சென்னை: ஆசிரியர்கள் மற்றும் அரசு ஊழியர்களின் கூட்டமைப்பான ஜாக்டோ ஜியோ சார்பில் இன்று (ஜன.5) மாலை 5 மணிக்கு மாவட்ட தலைநகரங்களில் தமிழ்நாடு முதலமைச்சரின் கவனத்தை ஈர்க்கும் வகையில் போராட்டம் நடைபெற உள்ளது. சென்னையில் ரிப்பன் மாளிகை வளாகத்தில் நடைபெறும் போராட்டத்தில் தலைமைச் செயலக சங்கம் உள்பட அனைத்து சங்கங்களும் பங்கேற்க உள்ளனர்.
ஜாக்டோ-ஜியோ அமைப்பினர் தங்களின் கோரிக்கைகளை வலியுறுத்தி கடந்த 2017ஆம் ஆண்டு முதல் தொடர்ந்து பல்வேறு போராட்டங்களில் ஈடுபட்டு வருகின்றனர். அதிமுக ஆட்சி காலத்தில் கோரிக்கைகளுக்காக காலவரையற்ற வேலை நிறுத்தப் போராட்டத்தை 2019ஆம் ஆண்டில் நடத்தினர்.
இந்த போராட்டத்தின்போது எதிர்கட்சித் தலைவராக இருந்த மு.க.ஸ்டாலின் நேரில் சென்று, திமுக ஆட்சி அமைந்த உடன் ஆசிரியர்கள் மற்றும் அரசு ஊழியர்களின் கோரிக்கைகள் நிறைவேற்றப்படும் என உறுதி அளித்தார். திமுக ஆட்சி அமைந்த பின்னர் அரசு ஊழியர்கள் மற்றும் ஆசிரியர்களின் வாழ்வாதார கோரிக்கை உள்பட பல்வேறு கோரிக்கைகள் நிறைவேற்றப்படும் என ஜாக்டோ ஜியோ அமைப்பினர் நம்பிக்கையில் இருந்தனர்.
மேலும் தமிழ்நாடு அரசு ஊழியர் சங்கம் மற்றும் ஜாக்டோ ஜியோ அமைப்பின் மூலம் நடத்தப்பட்ட கூட்டங்களிலும் கலந்து கொண்ட முதலமைச்சர், கோரிக்கைகள் நிறைவேற்றப்படும் என அறிவித்தார். இந்த நிலையில் ஆட்சி அமைந்து 18 மாதங்கள் கழிந்த பின்னரும் தங்களுக்குரிய கோரிக்கைகள் நிறைவேற்றுவது குறித்து எந்தவித அறிவிப்பும் இல்லை என்பதால் ஜனவரி 5ஆம் தேதி மாவட்ட ஆட்சியர் அலுவலகங்கள் முன்பு போராட்டம் நடத்தப்படும் எனவும், அதனைத்தொடர்ந்து மதுரையில் 8ஆம் தேதி கூடி அடுத்த கட்ட போராட்டம் குறித்து ஆலோசித்து அறிவிக்கப்படும் எனவும் ஜாக்டோ ஜியோ அமைப்பினர் அறிவித்திருந்தனர்.
இந்த நிலையில் ஆசிரியர்கள் மற்றும் அரசு ஊழியர்கள் 16 லட்சம் பேர் பயன்பெறும் வகையில் ஜனவரி 1ஆம் தேதி புத்தாண்டு பண்டிகை என்று 4 சதவீத அகவிலைப்படி உயர்வு வழங்கப்படும் என முதலமைச்சர் மு.க.ஸ்டாலின் புத்தாண்டு பரிசாக அறிவித்திருந்தார்.
அதனைத்தொடர்ந்து ஜாக்டோ-ஜியோ அமைப்பினர் உள்ளிட்ட 16 சங்கங்களின் நிர்வாகிகளை முதலமைச்சர் ஸ்டாலின் எங்களை அழைத்து புத்தாண்டு வாழ்த்து தெரிவித்ததுடன், நிதிநிலை சரியான உடன் தங்களின் கோரிக்கைகள் படிப்படியாக நிறைவேற்றப்படும் என தெரிவித்துள்ளார்.
முதலமைச்சர் ஸ்டாலினை சந்தித்த பின்னர் ஜாக்டோ ஜியோ மாநில ஒருங்கிணைப்பாளர்கள் கூட்டம் 1ஆம் தேதி நடைபெற்றது. அதில் அகவிலைப்படியினை மத்திய அரசு வழங்கிய தேதியில் வழங்காமல், தொடர்ச்சியாக ஆறு மாத காலம் தாழ்த்துவதோடு நிலுவைத் தொகையினை மறுப்பது, காலவரையின்றி முடக்கப்பட்டுள்ள சரண் விடுப்பு, மீண்டும் பழைய ஒய்வூதியத் திட்டம் நடைமுறைப்படுத்துதல்,
இடைநிலை ஆசிரியர்கள் மற்றும் முதுநிலை ஆசிரியர்களின் ஊதிய முரண்பாடுகளைக் களைவது, தொகுப்பூதியம் - சிறப்பு காலமுறை ஊதியம் மற்றும் தினக்கூலியில் பணியாற்றும் ஆசிரியர்கள், சத்துணவு, அங்கன்வாடி, எம்ஆர்பி செவிலியர், வருவாய் கிராம உதவியாளர், ஊர்ப்புற நுாலகர், பல்நோக்கு மருத்துவமனை பணியாளர்கள் ஆகியோருக்கு காலமுறை ஊதியம் வழங்குவது,
சாலைப் பணியாளர்களின் 41 மாத பணிநீக்க காலத்தினை முறைப்படுத்துதல், காலிப் பணியிடங்களை உடனடியாக நிரப்புதல், 21 மாத ஊதியமாற்று நிலுவைத் தொகையினை வழங்குதல் உள்ளிட்ட கோரிக்கைகளும், தமிழ்நாடு முதலமைச்சர் பங்கேற்ற வாழ்வாதார மாநாட்டில் அவரிடம் ஜாக்டோ ஜியோ சார்பில் வழங்கப்பட்ட ஆசிரியர், அரசு ஊழியர், அரசு பணியாளர் மற்றும் துறை பிரிவு வாரி ஊழியர்களின் வாழ்வாதார கோரிக்கைகள் குறித்து மாநில ஒருங்கிணைப்பாளர்கள் விரிவாக எடுத்துரைத்தனர்.
இந்த நிலையில் இன்று முதலமைச்சரின் கவனத்தை ஈர்த்திடும் வகையில் கவன ஈர்ப்பு ஆர்ப்பாட்டம் அனைத்து மாவட்ட ஆட்சித் தலைவர் அலுவலகங்களிலும் நடைபெறும் என அறிவிக்கப்பட்டுள்ளது. அடுத்த கட்ட இயக்க நடவடிக்கைகளைத் திட்டமிடுவதற்காக 8ஆம் தேதி மதுரையில் ஜாக்டோ-ஜியோ உயர்மட்டக் கூட்டம் நடைபெறும். ஒருங்கிணைப்பாளர் கூட்டம் மதியம் 2 மணிக்கும், அதனைத் தொடர்ந்து 3 மணிக்கு உயர்மட்டக்குழுக் கூட்டமும் நடைபெற உள்ளது.
ஏற்கனவே பழைய ஓய்வூதிய திட்டம் விவகாரத்தில் திமுக அரசு மீது அரசு ஊழியர்கள் அதிருப்தியில் இருப்பதாக குற்றச்சாட்டு முன்வைக்கப்பட்டு வரும் நிலையில், ஒப்பந்த செவிலியர்கள், இடைநிலை ஆசிரியர்கள் சம ஊதியம் விவகாரம் தற்போது ஜாக்டோ-ஜியோ என அழைக்கப்படும் அரசு ஊழியர்கள் அமைப்பு என தொடர் போராட்டங்கள் அரசுக்கு மேலும் நெருக்கடியை ஏற்படுத்தி வருகிறது.
இதையும் படிங்க: வெடிக்கும் கருத்து மோதல்..! பிளவை நோக்கி நகரும் அதிமுக - பாமக கூட்டணி..! நடந்தது என்ன..?
