சென்னை: அறிஞர் அண்ணா இந்திய மருத்துவம் ஓமியோபதி மருத்துவமனை வளாகத்தில், 2022-23 ஆம் கல்வியாண்டிற்கான பட்ட படிப்பு சித்தா, ஆயுர்வேதா, யுனானி மற்றும் ஓமியோபதி (பி.எஸ்.எம்.எஸ்.,பி.ஏ.எம்.எஸ்., பி.யு.எம்.எஸ் மற்றும் பி.எச்.எம்.எஸ்) மாணவர் சேர்க்கைக்கான தரவரிசைப் பட்டியலை இன்று (நவ.17) மருத்துவம் மற்றும் மக்கள் நல்வாழ்த்துறை அமைச்சர் மா. சுப்பிரமணியன் வெளியிட்டார்.
மாணவர்களுக்கு இடஒதுக்கீட்டு ஆணை: தொடர்ந்து யோகா மற்றும் இயற்கை மருத்துவப் பட்ட மேற்படிப்பிற்கான கலந்தாய்வு தொடங்கி வைத்ததோடு, மாணவர்களுக்கு இடஒதுக்கீட்டு ஆணை வழங்கினார். பின், இந்திய மருத்துவ துறைக்கான ஆராய்ச்சி மற்றும் மேம்பாட்டு பிரிவில் தனியார் நிறுவனங்களால் தயாரிக்கப்படும் மருந்துகளின் தரச் சான்றிதழ்களை அந்த நிறுவனங்களுக்கு அளித்தார். பின் செய்தியாளர்களிடம் பேசிய அவர், 2022-23 ஆம் கல்வியாண்டிற்கான பட்ட படிப்பு சித்தா, ஆயுர்வேதா, யுனானி மற்றும் ஓமியோபதி (பி.எஸ்.எம்.எஸ்., பி.ஏ.எம்.எஸ்., பி.யு.எம்.எஸ் மற்றும் பி.எச்.எம்.எஸ்) மாணவர் சேர்க்கைக்கான தரவரிசைப் பட்டியல் இன்று வெளியிடப்பட்டது.
மருத்துவக்கல்லூரிகளில் காலியிட நிலவரம்: தமிழ்நாட்டில் 5 அரசு மருத்துவக்கல்லூரிகளில் 280 இடங்கள், 26 சுயநிதி இந்திய மருத்துவமுறை மற்றும் ஓமியோபதி மருத்துவக்கல்லூரிகளில் 1660 இடங்கள் என மொத்தம் 1940 இடங்கள் உள்ளது. சித்தா மருத்துவப் பிரிவுக்கு மட்டும் 2 அரசு மருத்துவக்கல்லூரிகளில் 126 இடங்களும் 7.5 % இடஒதுக்கீட்டின் கீழ், 10 இடங்கள் என மொத்தம் 136 இடங்கள் அரசு கல்லூரிகளில் உள்ளது. 9 சுயநிதி இந்திய மருத்துவமுறை மற்றும் ஓமியோபதி மருத்துவக்கல்லூரிகளில் 7.5 % இடஒதுக்கீட்டின் கீழ், 19 இடங்கள், அரசுக்கு ஒப்பளிக்கப்பட்ட 249 இடங்கள், நிர்வாக ஒதுக்கீட்டின் கீழ் 75 இடங்கள், அகில இந்திய ஒதுக்கீட்டின் கீழ், 147 இடங்கள், தனியார் மருத்துவக்கல்லூரிகளில் 490 இடங்கள் என மொத்தம் 626 இடங்கள் தமிழ்நாடு முழுவதும் சித்தா மருத்துவ b பிரிவு படிப்பிற்காக உள்ளது.
ஆயுர்வேதா மருத்துவப் பிரிவுக்கு மட்டும் 1 அரசு மருத்துவக்கல்லூரியில் 47 இடங்களும், அரசுப் பள்ளி மாணவர்களுக்கான 7.5 % இடஒதுக்கீட்டின் கீழ் 4 இடங்கள் என மொத்தம் 51 இடங்கள் அரசு மருத்துவக்கல்லூரிகளில் உள்ளது. 6 சுயநிதி இந்திய மருத்துவமுறை மற்றும் ஓமியோபதி மருத்துவக்கல்லூரிகளில் 7.5 % இடஒதுக்கீட்டின் கீழ், 12 இடங்கள், அரசுக்கு ஒப்பளிக்கப்பட்ட 158 இடங்கள், நிர்வாக ஒதுக்கீட்டின் கீழ், 47 இடங்கள், அகில இந்திய ஒதுக்கீட்டின் கீழ், 93 இடங்கள், தனியார் மருத்துவக்கல்லூரிகளில் 310 இடங்கள் என மொத்தம் 361 இடங்கள் தமிழ்நாடு முழுவதும் ஆயுர்வேதா மருத்துவப் பிரிவு படிப்பிற்காக உள்ளது.
மருந்துகளின் தரம் ஆய்வு: 2022- 23 ஆம் ஆண்டு நிதிநிலை அறிக்கையில் வெளியிடப்பட்ட அறிவிப்பு எண்.136-ன் படி இந்திய மருத்துவம் மற்றும் ஓமியோபதித் துறையின் கீழ் செயல்படும் இந்திய மருத்துவ துறைக்கான ஆராய்ச்சி மற்றும் மேம்பாட்டு (மருந்து பகுப்பாய்வு கூடம்) பிரிவில் தனியார் நிறுவனங்களால் தயாரிக்கப்படும் மருந்துகளின் தரத்தினை ஆய்வு செய்வதற்கான பணி இன்று தொடங்கப்பட்டது. முதற்கட்டமாக 5 தனியார் நிறுவனங்களால் தயாரிக்கப்பட்ட மருந்துகளின் தரத்தினை ஆய்வு செய்து தரச் சான்றிதழ் வழங்கப்பட்டது.
உலக தரத்தில் ஆராய்ச்சி கூடம்: சுகாதாரத்துறையில் கடந்த ஒன்றரை ஆண்டுகளாக விடியல் பெற்றுள்ளனர். விருப்பத்திற்கேற்ப வெளிப்படைத்தன்மையுடன் பணி மாறுதல் கலந்தாய்வு நடைபெற்றது. சுகாதாரத்துறையில் 136 வது அறிவிப்புகளை அறிவித்துள்ளது. இதன் செயல்பாடுகள், புத்தகமாக வெளியிடப்படும் என்ற அவர், இந்த 136 அறிவிப்புகளுக்கான பணிகள் சிறப்பாக நடைபெற்று வருகிறது.
3 கோடி செலவில் ஆராய்ச்சி கூடம் உலக தரம் வாய்ந்த ஆராய்ச்சி கூடம் அமைக்கப்பட்டு செயல்பட்டு வருகிறது. அங்கு ஆய்வு செய்து, தரம் வாய்ந்த மருந்துகள் தானா என உறுதி செய்வதற்கான பரிசோதனை நடைபெற உள்ளது. இதற்காக தனியார் நிறுவனங்களுக்கு குறைந்த செலவில் சோதனை செய்ய திட்டம் துவக்கப்பட்டுள்ளது.
புதிய சித்தா கல்லூரிகள்: நாமக்கல்லில் ஒரு சித்தா மருத்துவக்கல்லூரி அமைக்கப்படும் என்று கடந்த நிதியாண்டில் அறிவிக்கப்பட்டது. மிக விரைவில் மாவட்ட ஆட்சியர் அலுவலகத்தில் 50 படுக்கைகள் கொண்ட மருத்துவமனை அமைய இருக்கிறது. அதேபோல, விரைவில் பழனியில் 50 படுக்கைகள் கொண்ட சித்தா மருத்துவமனை அமைய இருக்கிறது. திருவண்ணாமலை அடிவாரத்தில் ஒரிரு மாதத்தில் சித்தா மருத்துவமனை அமைய இருக்கிறது. அதற்கான கட்டுமான பணி நடைபெற்று வருகிறது.
ஆளுநரின் பதில்: சித்த பல்கலைக்கழகத்திற்கான ஒப்புதலுக்கு ஆளுநருக்கு அனுப்பி வவைக்கப்பட்டது. அதில், சில கேள்விகள் கேட்டு அரசுக்கு ஆளுநர் கடிதம் அனுப்பினார். அதற்கும் பதில் கடிதம் அனுப்பப்பட்டுள்ளது. சித்த மருத்துவப் பல்கலைக் கழகத்தில் மாணவர் சேர்க்கையில் நீட் தேர்வில் இருந்து விலக்கு கிடைக்கும் வரையில் அதன் அடிப்படையில் மாணவர்கள் சேர்க்கப்படுவார்கள் . ஆளுநர் விரைவில் சித்த மருத்துவ பல்கலைக்கழகம் அமைப்பதற்கான ஒப்புதல் அளிப்பார் எனவும், சித்த பல்கலைக்கழகத்திற்காக மாதவரம் பகுதியில் நிலம் மருத்துவத்துறைக்கு மாற்றம் செய்யப்பட்டுள்ளது.
சித்த மருத்துவம் அரசு வேலை சாத்தியமாகாது: மேலும், இதுவரையும் கண்டுகொள்ளாத பிரிவாக சித்தா பிரிவு இருந்து வந்தது. சித்த மருத்துவ பல்கலைக்கழகம் தொடங்கியதும் புதிய பாடப் பிரிவு தொடங்கப்படும். சித்த மருத்துவம் படித்த அனைவருக்கும் அரசு வேலை என்பது சாத்தியமில்லை. படித்தவர்கள் அனைவருக்கும் அரசின் வேலைக் கிடைக்காது. தனியார் நிறுவனங்களிலும் வேலை பார்க்கலாம். அரசு மருத்துவமனைகளில் யோகா பயிற்சி பெற்றவர்களை கொண்டு இனிமேல் நியமனம் செய்யப்படும் என தெரிவித்தார்.
இதையும் படிங்க: மருத்துவ படிப்புக்கான NRI சான்றிதழ் சரிபாருங்க - உயர்நீதிமன்றம் ஆணை!
