சென்னை: மின்சாரம், மதுவிலக்கு மற்றும் ஆயத்தீர்வைத் துறை அமைச்சர் செந்தில் பாலாஜிக்கு சொந்தமான வீடு மற்றும் அலுவலகம் போன்ற இடங்களில் வருமான வரித்துறையினர் இன்று (மே 26) காலை முதல் சோதனை நடத்தி வருகின்றனர். சென்னை, கோயம்புத்தூர், கரூர் உள்ளிட்ட பல்வேறு இடங்களில் இந்த சோதனை தற்போது நடைபெற்று வருகிறது.
அதேபோல் அமைச்சர் செந்தில்பாலாஜிக்கு நெருங்கிய ஒப்பந்ததாரர் வீட்டிலும் வருமான வரித்துறையினர் சோதனை நடத்தி வருகின்றனர். மேலும், அரசு ஒப்பந்ததாரர் வீடுகள் மற்றும் அலுவலகங்களில் என தமிழ்நாடு முழுவதும் 40 இடங்களில் வருமான வரித்துறையினர் சோதனை மேற்கொண்டு வருகின்றனர்.
அது மட்டுமல்லாமல், கரூர் ராமகிருஷ்ணாபுரத்தில் உள்ள அமைச்சர் செந்தில் பாலாஜியின் சகோதரர் அசோக் என்பவரது வீட்டிலும் வருமான வரித் துறையினர் சோதனை மேற்கொண்டு வருகின்றனர். மேலும், கோயம்புத்தூர் மாவட்டம் அவிநாசி சாலை கோல்ட்வின்ஸ் அருகே, சமீபத்தில் அதிமுகவில் இருந்து விலகி திமுகவில் இணைந்த செந்தில் கார்த்திகேயன் என்பவரது வீட்டிலும், காலை 7.30 மணி முதல் சோதனை நடைபெற்று வருகிறது.
அதேபோல், அமைச்சரின் நெருங்கிய நண்பர்களாக கருதப்படும் கரூர் மாநகராட்சி துணை மேயர் தாரணி சரவணன் வீடு, ஒப்பந்ததாரர் சங்கரின் வீடு மற்றும் அலுவலகம், கொங்கு மெஸ் மணி வீடு உள்ளிட்ட இடங்களிலும் வருமான வரித் துறையினர் சோதனை மேற்கொண்டு வருகின்றனர்.
குறிப்பாக, செந்தில் கார்த்திகேயனின் வீட்டில் 10க்கும் மேற்பட்ட வருமான வரித்துறை அதிகாரிகள் இரு குழுக்களாக பிரிந்து வீடு மட்டும் அலுவலகத்தில் சோதனை நடத்தி வருகின்றனர். மேலும், கோவை மாவட்டம் பொள்ளாச்சி அருகே உள்ள காளியாபுரத்தில் இருக்கும் அரவிந்த் என்பவரின் பண்ணை வீட்டிலும் வருமான வரித் துறையினரின் சோதனை நடைபெற்று வருகிறது. அரவிந்த், அமைச்சர் செந்தில் பாலாஜியின் உறவினர் ஆவார்.
இதனிடையே, அமைச்சர் சகோதரர் அசோக் என்பவரது வீட்டின் முன்பு குவிந்த திமுகவினர், வருமான வரித் துறையினர் வந்த காரை தாக்கி உள்ளனர். எனவே, இது குறித்து கரூர் நகர காவல் நிலையத்தில் புகார் அளித்துள்ள வருமான வரித் துறையினர், சோதனையை முழுமையாக நடத்துவற்கு காவல் துறை பாதுகாப்பு வழங்க வேண்டும் எனவும் கோரிக்கை வைத்துள்ளனர்.
முன்னதாக டாஸ்மாக் நிர்வாகத்தில் பல்வேறு முறைகேடுகள் நடைபெறுவதாகவும், அதிலும் குறிப்பாக, கடந்த 2 ஆண்டுகளில் ஒப்பந்தம் எடுத்த அரசு ஒப்பந்ததாரர்கள் முறையாக கணக்கு காட்டவில்லை எனவும் குற்றச்சாட்டு எழுந்தது. இந்த நிலையில்தான், வருமான வரித் துறையினர் சோதனை மேற்கொண்டு வருவதாக முதற்கட்ட தகவல்கள் வெளியாகி உள்ளன.
இதையும் படிங்க: "ஆளுநராக நான் இருந்தால் செந்தில் பாலாஜியை அமைச்சர் பதவியில் இருந்து நீக்கி இருப்பேன்" - அண்ணாமலை!
