சென்னையில் ஊரடங்கு நீட்டிக்கப்பட்ட போதிலும், கரோனாவின் தாக்கம் குறையாமல் அதிகரித்துக் கொண்டே செல்கிறது. வடசென்னை பகுதிகளில் நோய்த்தொற்று குறைந்தாலும் அண்ணா நகர், கோடம்பாக்கம், அடையாறு போன்ற மண்டலங்களில் பாதிக்கப்பட்டோரின் எண்ணிக்கை அதிகரித்துவருகிறது. இருப்பினும் குணமடைந்தவர்களின் எண்ணிக்கையும் அதற்குச் சமமாக உள்ளது. பாதிக்கப்பட்டவர்களில் 94 விழுக்காட்டினர் குணமடைந்துள்ளனர்.
சென்னையில், கரோனாவால் பாதிக்கப்பட்டு சிகிச்சை பெறுபவர்களின் விழுக்காடும் நான்கு விழுக்காடாக குறைந்துள்ளது. தற்போது, ஒரு மண்டலத்தில்கூட சிகிச்சை பெற்று வருபவர்களில் எண்ணிக்கை ஆயிரத்திற்கு மேல் இல்லை என்பது குறிப்பிடத்தக்கது.
அதிகபட்சமாக, அண்ணா நகரில் 663 பேர் தொற்றால் பாதிக்கப்பட்டு சிகிச்சை பெற்று வருகின்றனர். அதேபோல் அனைத்து மண்டலங்களிலும் குணமடைந்தவரின் விழுக்காடும் 90க்கு மேல் உள்ளது.
இதுவரையில் சென்னையில் மொத்தம் ஒரு லட்சத்து 97 ஆயிரத்து 077 பேர், கரோனா தொற்றினால் பாதிக்கப்பட்டுள்ளனர். அதில் ஒரு லட்சத்து 85 ஆயிரத்து 374 பேர் முழுமையாக குணமடைந்து வீடு திரும்பியுள்ளனர். மேலும், மூன்றாயிரத்து 607 பேர் உயிரிழந்தனர்.
சென்னையில் மண்டலவாரியாக சிகிச்சை பெற்று வருபவர்களின் பட்டியலை மாநகராட்சி வெளியிட்டுள்ளது. அதன்படி,
அண்ணா நகர் - 663 பேர்
கோடம்பாக்கம் - 587 பேர்
தேனாம்பேட்டை - 553 பேர்
ராயபுரம் - 468 பேர்
திரு.வி.க. நகர் - 559 பேர்
அடையாறு - 513 பேர்
வளசரவாக்கம் - 313 பேர்
அம்பத்தூர் - 436 பேர்
தண்டையார்பேட்டை - 303 பேர்
திருவொற்றியூர் - 118 பேர்
மாதவரம் - 199 பேர்
ஆலந்தூர் - 244 பேர்
சோழிங்கநல்லூர் - 139 பேர்
பெருங்குடி - 299 பேர்
மணலி - 88 பேர்
