ஆசிரியர்கள் மலைப்பகுதியில் ஓராண்டு கட்டாயம் பணியாற்ற வேண்டும்!

தொடக்கக்கல்வித்துறையில் மலை சுழற்சி ஒன்றியங்களில் பணியாற்றும் அனைத்து ஆசிரியர்களும் கட்டாயம் ஓராண்டு மலையில் பணியாற்ற வேண்டும் என பள்ளிக்கல்வித்துறை செயலாளர் காகர்லா உஷா அதிரடியாக உத்தரவிட்டுள்ளார்.

சென்னை : தமிழ்நாட்டில் ஈரோடு, தேனி, சேலம், வேலூர், திண்டுக்கல், திருப்பத்தூர், தர்மபுரி ஆகிய 7 மாவட்டங்களில் மலைகள் அதிகம் உள்ள 20 ஒன்றியங்களில் பணியாற்றும் ஆசிரியர் மலைக்கு கீழ் பகுதியில் உள்ள சமவெளியில் பணிபுரியவே விரும்புகின்றனர். ஆனால், மலையின் மேல் பகுதிக்கு சென்று பணிபுரிய விரும்புவதில்லை.

இந்த நிலையில் மலையின் மேல் பகுதியில் உள்ள மாணவர்கள் பயன்பெறும் வகையில் மலைச் சுழற்சிக்கான வழிகாட்டுதல் நெறிமுறைகளை திருத்தம் செய்து பள்ளிக்கல்வித்துறை செயலாளர் காகர்லா உஷா அதிரடியாக அறிவித்துள்ளார்.

இது குறித்து பள்ளிக்கல்வித்துறை முதன்மைச் செயலாளர் காகர்லா உஷா வெளியிட்டுள்ள அரசாணையில், “மலைப்பாங்கான இடங்களில் உள்ள பள்ளிகளில் பணிபுரியும் ஆசிரியர்களை பணி மாறுதல் செய்வதற்கு ஏற்கனவே வழிகாட்டுதல் நெறிமுறைகள் வெளியிடப்பட்டன. தற்பொழுது தொடக்கக்கல்வி இயக்கத்தின் கீழ் மலைப் பகுதிகளில் உள்ள தொடக்க மற்றும் நடுநிலைப்பள்ளிகளில் பணிபுரியும் ஆசிரியர்களுக்கான மலைச் சுழற்சி மாறுதல் கலந்தாய்விற்கு வழிகாட்டுதல் நெறிமுறைகள் வெளியிடப்படுகின்றன.

மலைச்சுழற்றி மாறுதல்கள் தொடக்க மற்றும் நடுநிலைப்பள்ளிகளில் பணிபுரியும் இடைநிலை ஆசிரியர்கள், தொடக்கப்பள்ளி தலைமை ஆசிரியர்கள், பட்டதாரி ஆசிரியர்கள், நடுநிலைப்பள்ளி தலைமை ஆசிரியர்கள் என அனைவருக்கும் பொருந்தும்.

மலைச்சுழற்சி முறை மாறுதல் நடைமுறையில் உள்ள ஒன்றியங்களில் பொது மாறுதலுக்கு முன்னதாகவே மலைச்சுழற்சி மாறுதல்கள் (முதல் நாளிலேயே) நடத்தப்பட வேண்டும். ஆசிரியர்கள் மலைப்பகுதியில் பணிபுரிய தயங்குவதால், குறைந்தது ஓராண்டு பணிபுரிய அனுமதிக்க வேண்டும். அவர்கள் தொடர்ந்து பணிபுரிய விரும்பினால் அனுமதிக்கலாம்.

மலை ஏற்றம், இறக்கம் செய்யப்படுவதால் ஏற்படும் காலிப்பணியிடங்களுக்கு பதவி உயர்வு அளிக்கப்பட வேண்டிய எண்ணிக்கையைத் தவிர்த்து நகர பணியிடங்களுக்கு சமவெளிப் பகுதியில் பணிபுரியும் ஆசிரியர்களில் இளையோரில் இருந்து மூத்தோர் என்ற நிலையில் முன்னுரிமை நிர்ணயம் செய்து சுழற்சி முறையில் மலை ஏற்றம் செய்யப்படுவர்.

சுழற்சி முறை முழுமை பெறும் வரை மலையேற்றம் நிகழும். அந்த ஒன்றியத்தில் பணியில் உள்ள அனைவரும் மலையில் பணியாற்ற வேண்டும். பதவி உயர்வு பணியிடங்களில் காலியிடங்களை முதலில் மலைப்பகுதிக்கு வழங்க வேண்டும்” என அதில் கூறியுள்ளார்.

இதையும் படிங்க: ஆசிரியர் பட்டயப்பயிற்சி முடித்தவர்களுக்கான வேலைவாய்ப்பு ஒரு கேள்விக்குறி - 7 ஆண்டுகளில் 414 பயிற்சி நிறுவனங்கள் மூடல்!