சென்னை: வில்லிவாக்கத்தை சேர்ந்தவர் தினகரன் பிரசாத். இவர் மேன் பவர் நிறுவனம் நடத்திவருவதாக கூறி மூன்று முகநூல் கணக்குகள் மூலம் ஏராளமான ஆண், பெண் நண்பர்களோடு பழகியுள்ளார். மேலும் பிரபல ஐ.ஏ.எஸ் அதிகாரியின் ரசிகர்கள் எனக்கூறிக் கொண்டு சமூக வலைதளத்தில் ஒரு குழுவையும் உருவாக்கியுள்ளார்.
அந்த குழுவில் பாதிக்கப்பட்ட பெண் மென்பொறியாளரும் சேர்ந்துள்ளார். அந்த குழுவினர் ஏழை மக்களுக்கு தங்களால் இயன்ற சேவைகளை செய்து வந்துள்ளனர். இதனை சாதகமாக பயன்படுத்தி கொண்டு தினகரன் பிரசாத், அந்த பெண் மென்பொறியாளரை பார்க்கும் போது இறந்து போன தனது தாயை போலவே இருப்பதாக கூறி பழகி உள்ளார்.
அம்மா என்றே அழைத்து அன்பாக பேசி வந்த தினகரன் பிரசாத் உதவி செய்வதாக கூறி பெண் மென்பொறியாளரிடம் இருந்து பணம் வாங்கி உல்லாசமாக இருந்துள்ளார். இந்த உண்மை அறிந்த பெண் மென் பொறியாளர் தினகரன் பிரசாத்திடம் பேசுவதை தவிர்த்து விட்டார்.
இதனால் ஆத்திரம் அடைந்த தினகரன் குடி போதையில் செம்மஞ்சேரி பகுதியில் உள்ள அந்த பெண்ணின் அடுக்குமாடி குடியிருப்புக்கு நேரில் சென்று தகராறு செய்துள்ளார். அதன் பின் காவல்துறைக்கு அந்தப்பெண் தகவல் தெரிவித்ததையடுத்து,பின்னர் தினகரன் பிரசாத் தலைமறைவாகினார்.
மேலும் தொடர்ந்து தன்னிடம் பழகாததால் பெண் மென்பொறியாளரின் புகைப்படங்களை சமூக வலைதளத்திலும் அவதூறாக பதிவேற்றி நண்பர்களுக்கும், உறவினர்களுக்கும் தினகரன் பிரசாத் அனுப்பியது தெரியவந்துள்ளது.
இதனால் மன உளைச்சலுக்கு உள்ளான பெண் மென்பொறியாளர், இது தொடர்பாக துணை ஆணையர் ஜோஸ் தங்கையாயிடம் புகார் அளித்ததையடுத்து சம்பந்தப்பட்ட தினகரன் பிரசாத் மீது பெண் வன்கொடுமை சட்டம் உள்ளிட்ட மூன்று பிரிவுகளின் கீழ் செம்மஞ்சேரி போலீசார் வழக்கு பதிவு செய்து தீவிரமாக தேடுதலில் பணியில் ஈடுபட்டனர்.
இதன் அடிப்படையில் செம்மஞ்சேரி போலீசார் தினகரன் பிரசாத்தை நேற்று கைது செய்து, இன்று நீதிமன்றத்தில் ஆஜர்படுத்தி சிறையில் அடைத்துள்ளனர். தொடர்ந்து இதுபோன்று வேறு பெண்களிடம் மோசடியில் ஈடுபட்டாரா என்பது குறித்து காவலில் எடுத்து விசாரிக்கவும் போலீசார் திட்டமிட்டுள்ளனர்.
சமூக வலைதளங்களில் பழகும் நபர்களை பற்றி முழு விவரம் தெரியாமல் பெண்கள் இது போன்று சிக்கிக் கொள்ள வேண்டாம் என போலீசார் பெண்களுக்கு அறிவுறுத்தியுள்ளனர்.
இதையும் படிங்க:ஆபரேசன் கஞ்சா வேட்டை - 2ஆயிரம் கஞ்சா வியாபாரிகளின் வங்கிக்கணக்குகள் முடக்கம்!
