சென்னை: ராமநாதபுரம் அரியக்குடியை சேர்ந்தவர் முருகேசன். இவரது மனைவி கீர்த்திகா. இவர் கடந்த 2020ஆம் ஆண்டு நடைபெற்ற உள்ளாட்சித் தேர்தலில் வாக்களிக்க தனது தாய் வீட்டிற்கு சென்றுள்ளார். அப்போது நிறைமாத கர்ப்பிணியாக இருந்த கீர்த்திகாவுக்கு பிரசவ வலி ஏற்பட்டுள்ளது. இதனையடுத்து ராமநாதபுரம் அரசு மருத்துவமனையில் அனுமதிக்கப்பட்ட கீர்த்திகாவுக்கு குழந்தை பிறந்துள்ளது.
பிரசவத்துக்கு பின்னரான சிறிது நேரத்திலேயே கீர்த்திகா, அவரது சிசு இருவரும் உயிரிழந்தனர். இதனையடுத்து சிகிச்சையின் போது மருத்துவர் இல்லாமல், செவிலியர் மட்டுமே இருந்ததால் வழங்கப்பட்ட முறைற்ற சிகிச்சையின் காரணமாகவே உயிரிழப்பு நிகழ்ந்ததாக கீர்த்திகாவின் உறவினர்கள் போராட்டம் நடத்தினர்.
இதுதொடர்பான செய்தி கடந்த 2020ஆம் ஆண்டு டிசம்பர் 29ஆம் தேதி நாளிதழ்களில் வெளியானது. அதன் அடிப்படையில் மாநில மனித உரிமை ஆணையம் தாமாக முன் வந்து வழக்கை விசாரணைக்கு எடுத்தது. இந்த வழக்கு தொடர்பாக தமிழ்நாடு மருத்துவ மற்றும் ஊரக சுகாதார பணிகள் இயக்குனர் அறிக்கை தாக்கல் செய்தார்.
அதில் கீர்த்திகா ஏற்கனவே இதயம் பலவீனமான நிலையில் இருந்ததாகவும், சிக்கலான சூழ்நிலை காரணமாக மரணமடைந்ததாகவும் தெரிவிக்கப்பட்டிருந்தது.
இதனை ஏற்க மறுத்த ஆணைய உறுப்பினரான நீதிபதி துரை. ஜெயசந்திரன், முறையான சிகிச்சை வழங்காததே மரானத்திற்கு காரணம் எனவும், தொழில் ரீதியான கடமையை உணர்ந்து செயல்பட வேண்டும் எனவும் கூறினார். அத்துடன் கீர்த்திகாவின் மரணத்திற்கு இழப்பீடாக 5 லட்ச ரூபாயை 4 வாரங்களில் வழங்க வேண்டுமெனவும் தமிழ்நாடு அரசுக்கு அவர் உத்தரவிட்டார்.
இதையும் படிங்க: சிறுமியைப் பாலியல் பலாத்காரம் செய்த ஆட்டோ ஓட்டுநர் போக்சோவில் கைது
