், மாநில சட்டப்பேரவைகளிலும் நடைபெறும்.
இந்த தேர்தலில் வாக்குச்சீட்டில் உள்ள வேட்பாளரின் பெயருக்கு நேராக, வேட்பாளர்களின் தேர்வை ரகசியமாக வாக்காளர்கள் குறிப்பிட வேண்டும். இதற்கென பிரத்யேக பேனா பயன்படுத்தப்படும். சென்னை தலைமைச் செயலகத்தில் சட்டப்பேரவை வளாகத்தில் உள்ள குழு கூட்ட அறையில் குடியரசுத் தலைவருக்கான தேர்தல் நடைபெறவுள்ளது.
இந்த அறையில் இருந்த மிகப்பெரிய மேஜை அகற்றப்பட்டு, வாக்குச்சீட்டு செலுத்தும் பெட்டியை வைப்பதற்காக ஒரு மேஜை போடப்பட்டுள்ளது. வாக்களிக்க வருவோரின் அடையாள அட்டையை ஒரு அலுவலர், பெயர் பட்டியலுடன் சரிபார்ப்பார். அதன்பிறகு, வாக்குச்சீட்டை மற்றொரு அலுவலர் வழங்குவார். சட்டப்பேரவை செயலாளர் சீனிவாசனும் தேர்தல் நடைபெறும் அறையில் இருப்பார்.
வேட்பாளரின் ஏஜென்ட் ஒருவர் நியமிக்கப்பட்டு இருப்பார். ஓட்டுப்போடுபவரின் கை விரலில் மை எதுவும் வைக்கப்படாது. தமிழ்நாட்டில் குடியரசுத் தலைவர் தேர்தலுக்கான ஏற்பாடுகளை தேர்தல் பார்வையாளராக வந்திருக்கும் புவனேஷ்வர்குமார் பார்வையிடவுள்ளார். தமிழ்நாட்டில் உள்ள எம்பிகளின் வாக்கு மதிப்பு 700 எனவும் சட்டப்பேரவை உறுப்பினர்களின் வாக்கு மதிப்பு 170 எனவும் கணக்கிடப்படும். மேலும் ஒருவர் 2 வாக்குகளை அளிக்க முடியும் என்பது குறிப்பிடத்தக்கது.
இதையும் படிங்க: தமிழ்நாட்டின் மகளாக சில நியாயமான கருத்துகளை தெரிவிக்க உரிமை உள்ளது - ஆளுநர் தமிழிசை
