கரோனா வைரஸ் தடுப்பு நடவடிக்கைகள் குறித்து சென்னை டி.எம்.எஸ்.இல் மக்கள் நல்வாழ்வுத் துறை அமைச்சர் விஜய பாஸ்கர் இன்று தனியார் மருத்துவமனை உரிமையாளர்களுடன் ஆலோசனைக் கூட்டம் நடத்தினார்.
பின்னர் செய்தியாளர்களை சந்தித்துப் பேசிய அவர், கரோனா வைரஸை கட்டுப்படுத்த தமிழ்நாடு அரசுடன் இணைந்து பணியாற்ற தனியார் மருத்துவமனைகள் ஒத்துழைப்பு அளிப்பது குறித்து ஆலோசிக்கப்பட்டதாகத் தெரிவித்தார்.
கரோனா வைரஸால் பாதிக்கப்பட்டவர்களுக்கு அரசு மருத்துவமனைகளில் அமைக்கப்பட்டுள்ள சிறப்பு வார்டுகளில் உரிய சிகிச்சைகள் வழங்கப்பட்டு வருவதாகக் கூறிய அவர், ஓமந்துரார் சிறப்பு மருத்துவமனையில் 350 படுக்கை வசதி கொண்ட சிறப்பு வளாகம் கரோனா வைரஸால் பாதிக்கப்பட்டவர்களுக்காக உருவாக்கப்பட்டுள்ளதாகவும், அந்த வளாகம் நாளை மறுநாளிலிருந்து செயல்பட உள்ளதாதவும் தெரிவித்தார். மருத்துவர்களின் பாதுகாப்பினைக் கருத்தில்கொண்டு, தினந்தோறும் 60 ஆயிரம் முகக்கவசங்கள் விநியோகிப்பதை உறுதிப்படுத்தியுள்ளதாகவும் கூறினார்.
கரோனா வைரஸால் பாதிக்கப்பட்டவர்கள் உரிய சிகிச்சையின் மூலம் குணமடைந்து வருவதாகக் கூறிய அவர், உடல்நலக் குறைவு ஏற்பட்டுள்ளவர்கள், வயதானவர்கள் கரோனா வைரஸ் தொற்று பரவாமல் இருக்க கூடுதல் கவனம் செலுத்த வேண்டும் எனவும், வெளிநாடு சென்று திரும்பியவர்கள் தங்களது பொறுப்பினை உணர்ந்து வீட்டிலேயே தங்களைத் தனிமைப்படுத்திக்கொள்ளுமாறும் வலியுறுத்தினார். இந்த உத்தரவைப் பின்பற்றாத மூன்று பேர் மீது வழக்குப்பதிவு செய்யப்பட்டுள்ளதாக சுட்டிக்காட்டிய அவர், வீட்டில் தனிமைப்படுத்தப்பட்டவர்கள் எவரேனும் பொதுவெளிக்கு வந்தால் அருகிலுள்ளோர் உடனடியாக அரசிடனம் தகவல் அளிக்குமாறும் வேண்டுகோள் விடுத்துள்ளார்.
மற்ற நாடுகளைப் போல் நமது நாட்டிலும் உயிரிழப்புகள் நேர்ந்துவிடக் கூடாது என்பதற்காக மத்திய அரசு துரிதமாகச் செயல்பட்டு வருவதாகவும், அதற்கு மக்கள் முழு ஒத்துழைப்பு அளிக்குமாறும் வேண்டுகோள் விடுத்துள்ளார்.
இதையும் படிங்க: 'தமிழ்நாட்டில் கரோனா தொற்றால் பாதிக்கப்பட்ட 2ஆவது நபர் குணமடைந்தார்'
