அரசுக்கு எதிராக பகுதிநேர ஆசிரியர்கள் காலவரையற்ற உண்ணாவிரத போராட்டம்... ஏன் தெரியுமா?

பணி நிரந்தரம் உள்ளிட்ட பல்வேறு கோரிக்கைகளை வலியுறுத்தி சென்னை நுங்கம்பாக்கம் டி.பி.ஐ வளாகத்தில் பகுதிநேர ஆசிரியர்கள் காலவரையற்ற உண்ணாவிரத போராட்டத்தில் ஈடுபட போவதாக பகுதி நேர ஆசிரியர் சங்கங்களின் கூட்டு நடவடிக்கை குழுவினர் முடிவு செய்துள்ளனர்.

சென்னை: சென்னை சேப்பாக்கத்தில் உள்ள பத்திரிகையாளர் மன்றத்தில் பகுதி நேர ஆசிரியர் சங்கங்களின் கூட்டு நடவடிக்கை குழுவினர் (JACPTTA) செய்தியாளர்களை சந்தித்தனர். அப்போது பகுதி நேர ஆசிரியர் சங்கங்களின் கூட்டு நடவடிக்கை குழு ஒருங்கிணைப்பாளர் சேசுராஜா பேசுகையில், கடந்த 12 ஆண்டுகளாக அரசு நடுநிலை, உயர்நிலை மற்றும் மேல்நிலைப் பள்ளிகளில் உடற்கல்வி, கணினி, தையல், இசை, ஓவியம், வாழ்வியல் திறன் ஆகிய பாடப் பிரிவுகளில் தொகுப்பூதியத்தில் பகுதி நேர ஆசிரியர்களாக பலர் பணியாற்றி வருகின்றனர்.

இந்த நிலையில் 2021 ஆம் ஆண்டு தேர்தல் வாக்குறுதியில் பகுதி நேர ஆசிரியர்களை பணி நிரந்தரம் செய்வோம் என்று திமுக அறிவித்தது ஆனால், தற்போது வரை அது தொடர்பாக எந்த நடவடிக்கையும் எடுக்கவில்லை. ஆசிரியர்களை பணி நிரந்தரத்தை நடைமுறைப்படுத்தாததால், திமுக ஆட்சிக்கு வந்து 3 முறை போராட்டம் நடத்தி உள்ளோம். அரசு தரும் ரூபாய் 10 ஆயிரம் ஊதியத்தை வைத்து எங்களால் குடும்பத்தை நடத்த முடியவில்லை" என்றனர்.

இதையும் படிங்க: காத்திருப்போர் பட்டியலில் மதுராந்தகம் டி.எஸ்.பி - பின்னணி என்ன?

தொடர்ந்து பேசிய அவர், பணி நிரந்தரம் செய்யப்படுவோம் என்ற எண்ணத்தில் இருந்த நிலையில், தற்போது வரை அதற்கான நடவடிக்கைகள் எடுக்கப்படாததால், மன உளைச்சலில் பல ஆசிரியர்கள் உள்ளனர். எங்களை மாற்றான் தாய் பிள்ளைகளாக அரசு பார்க்கிறது" என்று வேதனை தெரிவித்தனர்.

மேலும் பகுதி நேர ஆசிரியர்களை தமிழக அரசு பணி நிரந்தரம் செய்ய வேண்டி வலியுறுத்தி மே 22ஆம் தேதி காலை 9 மணி முதல் சென்னை நுங்கம்பாக்கம் டிபிஐ வளாகத்தில் காலவரையற்ற உண்ணாவிரத போராட்டத்தில் ஈடுபட போவதாக ஆசிரியர் சங்கங்களின் கூட்டு நடவடிக்கை குழுவினர் தெரிவித்தனர்.

மே 22 ஆம் தேதி நடைபெறும் காலவரையற்ற உண்ணாவிரத போராட்டத்தில் தமிழ்நாட்டிலிருந்து 10 ஆயிரம் ஆசிரியர்கள் கலந்து கொள்ள உள்ளதாகவும், அனைத்து கட்சித் தலைவர்களுக்கும் அழைப்பு விடுத்துள்ளதாகவும் கூறினர். மேலும், பகுதி நேர ஆசிரியர்களுக்கு 12 ஆண்டுகளாக மே மாத ஊதியம் வழங்குவதில்லை என்றும் அரசு சார்பில் குறைந்தபட்ச சம்பளம் தான் தருகிறார்கள் எனவும் பிஎஃப், இஎஸ்ஐ, மகப்பேறு விடுப்பு போன்றவைகள் பகுதி நேர ஆசிரியர்களுக்கு கிடைக்காமல் உள்ளதாகவும் வருத்தம் தெரிவித்தனர்.

பணி நிரந்தரம் உள்ளிட்ட பல்வேறு கோரிக்கைகளை வலியுறுத்தி அரசுக்கு எதிராக தொடர் போராட்டத்தில் ஈடுபடப் போவதாக ஆசிரியர் சங்கங்களின் கூட்டு நடவடிக்கை குழு உறுப்பினர்கள் தெரிவித்தனர்.

இதையும் படிங்க: தற்கொலை செய்யும் மனநிலையில் இருக்கிறேன்: முதலமைச்சருக்கு காவலர் வெளியிட்ட வீடியோவால் பரபரப்பு!