சென்னை: இறுதி விசாரணைக்கு பட்டியலிடப்பட்ட வழக்குகளில் அரசு தரப்பு வாதங்களை தொடங்காவிட்டால், அரசின் விளக்கத்தை கேட்காமலேயே தீர்ப்பளிக்கப்படும் என்றும், மேலும் வாதங்களை முன்வைக்க அவகாசம் கோரிய தமிழக அரசுக்கு ரூபாய் 10 ஆயிரம் அபராதம் விதித்து எச்சரிக்கை விடுத்து உத்தரவிட்டுள்ளது சென்னை உயர் நீதிமன்றம்.
சென்னை உயர் நீதிமன்றத்தில், முன்னதாக கல்லூரி உதவி பேராசிரியர்களின் பணிமூப்பு தொடர்பாக, வழக்கு ஒன்று தொடரப்பட்டு இருந்தது. அந்த வழக்கு இன்று(ஆகஸ்ட் 22) நீதிபதிகள் ஆர்.சுரேஷ்குமார் மற்றும் குமரேஷ் பாபு ஆகிய இருவர் அடங்கிய அமர்வில் இறுதி விசாரணைக்கு வந்தது. அப்போது மனுதாரர் தரப்பில், ஆஜரான வழக்கறிஞர் 45 நிமிடங்களுக்கு மேலாக வழக்கின் வாதங்களை முன்வைத்தார். அதனை தொடர்ந்து அரசு தரப்பில் வாதிட்ட வழக்கறிஞர், வழக்கின் வாதங்களை தொடங்குவதற்கு பதிலாக, சிறப்பு வழக்கறிஞர் ஆஜராகி வாதிட இருப்பதால், வழக்கை தள்ளிவைக்க வேண்டுமென கோரிக்கை வைத்தார்.
இதனால் அதிருப்தி அடைந்த நீதிபதிகள், அரசுக்கு எதிரான நீதிமன்ற அவமதிப்பு வழக்குகளின் விசாரணையின் போது மட்டும் அரசு சிறப்பு வழக்கறிஞர், கூடுதல் தலைமை வழக்கறிஞர், தலைமை வழக்கறிஞர் என பலரும் ஆஜராகும் நிலையில், இறுதி விசாரணை நடைபெறும் வழக்குகளில் ஆஜராக வேண்டாமா? என அரசு தரப்பு வழக்கறிஞரிடம் சரமாரியாக கேள்வி எழுப்பினர்.
இதையும் படிங்க: அரசு டாஸ்மாக் கடைகளுக்கு அதிரடி உத்தரவு: உத்தரவை கடைபிடிக்காத கடை ஊழியர்கள் மீது நடவடிக்கை!
தொடர்ந்து, எந்த ஒரு வழக்காக இருந்தாலும் அரசு தரப்பும், மனுதாரர் தரப்பும் இணைந்து செயல்படும் பட்சத்தில் தான் வழக்கில் விரைவான தீர்வை எட்ட முடியும் என தெரிவித்த நீதிபதிகள், எதிர்வரும் காலங்களில் இறுதி விசாரணையின் போது அரசு தரப்பில் உரிய வழக்கறிஞர் ஆஜராகவில்லை என்றால், மனுதாரர் தரப்பு வாதங்களை மட்டும் கேட்டுவிட்டு, அரசு தரப்பு கருத்தை ஏன் கேட்கவில்லை என விளக்கத்தை குறிப்பிட்டு, சம்பந்தப்பட்ட வழக்கில் உத்தரவு பிறப்பிக்கப்படும் என தமிழக அரசிற்கு எச்சரிக்கை விடுத்துள்ளனர்.
மேலும், இந்த வழக்கை பொறுத்தவரை, அமர்வின் போது வாதங்களை தொடங்காமல் அரசு சிறப்பு வழக்கறிஞர் ஆஜராவதற்காக அவகாசம் கோரியதற்காக, உயர் கல்வித் துறை செயலாளருக்கு 10 ஆயிரம் ரூபாய் அபராதம் விதித்து, வழக்கை ஒத்தி வைத்து நீதிபதிகள் உத்தரவிட்டு உள்ளனர்.
இதையும் படிங்க: லதா ரஜினிகாந்த் எதிரான மோசடி வழக்கு: 'ஆட் பீரோ' நிறுவனம் உச்ச நீதிமன்றத்தில் மேல்முறையீடு!
