"மாநில அடையாளங்கள் கட்டுப்படுத்திக் கொண்டுள்ளதால் ஒற்றுமை உணர்வு பலவீனம் அடைந்துள்ளது" - ஆளுநர் ஆர்.என்.ரவி!

State and union territories Formation day celebration at Chennai Raj Bhavan: ஒற்றுமை உணர்வு பலவீனமடைந்து காணப்படுவதற்கு, மக்கள் தங்கள் மாநிலங்களின் அடையாளங்களுக்குள் தங்களைக் கட்டுப்படுத்திக் கொண்டதே காரணம் என்று தமிழ்நாடு ஆளுநர் ஆர்.என்.ரவி தெரிவித்துள்ளார்.

சென்னை: பல்வேறு மாநிலங்கள் மற்றும் யூனியன் பிரதேசங்கள் உருவான தின கொண்டாட்டம் தமிழ்நாடு ஆளுநர் மாளிகையான ராஜ் பவனில் நடைபெற்றது. இந்த விழாவில் ஆந்திரப் பிரதேசம், சத்தீஸ்கர், ஹரியானா, கர்நாடகா, கேரளா, மத்தியப் பிரதேசம், பஞ்சாப், டெல்லி, ஜம்மு - காஷ்மீர், அந்தமான் - நிக்கோபார் தீவுகள், லட்சத்தீவுகள், புதுச்சேரி, சண்டிகர் மற்றும் லடாக் உருவான தின கொண்டாடப்பட்டது.

இந்த விழாவுக்கு தமிழ்நாடு ஆளுநர் ஆர்.என்.ரவி, அவரின் மனைவி லட்சுமி ரவி ஆகியோர் தலைமை தாங்கினார். இந்த நிகழ்ச்சியில் பேசிய ஆளுநர் ஆர்.என்.ரவி, "நமது தேசம் கலாச்சார நல்லிணக்கத்துக்குப் பெயர் பெற்றது. நமது அற்புதமான கலாச்சார பன்முகத்தன்மையின் கீழ் நமது கலாச்சார தொடர்ச்சியின் ஒற்றுமை உள்ளது. நமது நாட்டின் கலாச்சார ஒற்றுமையைக் கொண்டாடுவதே மாநில உருவாக்க தினத்தின் நோக்கம் ஆகும்.

நம் நாட்டின் பல்வேறு பகுதிகளில் இருந்து ஏராளமானோர் தமிழ்நாட்டுக்கு வந்துள்ளனர். நாட்டின் பிற பகுதிகளில் இருந்து வந்தவர்கள் இப்போது இந்த மாநிலத்தைச் சேர்ந்தவர்களாக தங்களை அடையாளப்படுத்திக் கொண்டுள்ளனர். இது ஒரு மினி பாரதம். நாம் அனைவரும் ஒரே குடும்பம் போல வாழ்கிறோம்.

ரோஜா பூக்களின் இதழ்கள் ஒன்றிணைந்தால் அழகான பூவாகக் காட்சியளிக்கும். பூவைத் தாண்டி அவற்றுக்கு இருப்பு கிடையாது. ஒற்றுமை உணர்வு பலவீனமடைந்து காணப்படுவதற்கு, மக்கள் தங்கள் மாநிலங்களின் அடையாளங்களுக்குள் தங்களைக் கட்டுப்படுத்திக் கொண்டதே காரணம் ஆகும்.