கால் உணர்வை இழந்த குழந்தை - நடக்க வைத்த எழும்பூர் குழந்தைகள் நல மருத்துவர்கள்

அரிய வகை நோயால் பாதிக்கப்பட்டு கால் உணர்வை இழந்த குழந்தையை எழும்பூர் குழந்தைகள் நல மருத்துவர்கள் நடக்க வைத்துள்ளனர்.

சென்னை: நாமக்கல்லை சேர்ந்த ஞானசேகரன் - சுதா தம்பதியின் இரண்டரை வயது பெண் குழந்தை சரிஹாசினி.
கடந்த மாதம் குழந்தை சரிஹாசினிக்கு காய்ச்சல் ஏற்படவே, நாமக்கலில் உள்ள தனியார் மருத்துவமனைக்கு பெற்றோர் அழைத்து சென்று உள்ளனர். குழந்தைக்கு காய்ச்சல் ஏற்பட்ட இரண்டாவது நாள் தாயுக்கும், குழந்தைக்கும் கரோனா பரிசோதனை மேற்கொள்ளபட்டது. பரிசோதனையின் முடிவில், இருவருக்குமே தொற்று உறுதியானது.

திடீரென குழந்தையின் இரண்டு கால்களும் செயல் இழந்தன. எந்தவித அசைவுகளும் இல்லாததை உணர்ந்த மருத்துவர்கள், சென்னை எழும்பூரில் உள்ள குழந்தைகள் நல மருத்துவமனைக்கு, மேல் சிகிச்சைக்காக அனுப்பி வைத்துள்ளனர்.

கரோனா தொற்றால் அரிதாக பாதிக்கக்கூடிய குலியன் பார் (Guillain barre) என்ற நோயால் குழந்தைக்கு இரண்டு கால்களும் செயல் இழந்திருப்பதை மருத்துவ குழுவினர் உறுதி செய்தனர்.

இதனால் அதிக தொகை கொண்ட இமுனோ குலோபாலின் (Immunoglobulin) என்ற மருந்தை, ஊசி மூலம் குழந்தையின் உடலில் செலுத்தி உள்ளனர்.

பின்னர் ஒருவார கால இடைவெளியில், செயல் இழந்த கால்களை ஊன்றி, மெல்ல மெல்ல சரிஹாசினி நடக்க தொடங்கி உள்ளார்.

இதையும் படிங்க: வக்ஃப் வாரிய உறுப்பினர் தேர்தல் அட்டவணை வெளியீடு