வெளிநாடுகளிலிருந்து வரும் விமானங்களில் பெருமளவு கடத்தல் பொருள்கள் கொண்டு வருவதாக சென்னை விமான நிலைய சுங்கத்துறை அலுவலர்களுக்கு ரகசிய தகவல் கிடைத்தது. இதனையடுத்து சுங்கத்துறை அலுவலர்கள் தீவிர கண்காணிப்பில் ஈடுபட்டனர்.
அப்போது இலங்கை, சார்ஜாவில் இருந்து சென்னை வந்தடைந்த விமானத்தில் பயணித்த திண்டுக்கல்லைச் சேர்ந்த ஆயிஷா சுதிகா, இலங்கையைச் சேர்ந்த முகமது அமாத் ஆகியோரை சந்தேகத்தின் பேரில் சுங்கத்துறை அலுவலர்கள் விசாரித்தனர். விசராணையில் அவர்கள் முன்னுக்குப்பின் முரணாக பேசியதால் அவர்களின் உடமைகளை சுங்கத்துறை அலுவலர்கள் சோதனை செய்தனர். பின்னர் அவர்களை தனியறையில் வைத்து சோதனை செய்தபோது இருவரும் உள்ளாடைக்குள் வைத்து தங்கத்தை கடத்திவந்தது தெரியவந்தது.
அவர்களிடமிருந்து சுங்கத்துறை அலுவலர்கள் 800 கிராம் தங்கத்தை பறிமுதல் செய்தனர். அவற்றின் மதிப்பு ரூ.31 லட்சம் ஆகும். இதனையடுத்து அவர்கள் இருவரையும் கைது செய்து விசாரணை மேற்கொண்டுவருகின்றனர்.
