சென்னை: நீட் தேர்வு தமிழ்நாட்டில் ஏற்படுத்தும் பாதிப்புகளையும், சிக்கல்களையும் பற்றிய பரிந்துரைகளை அளிப்பதற்காக ஓய்வு பெற்ற நீதிபதி ஏ.கே. ராஜன் தலைமையில் குழு அமைக்கப்பட்டுள்ளது.
இந்தக் குழுவிடம், நீட் தேர்வு பாதிப்பு குறித்த கருத்துகளை தெரிவிக்க இன்றே கடைசிநாள் என்ற சூழலில், திமுக இளைஞர் அணி செயலாளரும், சட்டப்பேரவை உறுப்பினருமான உதயநிதி ஸ்டாலின், திமுக மாணவரணி செயலாளரும் சட்டப்பேரவை உறுப்பினருமான எழிலரசனும் நீட் தேர்வு பாதிப்பு குறித்த கருத்துகளை இந்தக்குழுவிடம் அளித்துள்ளனர்.
நீட்டால் பிள்ளைகளை இழந்த பெற்றோர்கள்
அவர்கள் குழுவிடம் அளித்த அறிக்கையில், "தமிழ்நாட்டில், அனிதாவில் தொடங்கி பிரதீபா, ஏஞ்சலின் ஸ்ருதி, சுபஸ்ரீ (சென்னை), ரிதுஸ்ரீ, ஜோதிஸ்ரீ துர்கா, வைஸ்யா, ஆதித்யா, விக்னேஷ், சுபஸ்ரீ (திருச்சி), மோதிலால், கீர்த்தனா, தனலெட்சுமி ஆகிய 13 மாணவர்கள் நீட் தேர்வால் தங்கள் உயிரை மாய்த்துக்கொண்டனர்.
பிள்ளைகளை இழந்த அத்தனை பெற்றோரும், ‘நீட் தேர்வு அரசுப் பள்ளி பாடத்திட்டத்துக்கு எதிராக உள்ளதால், பள்ளி தேர்வுகளில் நல்ல மதிப்பெண் எடுத்திருந்தாலும், நீட் தேர்வின் வினாத்தாள்கள் மாணவர்களுக்குப் பயத்தையும், எதிர்மறை சிந்தனையையும் விதைத்து அவர்களைத் தற்கொலை வரை அழைத்துச் செல்கின்றன. எனவே, நீட் வேண்டாம்’ என்று எங்களிடம் கண்ணீர் மல்க வேண்டிக்கேட்டுக்கொண்டனர்.
நீட் வேண்டாம்- தன்னெழுச்சி முழக்கம்
தமிழ்நாட்டின் முதுநிலை மற்றும் உயர் மருத்துவப் பிரிவுகளில் 50 விழுக்காடு இடங்களையும் இளநிலையில் 15 விழுக்காடு இடங்களையும் வலுக்கட்டாயமாக ஒன்றிய அரசு பறித்துக்கொண்டுள்ளது. இந்தியாவிலேயே தமிழ்நாட்டில்தான் அதிக அரசு மருத்துவக் கல்லூரிகள் கட்டமைக்கப்பட்டுள்ளன.
அதில் அனைத்து அரசு மருத்தவக் கல்லூரிகளிலும் முதுநிலை மற்றும் உயர் மருத்துவப் பிரிவுகள் அதிகளவில் உள்ளன. இவ்விடங்களில் தமிழ்நாட்டு மாணவர்கள் தங்கள் வாய்ப்பை இழக்கும் சூழலில், எஞ்சிய இடங்களுக்கு மாணவர் சேர்க்கை நடத்துவதையும் ஒன்றிய அரசின் கைகளில் தருவதன் மூலம் தமிழ்நாட்டின் மருத்துவத் துறை பெரும் நெருக்கடியைச் சந்திக்கும் அபாயமும் உள்ளது.
நீட் அரசியலமைப்புக்கு எதிரானது
திமுக தலைவரும், நானும் தமிழ்நாடு முழுவதும் தேர்தலின்போது, சுற்றுப்பயணம் மேற்கொண்ட போது, பெற்றோர், இளைஞர்கள், மாணவர்கள் அனைவரும் நீட்டை ஒழிக்க வேண்டும் என்ற கருத்தை தன்னெழுச்சியாக பதிவு செய்ததையும் இங்குக் குறிப்பிட விரும்புகிறோம்.
சமூக நீதிக்குப் புறம்பான, ஏற்றத்தாழ்வைத் திணிக்கும், நீட் தேர்வு இந்திய ஒன்றியத்தின் அரசியலமைப்புக்கு எதிரானது. ஏழை, எளிய, கிராமத்து மாணவ மாணவிகளின் கனவுகளுக்கு மட்டுமன்றி அவர்களின் உயிருக்கே ஆபத்தானது. நீட் நுழைவுத்தேர்வு என்பது ஏற்றத்தாழ்வின் உச்சம், மாணவர்களின் மருத்துவக்கனவை சுக்கு நூறாக்கும் கொடுங்கோலான செயல், தேர்வு என்கிற பெயரில் திணிக்கப்படும் கொலைக்களம் ஆகும்.
ஒன்றிய அரசின் இரட்டை நிலைப்பாடு
எனவே, இத்தகைய ஆபத்து நிறைந்த நீட் தேர்வை ரத்து செய்ய நடவடிக்கை எடுக்க வேண்டும் என்பதையும் தமிழ் நாட்டு மக்களின் எண்ணங்களைப் பிரதிபலிக்கும் வகையில் தங்களுடைய பரிந்துரையை அளிக்கும்படி அன்போடு கேட்டுக்கொள்கிறோம்.
நீட் தேர்வு மூலமாகத்தான் இனி மருத்துவக் கல்வி என்று பிடிவாதமாக இருக்கும் ஒன்றிய அரசு, தான் நடத்தும் மத்திய கல்வி நிலையங்களில் மருத்துவப் படிப்பில் சேர்வதற்கு நீட் தேர்வு தேவையில்லை என்று விலக்கு அளித்துள்ளது. இது ஒன்றிய அரசினுடைய பாரபட்சமான இரட்டை நிலையைக் காட்டுகிறது. மேலும் மாநில அரசினுடைய கல்வி உரிமையைப் பறிக்கும் வகையில் அமைந்துள்ளது.
ஒன்றிய அரசு தன் ஆளுகைக்கு உட்பட்ட கல்வி நிலையங்களில் நீட் தேர்வு தேவையில்லை என்று விலக்களித்து உள்ளதுபோல் ஏற்கனவே தமிழ்நாட்டிலும் நீட் தேர்வுக்கு விலக்களித்து முன்னர் இருந்த முறைப்படி பிளஸ் டூ மதிப்பெண் அடிப்படையிலேயே மருத்துவ கல்விக்கான சேர்க்கை நடைபெற வேண்டும் என்று நீதிபதி ஏ.கே.ராஜன் அவர்களின் தலைமையில் அமைந்துள்ள இக்குழு பரிந்துரைக்க வேண்டும் என்று கேட்டுக்கொள்கிறோம்" என குறிப்பிடப்பட்டிருந்தது.
இதையும் படிங்க: வன்னியர்களுக்கான 10.5% இட ஒதுக்கீடு... நல்ல முடிவு எடுக்கப்படும் - முதலமைச்சர்
