சென்னை: பொதுமக்களுக்கு இடையூறு ஏற்படுத்தும் வகையிலும், பெண்களை துன்புறுத்தும் வகையிலும் பிராங்க் வீடியோக்களை எடுத்து சிலர் யூ-டியூப் சேனல்களில் பதிவிட்டு வருவதாகவும், குறிப்பாக கட்டெரும்பு, குல்பி, ஆரஞ்சு மிட்டாய், ஜெய்மணிவேல், நாகை 360 ஆகிய யூடியூப் சேனல்களை முடக்க வேண்டும் எனவும் கடந்த செப்டம்பர் 7ஆம் தேதி ரோகித் குமார் என்பவர் சென்னை காவல் ஆணையர் அலுவலகத்தில் புகார் அளித்தார்.
இந்த புகார் தொடர்பாக இன்று ரோஹித்தை மத்திய குற்றப்பிரிவு சைபர் கிரைம் போலீசார் அழைத்து விசாரணை நடத்தினர். விசாரணை முடிந்த பின்பு செய்தியாளர்களை சந்தித்த ரோஹித், சாலையில் பொதுமக்களை துன்புறுத்தும் வகையில் 5 யூடியூப் சேனல்கள் பிராங்க் வீடியோக்கள் எடுத்து அதை பதிவிட்டு சம்பாதித்து வருவதாகவும், இந்த சேனல்களை முடக்கக்கோரியும், தான் கொடுத்த புகாரின் பேரில் இன்று விசாரணைக்கு ஆஜரானதாகவும் அவர் கூறினார்.
மேலும், குற்றம்சாட்டப்பட்ட 5 யூடியூப் சேனல்களின் உரிமையாளர்களை வரும் 20ஆம் தேதி விசாரணைக்கு ஆஜராக வேண்டும் என மத்திய குற்றப்பிரிவு சைபர் கிரைம் போலீசார் சம்மன் அனுப்பியுள்ளதாகவும் அவர் தெரிவித்தார்.
மேலும், தமிழகம் மட்டுமின்றி இந்தியா முழுவதும் முதியவர்களை அச்சுறுத்தும் வகையில் பிராங்க் வீடியோக்கள் எடுத்து அதை வெளியிடுவதை சம்மந்தப்பட்ட யூடியூபர்கள் கைவிட வேண்டும் எனவும் அவர் வேண்டுகோள் விடுத்தார்.
இதையும் படிங்க: இலங்கையில் சிறைபிடிக்கப்பட்ட 8 மீனவர்கள் மீட்பு; விமானம் மூலம் தமிழகம் வருகை
