கறுப்பு பூஞ்சைக்கு ஆக்சிஜன் மாஸ்க் காரணமா?

சென்னை: கறுப்பு பூஞ்சை நோய் தொற்று பாதிப்பு ஏற்படாமல் தடுத்திடும் வழிமுறைகளை இயற்கை மற்றும் யோகா மருத்துவர்கள் எடுத்துரைக்கின்றனர்.

தமிழ்நாட்டில் கரோனா தொற்றின் இரண்டாம் அலையில் பாதிக்கப்படுபவர்களின் எண்ணிக்கை தொடர்ந்து அதிகரித்து வருகிறது. லேசான மற்றும் மிதமான நோயினால் பாதிக்கப்பட்டவர்களுக்கு சிகிச்சை அளிப்பதற்கு சித்தா, யுனானி, ஆயுர்வேதா, இயற்கை, யோகா மருத்துவமுறைகளை மக்கள் நல்வாழ்வுத்துறை பயன்படுத்தி வருகிறது. இந்நிலையில் கரோனா தொற்றால் பாதிக்கப்பட்டவர்களுக்கு உடலில் நோய் எதிர்ப்பு குறைவதால், கறுப்பு பூஞ்சை நோய் தாக்கத்திற்கு ஆளாகுகின்றனர். அதே போல, கரோனா தொற்றால் பாதிக்கப்பட்டவர்கள் ஆவி பிடிப்பதால் நுரையீரலில் பூஞ்சை படிவதாகவும் கூறப்படுகிறது.

கறுப்பு பூஞ்சை நோய் பாதிப்பு

இதுபோன்ற நிலையில் கரோனா தொற்றால் பாதிக்கப்பட்டவர்களுக்கு கறுப்பு பூஞ்சை நோய் பாதிப்பு ஏற்படாமல் தடுத்திட யோகா, இயற்கை மருத்துவ முறைகள் பெரும் பங்கு வகிக்கிறது என மருத்துவர்கள் தெரிவிக்கின்றனர்.

இதுகுறித்து இந்திய மருத்துவம் மற்றும் ஹோமியோபதி இயக்குநர் கணேஷ் கூறுகையில், "தொற்றினால் பாதிக்கப்பட்டவர்களுக்கு சித்தா, ஆயுர்வேதா, யுனானி, யோகா, இயற்கை மருத்துவ முறை மூலம் சிகிச்சையளிக்கப்பட்டு வருகிறது. தமிழ்நாட்டில் இதுவரை 62 இடங்களில் சிகிச்சை மையங்கள் செயல்பட்டு வருகிறது. ஏழாயிரத்திற்கும் மேற்பட்டவர்களுக்கு சிகிச்சை அளிக்கப்படுகிறது. இங்கு சிகிச்சை பெறுபவர்கள் ஒரு வாரத்தில் குணமடைந்து வீட்டிற்குச் செல்வார்கள்" என்றார்.

யோகா, இயற்கை மருத்துவமுறை

இதுதொடர்பாக அரசு யோகா மற்றும் இயற்கை மருத்துவக் கல்லூரியின் மருத்துவர் தீபா கூறும்போது, "யோகா, இயற்கை மருத்துவ முறையை கரோனா பாதிப்புக்கு ஆரம்ப நிலையிலேயே பின்பற்றும்போது, ஆக்சிஜன் சிகிச்சை அளிக்காமலேயே குணப்படுத்த முடியும். நோயாளிகளுக்கு காலையில் வெறும் வயிற்றில் நீம்பால் எனப்படும் மருந்து அளிக்கப்படும். அதனைத் தொடர்ந்து யோகா பயிற்சி அளிக்கப்படும். பின்னர் நோயாளிகள் உப்பு கலந்த தண்ணீர் மூலம் வாய் கொப்பளிக்க செய்யப்படுவார்கள். தொடர்ந்து, அக்கு பிரசர், அக்குபஞ்சர் சிகிச்சையும், மருத்துவரின் கண்காணிப்பில் ஆவிப்பிடிக்கவும் செய்யப்படும்" எனத் தெரிவித்தார்.

தொடர்ந்து, அரசு இயற்கை மற்றும் யோகா மருத்துவக் கல்லூரி மருத்துவர் நேவிஸ் ராணி பேசுகையில், "வைட்டமின் டி பற்றாக்குறை உலக அளவில் அதிகளவில் இருக்கிறது. இந்தப் பற்றாக்குறைதான் நோய் பாதிப்பு ஏற்படுவதற்கு காரணமாக அமைகிறது. மருந்து, மாத்திரைகள் சாப்பிடுவதை விட சூரிய ஒளியில் இருந்து கிடைக்கும் வைட்டமின் டி தான் அதிக அளவில் நன்மைகள் அளிப்பதாக ஆய்வில் கூறியுள்ளனர்.

சூரியக்குளியலை சரியான முறையில் எடுத்தால் எந்தவிதமான பாதிப்பு ஏற்படாது. சூரியக் குளியலை மதியம் 11 மணி முதல் 3 மணி வரையில் 15 நிமிடம் மட்டும் எடுத்தால் போதுமானது.

கறுப்பு பூஞ்சைக்கு ஆக்சிஜன் மாஸ்க் காரணமா?

கரோனா தொற்றால் பாதிக்கப்பட்டவர்களுக்கு குணமடைந்தப் பின்னர் கலர் கலராக கறுப்பு, வெள்ளை, மஞ்சள் என பூஞ்சை தொற்று பாதிப்பு ஏற்படுவதாக கூறுகின்றனர். மருத்துவமனைகளில் ஆக்சிஜன் சிகிச்சை எடுத்துக் கொண்டவர்களுக்கு தான் பூஞ்சை நோய் பாதிப்பு ஏற்படுகிறது. மருத்துவமனையில் ஆக்சிஜன் மாஸ்க் பல நாள்களாக சரியாக சுத்தம் செய்யப்படாமல் இருந்தாலும் பூஞ்சை தொற்று பாதிப்புகள் ஏற்பட வாய்ப்புகள் உள்ளது. இவை நுரையீரலையும் நேரடியாக பாதிக்கிறது.

பூஞ்சை நம்மை சுற்றிலும் இருக்கிறது. வேப்பங்குச்சியைக் கொண்டு பல் துலக்க வேண்டும். இது வாயில் உள்ள பாக்டீரியாவை கொள்ளும். அதேபோல் தேங்காய் எண்ணெய் வாயில் 15 மில்லி ஊற்றி வாய் கொப்பளிக்கலாம்.

ஜலநிதி சிகிச்சை முறை

இயற்கை மருத்துவத்தில் ஜலநிதி என்ற சிகிச்சை முறை உள்ளது. வீட்டில் உள்ளவர்கள் சூடான நீரில் உப்பு கலந்து மூக்கினை சுத்தம் செய்ய வேண்டும். மேலும் கரோனா பாதிக்கப்பட்டவர்கள் ஆரம்ப நிலையில் இருப்பவர்கள் நீராவி பிடிக்கலாம். கருநொச்சி இலையைப் போட்டு நீரில் கொதிக்க வைத்து ஆவிப் பிடிக்கலாம். கறுப்பு பூஞ்சை நோயால் பாதிக்கப்பட்டவர்கள் முதலில் உயிர் காக்கும் மருந்து எடுத்த பின்னர், தோலில் இருக்கும் கறுப்பு நிறம் மறைவதற்கு வேப்ப எண்ணெய் தேய்க்கலாம்” எனத் தெரிவித்தார்.