முன்னாள் முதலமைச்சர் ஜெயலலிதா உடல்நலக் குறைவால் கடந்த 2016ஆம் ஆண்டு மறைந்தார். அவரது உடல் மெரினா கடற்கரையில், எம்ஜிஆர் நினைவிட வளாகத்தில் அடக்கம் செய்யப்பட்டது. அப்பகுதியில் ஜெயலலிதாவிற்கு நினைவு மண்டபம் அமைக்க ரூ. 50 கோடியை தமிழ்நாடு அரசு ஒதுக்கியிருந்தது. இந்தப் பணிக்காக கடந்த 2018ஆம் ஆண்டு, மே 8ஆம் தேதி முதலமைச்சர் பழனிசாமி அடிக்கல் நாட்டினார்.
இதனைத்தொடர்ந்து, பத்துக்கும் மேற்பட்ட பொக்லைன் எந்திரங்கள், ஐம்பதுக்கும் மேற்பட்ட தொழிலாளர்கள் ஷிப்டு அடிப்படையில் பணியில் ஈடுபடுத்தப்பட்டுள்ளனர். சுமார் 50ஆயிரத்து 422 சதுர அடி பரப்பளவில் நடைபெற்று வந்த கட்டுமான பணி, 10 பகுதி வேலைகளில் 8 பகுதி வேலைகள் ஓரளவு முடிந்துள்ளன.
இந்நிலையில், நினைவிட கட்டுமான பணிகள் தொடர்பாக முதலமைச்சர் பழனிசாமி தலைமையில் சென்னை தலைமைச் செயலகத்தில் நேற்று (ஜூலை 7) ஆய்வுக் கூட்டம் நடைபெற்றது. தற்போது நடைபெற்று வரும் பணிகள் குறித்து முதலமைச்சர் கேட்டரிந்தார்.
இந்தக் கூட்டத்தில், துணை முதலமைச்சர் ஓ. பன்னீர்செல்வம், அமைச்சர்கள் திண்டுக்கல் சீனிவாசன், கே.ஏ. செங்கோட்டையன், எஸ்.பி. வேலுமணி, தங்கமணி, ஜெயக்குமார், கடம்பூர் ராஜு மற்றும் தலைமைச் செயலர் க.சண்முகம் உள்ளிட்டோர் கலந்துகொண்டனர்.
இதையும் படிங்க: மாஸ்க் பரோட்டா 'கரோனா' தோசை - மதுரையை அசத்தும் 'டெம்பிள் சிட்டி'
