ஈஷா அறக்கட்டளை சார்பில் காவிரி நிதியைப் பாதுகாக்க அடுத்த 12 ஆண்டுகளில் 242 கோடி மரக்கன்றுகள் நட வலியுறுத்தும் காவிரியின் கூக்குரல் என்ற நிகழ்ச்சி சென்னைப் பல்கலைக்கழகத்தில் இன்று நடைபெற்றது. இதில், தமிழக ஆளுநர் பன்வரிலால் புரோகித், முதலமைச்சர் எடப்பாடி பழனிச்சாமி, துணை முதலமைச்சர் ஓ.பன்னீர் செல்வம், தமிழ் மாநில காங்கிரஸ் கட்சித் தலைவர் ஜி.கே.வாசன், திரைப்பட நடிகையும், இயக்குநருமான சுஹாசினி மணிரத்னம், ஈஷா அமைப்பின் நிறுவனர் ஜக்கி வாசுதேவ் ஆகியோர் கலந்துகொண்டனர்.
இதில் முதலமைச்சர் எடப்பாடி பேசுகையில், "மரங்கள் இருப்பதால்தான் ஓசோன் பாதுகாக்கப்படுகிறது. நீர்வளம் பெருகுகிறது தமிழ்நாடு அரசு இதுவரை பல்வேறு திட்டத்தின் கீழ் லட்சக்கணக்கான மரங்கள் நட்டுள்ளது. குறிப்பாக தேக்கு மரக்கன்றுகள் மட்டும் கடந்த 2 ஆண்டுகளில் 2.40 லட்சம் எண்ணிக்கையில் நடப்பட்டுள்ளன.
மேலும் ஒவ்வொரு ஆண்டும் 2 லட்சம் பனை விதைகள் தமிழகத்தில் நடப்பட்டுள்ளன. இதேபோல் நடப்பாண்டில் இரண்டு கோடியே 50 லட்சம் பனை விதைகள் நடத்திட்டமிடப்பட்டுள்ளன. மரங்களை நட்டால் தமிழகம் பசுஞ்சோலைவனமாகும். 242 கோடி மரங்கள் நடும் திட்டம் வரவேற்கத்தக்கது. இந்த நடவடிக்கைக்கு சத்குருவிற்கு மாநில அரசு துணை நிற்கும்" என்றார்.
காவிரியைப் பாதுகாக்கும் தமிழக அரசின் நடவடிக்கை குடியரசுத் தலைவரின் நாடாளுமன்ற உரையில் குறிப்பிடப்பட்டுள்ளதை சுட்டிக்காட்டிய முதலமைச்சர், வைகை, பாலாறு உள்ளிட்ட ஆறுகளுக்கு புத்துயிர் அளிக்கும் திட்டங்கள் செயல்படுத்தப்பட்டு வருவதாகவும் கூறினார்.
மேலும் ஒரு முறை பயன்படுத்தும் பிளாஸ்டிக்கை நாடு முழுவதும் தடை செய்ய பிரதமர் மோடி நடவடிக்கை எடுத்து வருவதாகவும், மழை நீர் சேமிப்புத் திட்டம் போல, மரங்கள் வளர்க்கும் திட்டத்தையும் மக்கள் இயக்கமாக வளர்த்தெடுக்க வேண்டும் என்றும் முதலமைச்சர் எடப்பாடி பழனிசாமி கேட்டுக் கொண்டார்.
இதைத் தொடர்ந்து பேசிய ஜக்கி வாசுதேவ், "காவிரி தற்போது மோசமான நிலையில் இருப்பதாகவும், கடந்த ஐம்பது ஆண்டுளுடன் ஒப்பிடுகையில் காவிரியின் 70 சதவிகித தண்ணீர் வற்றியதாகவும்; மரங்கள் இல்லாததாலேயே மண்ணால் நீரைச் சேமிக்க முடியவில்லை என்று கூறிய அவர், மரங்கள் நடுவதே இதற்கு ஒரே தீர்வு" என்று பேசினார். இதற்காக அனைவரும் ஒன்றிணைந்து பணியாற்றினால் அடுத்த 12 ஆண்டுகளில் குறிப்பிடத்தக்க மாற்றம் தென்படும் என்றும் ஜக்கி வாசுதேவ் நம்பிக்கை தெரிவித்தார்.
