தனியார் நிறுவனங்களின் பால் விற்பனை விலை உயர்வைக் கண்டித்து தமிழ்நாடு பால் முகவர்கள் மற்றும் தொழிலாளர்கள் நலச் சங்க மாநிலத் தலைவர் பொன்னுசாமி அறிக்கை ஒன்றை வெளியிட்டுள்ளார். இதில், 'ஆந்திராவை தலைமையிடமாகக் கொண்டு செயல்பட்டு வரும் முன்னணி தனியார் பால் நிறுவனங்களான டோட்லா, ஹெரிடேஜ், ஜெர்சி, சங்கம், திருமலா மற்றும் சீனிவாசா, ஜேப்பியார், கோவர்த்தனா உள்ளிட்ட தனியார் பால் நிறுவனங்கள் தங்களின் பால் மற்றும் தயிருக்கான விற்பனை விலையை லிட்டருக்கு 4 ரூபாய் வரையிலும் உயர்த்துவதாக அறிவித்துள்ளன.
முன்னணி தனியார் பால் நிறுவனங்களான டோட்லா, கோவர்த்தனா, சங்கம், ஹெரிடேஜ், ஜெர்சி உள்ளிட்ட நிறுவனங்கள் ஏற்கனவே பால் மற்றும் தயிருக்கான விற்பனை விலையை உயர்த்தி விட்ட நிலையில் வரும் 2ஆம் தேதி முதல் தங்களின் பாலிற்கான விற்பனை விலையை லிட்டருக்கு 4 ரூபாய் வரையிலும், தயிருக்கான விற்பனை விலையை லிட்டருக்கு 6 ரூபாய் வரையிலும் உயர்த்துவதாக பால் முகவர்களுக்கு சுற்றறிக்கை வாயிலாக தெரிவித்துள்ளன. தனியார் பால் நிறுவனங்களைத் தொடர்ந்து தமிழ்நாட்டில் உள்ள இதர அனைத்து தனியார் பால் நிறுவனங்களும் தங்களின் பாலுக்கான விற்பனை விலையை வரும் வாரத்தில் உயர்த்திட முடிவு செய்துள்ளன.
தமிழ்நாடு அரசின் ஆவின் பால் நிறுவனம் விலை உயர்வை அறிவித்தது. அதே போல் தனியார் நிறுவனங்களும் பால் கொள்முதல் விலையை உயர்த்தி வழங்குகிறோம் என அறிவித்துள்ளதால், அடிப்படையில் ஏழை, எளிய, நடுத்தர மக்கள் பாதிப்படைகின்றனர். 2019ஆம் ஆண்டில் மட்டும் தற்போது மூன்றாவது முறையாக தனியார் பால் நிறுவனங்கள் தன்னிச்சையாக மீண்டும் பால் விற்பனை விலையை உயர்த்துவதற்கு எதிர்ப்புத் தெரிவித்து தமிழ்நாடு பால் முகவர்கள் தொழிலாளர்கள் நலச் சங்கம் சார்பில் கடும் கண்டனத்தை தெரிவித்துக் கொள்வதோடு, தன்னிச்சையான பால் விற்பனை விலை உயர்வை தனியார் பால் நிறுவனங்கள் உடனடியாக திரும்ப பெற வேண்டும் என வலியுறுத்துகிறோம்.
தமிழ்நாட்டில் தேனீர் கடைகள், உணவகங்கள் என வணிக ரீதியிலான பயன்பாட்டிற்கு பெரும்பாலும் தனியார் பால் நிறுவனங்களின் பாலையே வணிகர்கள் நம்பி இருப்பதால் தற்போதைய பால் விற்பனை விலை, உயர்வால் பால் சார்ந்த உணவுப் பொருட்களின் விலை கடுமையாக உயரும் சூழல் உருவாகியுள்ளது. மேலும், அண்டை மாநிலமான ஆந்திராவை தலைமையிடமாகக் கொண்டு செயல்பட்டு வரும் மேற்கண்ட தனியார் பால் நிறுவனங்கள் அம்மாநிலத்தில் பால் விற்பனை விலை உயர்த்தாதபோது தமிழ்நாட்டில் மட்டும் பால் விற்பனை விலையை உயர்த்துவதையும், ஒவ்வொரு முறை விற்பனை விலையை உயர்த்தும் போதெல்லாம் கொள்முதல் விலை உயர்வு என்கிற போலியான காரணத்தைக் காட்டுவதையும் கண்டிப்பாக ஏற்றுக் கொள்ள முடியாது.
ஏனெனில் தற்போது தமிழ்நாடு அரசின் ஆவின் நிறுவனத்தை விட குறைந்த விலை கொடுத்தே தனியார் பால் நிறுவனங்கள் பாலைக் கொள்முதல் செய்கின்றன என்பது குறிப்பிடத்தக்கது. எனவே, தனியார் பால் நிறுவனங்களின் தன்னிச்சையான இந்த விற்பனை விலை உயர்வு விவகாரத்தில், தமிழ்நாடு அரசு உடனடியாக தலையிட்டு அதனை தடுத்து நிறுத்த வேண்டும்.
அண்டை மாநிலங்களில் இருந்து தமிழ்நாட்டில் வந்து பால் வணிகத்தில் ஈடுபட்டு வரும் தனியார் பால் நிறுவனங்களை வரைமுறைப்படுத்தி உரிய நடவடிக்கை எடுக்க வேண்டும் என்று தமிழ்நாடு பால் முகவர்கள் தொழிலாளர்கள் நலச் சங்கம் சார்பில் வேண்டுகோள் விடுக்கிறோம்' எனக் குறிப்பிட்டுள்ளார்.
