சென்னை, மக்கள் நல்வாழ்வுத்துறையின் கீழ் பணியாற்றும் மருத்துவர்கள் மற்றும் இதர பணியாளர்களுக்கு பணி மாறுதல், பணி உயர்வு கலந்தாய்வு சென்னையில் நடைபெற்றது. இதில் மக்கள் நல்வாழ்வுதுறை அமைச்சர் மா.சுப்பிரமணியன், செயலாளர் ராதாகிருஷ்ணன் ஆகியோர் கலந்து கொண்டனர்.
பின்னர் செய்தியாளர்களை சந்தித்த மா.சுப்பிரமணியன், "மருத்துவர்களின் பணி மாறுதல் வெளிப்படைத் தன்மையோடு நடைபெற்றது. கடந்த ஓராண்டில் அவரவர் விருப்பத்திற்கு ஏற்ற 14,156 பேருக்கு பணி மாறுதல் செய்யப்பட்டுள்ளது. 1,008 பணி மாறுதலுக்கான கலந்தாய்வு நேற்று(மே24) முதல் தொடங்கியுள்ளது. கரோனா பேரிடர் காலத்தில் முழு அர்ப்பணிப்போடு பணியாற்றிய மருத்துவர்களுக்கு மாறுதல் என்பது ஒரு பரிசாக அமைந்துள்ளது.
மருத்துவர்கள் பணி மாறுதல் பெறும்பொழுது அவர்கள் முகத்தில் 1000 வாட்ஸ் பல்ப் எரிவதை போன்ற தோற்றத்தை பார்த்தோம். செவிலியர்கள் மற்றும் சுகாதார பணியாளர்களுக்கான 1000 பணி மாறுதல் ஜூன் முதல் வாரத்தில் நடைபெற இருக்கிறது. இந்த துறையில் 4,308 பணியிடங்களை நிரப்ப உள்ளோம். அதில் 1021 மருத்துவர் இடங்களும், 18 வகையான சுகாதாரப் பணியாளர் இடங்களையும் நிரப்ப உள்ளோம். 4,308 பணியிடங்களை எம்.ஆர்.பி மூலம் நிரப்ப உள்ளோம். இந்த பணியிடங்களை நிரப்புவதற்கு நான்கு மாதகால அவகாசம் தேவைப்படுகிறது.
மருத்துவர்கள் மற்றும் பணியாளர்களுக்கு இடமாறுதல் அளித்து அவர்களின் விருப்பத்தை நிறைவேற்றி இருக்கிறோம். மூவலூர் இராமாமிர்தம் நிதித்திட்டத்தின் கீழ் 6,00,000 பேருக்கு நிதியுதவியாக ஆயிரம் ரூபாய் வழங்க கணக்கு எடுத்துவருகிறோம். அண்ணா பல்கலைக்கழகத்தில் 6 பேருக்கு கொரோனா உறுதி செய்யப்பட்டுள்ளது. அதை செயலாளர் நேரில் சென்று ஆய்வு செய்து இருக்கிறார். தினமும் 15,000 பரிசோதனையும் செய்யப்படுகிறது. ஆஸ்திரேலியாவில் 2, பெல்ஜியம் 3, கனடாவில் 2, ஜெர்மன் 1, பிரான்ஸ் 1, இத்தாலி 1 பேருக்கும் குரங்கு அம்மை நோய் பரவி இருக்கிறது.
குரங்கு அம்மை பாதிக்கப்பட்ட நாடுகளிலிருந்து தமிழகம் வருபவர்கள் கண்காணிக்க படுவார்கள். குரங்கு அம்மை மிகப்பெரிய பாதிப்பை ஏற்படுத்துவதில்லை. மேலும் இந்த நோய் தொற்று நோயும் கிடையாது. ஏற்கனவே இருக்கக்கூடிய சின்னம்மை, பெரியம்மை, தட்டம்மை போன்ற அறிகுறிகள்தான் குரங்கு அம்மை வருவதற்கான அறிகுறிகள் ஆகும். மக்களை தேடி மருத்துவம் திட்டத்தில் இதுவரை 70 லட்சம் பேருக்கு மருந்துகள் வழங்கப்பட்டுள்ளது" என கூறினார்.
இதையும் படிங்க: நாளை சென்னை வருகிறார் பிரதமர் மோடி
