இதுகுறித்து தமிழ்நாடு பால் முகவர்கள் தொழிலாளர்கள் நலச் சங்கத்தின் மாநிலத் தலைவர் பொன்னுசாமி வெளியிட்டுள்ள அறிக்கையில், நல்ல ஆரோக்யமாக இருக்கும் பால் முகவர்கள், வணிகர்கள், பல்வேறு துறை சார்ந்த தொழிலாளர்கள், அப்பாவி பொதுமக்கள் என பலரையும் "கோவிட்-19 (கரோனா) பரிசோதனை செய்ய வேண்டும் வாருங்கள்" என கரோனா தடுப்பு பணியில் ஈடுபட்டுள்ள தன்னார்வலர்கள் மற்றும் சுகாதார பணியாளர்கள் வலுக்கட்டாயமாக அழைத்து செல்கின்றனர்.
"நாங்கள் ஆரோக்யமாகத் தான் இருக்கிறோம், எங்களது உடம்பில் எந்த உடல் உபாதைகளும் இல்லை" என பரிசோதனைக்கு வர மறுப்போரிடம், நீங்கள் வர மறுத்தால் காவல்துறையினரை அழைத்து வந்து உங்களை குண்டுக்கட்டாக தூக்கிச் செல்ல நேரிடும் என மிரட்டுகின்ற நிகழ்வுகளும் தமிழ்நாடு முழுவதும் அரங்கேறி வருகிறது.
குறிப்பாக நேற்று (ஆகஸ்ட் 5) தென்சென்னை, எம்.ஜி.ஆர் நகர் பகுதியில் பால் வணிகத்தில் ஈடுபட்டு வரும் பால் முகவர் ஒருவரை "கோவிட்-19" பரிசோதனை செய்ய வேண்டும் என கூறி கரோனா தடுப்பு பணியில் ஈடுபட்டுள்ள தன்னார்வலர் வலுக்கட்டாயமாக அழைத்துள்ளார். ஆனால் தான் ஆரோக்யமாக இருப்பதால் வர முடியாது என அவர்களோடு செல்ல மறுத்துள்ளார். உடனே அந்த தன்னார்வலர் நாளை சுகாதாரப் பணியாளர்கள் மற்றும் காவல்துறையினரோடு வருவதாக கூறி மிரட்டிச் சென்றுள்ளார்.
அண்மையில் கூட சென்னை, என்.எஸ்.கே. நகர் பகுதியில் சுமார் 25க்கும் மேற்பட்ட வணிகர்களை வலுக்கட்டாயமாக பரிசோதனைக்காக சுகாதாரப் பணியாளர்கள் அழைத்து சென்று அதில் சுமார் 20 பேருக்கு மேல் பாஸிட்டிவ் வந்திருப்பதாக கூறி தனிமைப்படுத்தியுள்ளனர். தற்போது அந்த 20க்கு மேற்பட்ட வணிகர்களும் தங்களின் கடைகளுக்கு பொருட்கள் வாங்க பொதுமக்கள் வரத் தயங்குவதால் வணிகம் இல்லாமல் கடும் சிரமத்திலும், மிகுந்த மன உளைச்சலிலும் இருக்கின்றனர்.
அதுமட்டுமின்றி சென்னை பெரம்பூர், ராயபுரம் பகுதிகளில் ஆரோக்யமாக இருந்த மூத்த குடிமக்கள் சிலரை வலுக்கட்டாயமாக பரிசோதனைக்காக அழைத்து சென்றதில் சிலர் மன உளைச்சலுக்கும், மன அழுத்தத்திற்கும் ஆளாகி மரணமடைந்துள்ளனர்.
ஏற்கனவே "கோவிட் -19" வைரஸ் தொற்று காரணமாக ஊரடங்கு 5 மாதங்களாக அமலில் இருக்கும் சூழலில், பொதுமக்கள் வேலையிழந்து, வாழ்வாதாரத்தை இழந்து வாழ்க்கையை நடத்த கடும் சிரமங்களை சந்தித்து வருகின்றனர். அத்தியாவசிய உணவுப் பொருட்களை விற்பனை செய்யும் பால் முகவர்கள், வணிகர்கள் சந்தித்து வரும் பிரச்சினைகளும் ஏராளம்.
நிலைமை இப்படி இருக்க கரோனா தடுப்பு பணிகள் என்கிற பெயரில் தன்னார்வலர்களை ஈடுபடுத்தி அவர்கள் ஒவ்வொருவரும் தினமும் "பத்து பேரை பிடித்து வர வேண்டும்" என உயர் அலுவலர்களால் நிர்பந்தம் செய்யப்படுகின்றனர். அவர்களும் வேறு வழியின்றி தங்கள் அலுவலரின் உத்தரவை செயல்படுத்த ஆரோக்யமாக இருப்பவர்களை எல்லாம் கரோனா நோயாளிகளாக கணக்கு காட்ட மிரட்டி வருகின்றனர்.
இதையெல்லாம் வைத்து பார்க்கும் போது கரோனா தடுப்பு பணிகள் என்கிற பெயரில் தமிழ்நாட்டில் மிகப்பெரிய மோசடிகள் நடைபெறுகிறதோ? என்கிற அச்சமும், நித்தமும் வருகின்ற கரோனா நோய் தொற்று உடையவர்களின் எண்ணிக்கை பொய்யாக இருக்குமோ? என்கிற அழுத்தமான சந்தேகமும் நமக்கு எழுவதை தவிர்க்க முடியவில்லை.
அச்சத்தையும், சந்தேகத்தையும் ஆட்சியாளர்கள் நிவர்த்தி செய்வதோடு, அப்பாவி பொதுமக்களையும், வணிகர்கள், பால் முகவர்களை கரோனா பரிசோதனைக்காக மிரட்டி அழைக்கும் தன்னார்வலர்கள் மற்றும் சுகாதாரப் பணியாளர்கள் மீது தமிழ்நாடு அரசு கடுமையான நடவடிக்கை எடுக்க வேண்டும் என அதில் குறிப்பிட்டுள்ளார்.
