தமிழ்நாட்டில் புதிதாக இன்று (ஜூன் 14) 1,974 நபர்களுக்கு கரோனா தொற்று இருப்பது கண்டறியப்பட்டுள்ளது. அவர்களில் சென்னையில் மட்டும் 1,415 பேருக்கு கரோனா உறுதிசெய்யப்பட்டுள்ளது. இதுவரை இல்லாத வகையில் இன்று மட்டும் 38 பேர் உயிரிழந்துள்ளனர் என மக்கள் நல்வாழ்வுத் துறை அறிவித்துள்ளது.
இதற்கிடையே, மார்ச் ஏழாம் தேதி முதல்முதலில் தமிழ்நாட்டில் ஒருவருக்கு கரோனா உறுதி செய்யப்பட்டது. அன்றிலிருந்து மே 31ஆம் தேதிவரை (அதாவது 84 நாள்களில்) ஏறத்தாழ 22,333 பேருக்கு வைரஸ் உறுதி செய்யப்பட்டது. ஆனால், மே 31லிருந்து ஜூன் 14ஆம் தேதிவரைக்குள் 44,661 பேருக்கு தொற்று உறுதி செய்யப்பட்டுள்ளது.
முதல் 84 நாள்களில் வைரஸ் உறுதி செய்யப்பட்டவர்களின் எண்ணிக்கை 22,000ஆக இருந்த நிலையில், தற்போது 14 நாள்களில் அதன் எண்ணிக்கை இரண்டு மடங்காக அதிகரித்துள்ளது மக்களிடையே பீதியை ஏற்படுத்தியுள்ளது. அதெபோல், மே 31வரை உயிரிழந்தோரின் எண்ணிக்கை 173ஆக இருந்த சூழலில், தற்போது அதன் எண்ணிக்கை 435ஆக அதிகரித்துள்ளது.
இந்நிலையில், சென்னை ராஜீவ்காந்தி அரசுப் பொது மருத்துவமனையின் முதல்வர் ஜெயந்தி கரோனா பெருந்தொற்றால் பாதிக்கப்பட்டு, அவரது வீட்டில் தனிமைப்படுத்தப்பட்டுள்ளார். அதேபோல் ராஜீவ்காந்தி அரசுப் பொது மருத்துவமனையில் பணிபுரிந்த செவிலி ஒருவர் தொற்று ஏற்பட்டு சிகிச்சை பெற்றுவந்த நிலையில், இன்று சிகிச்சை பலனின்றி உயிரிழந்தார்.
இதுகுறித்து மக்கள் நல்வாழ்வுத் துறை வெளியிட்டுள்ள செய்திக்குறிப்பில், ”தமிழ்நாட்டில் 79 ஆய்வகங்களில் 18 ஆயிரத்து 782 நபர்களின் சளி மாதிரிகள் பரிசோதனைக்குட்படுத்தப்பட்டன. அதில் தமிழ்நாட்டில் இருந்த 1,941 நபர்களுக்கும், வெளிநாடுகள் மற்றும் வெளிமாநிலங்களிலிருந்து வந்த 33 நபர்களுக்கும் தொற்று கண்டறியப்பட்டுள்ளது. இதுவரை தமிழ்நாட்டில் 44 ஆயிரத்து 661 பேர் நோயினால் பாதிக்கப்பட்டுள்ளனர். அவர்களில் 19 ஆயிரத்து 676 நபர்கள் மருத்துவமனைகளில் சிகிச்சை பெற்று வருகின்றனர்.
மருத்துவமனையில் சிகிச்சை பெற்று வந்தவர்களில் இன்று மட்டும் 1,138 நபர்கள் குணமடைந்து வீட்டிற்கு அனுப்பி வைக்கப்பட்டுள்ளனர். இதுவரையில், 24 ஆயிரத்து 547 பேர் பூரண குணமடைந்து வீட்டிற்குச் சென்றுள்ளனர். சிகிச்சை பலனின்றி 38 பேர் இன்று இறந்துள்ளனர். இதனால் தமிழ்நாட்டின் இறப்பு எண்ணிக்கை 435ஆக உயர்ந்துள்ளது” என்று குறிப்பிடப்பட்டுள்ளது.
மாவட்ட வாரியாக கரோனா பாதிப்பு
| சென்னை | 31,896 பேர் |
| செங்கல்பட்டு | 2,882 பேர் |
| திருவள்ளூர் | 1,865 பேர் |
| காஞ்சிபுரம் | 709 பேர் |
| திருவண்ணாமலை | 671 பேர் |
| கடலூர் | 533 பேர் |
| திருநெல்வேலி | 464 பேர் |
| விழுப்புரம் | 437 பேர் |
| மதுரை | 426 பேர் |
| தூத்துக்குடி | 398 பேர் |
| அரியலூர் | 392 பேர் |
| கள்ளக்குறிச்சி | 344 பேர் |
| சேலம் | 229 பேர் |
| திண்டுக்கல் | 218 பேர் |
| ராணிப்பேட்டை | 197 பேர் |
| கோயம்புத்தூர் | 176 பேர் |
| விருதுநகர் | 170 பேர் |
| திருச்சிராப்பள்ளி | 163 பேர் |
| ராமநாதபுரம் | 158 பேர் |
| தஞ்சாவூர் | 155 பேர் |
| வேலூர் | 152 பேர் |
| தேனி | 146 பேர் |
| பெரம்பலூர் | 146 பேர் |
| தென்காசி | 134 பேர் |
| கன்னியாகுமரி | 122 பேர் |
| திருப்பூர் | 116பேர் |
| நாகப்பட்டினம் | 113 பேர் |
| திருவாரூர் | 128 பேர் |
| நாமக்கல் | 92 பேர் |
| கரூர் | 94 பேர் |
| சிவகங்கை | 90 பேர் |
| ஈரோடு | 73 பேர் |
| புதுக்கோட்டை | 51 பேர் |
| திருப்பத்தூர் | 47 பேர் |
| கிருஷ்ணகிரி | 39 பேர் |
| தருமபுரி | 27 பேர் |
| நீலகிரி மாவட்டம் | 14 பேர் |
மேலும், சர்வதேச விமானத்தில் வந்தவர்களில் 200 பேருக்கும், உள்நாட்டு விமானத்தில் வந்தவர்கள் 85 பேருக்கும், ரயில் மூலம் வந்தவர்கள் 309 பேருக்கும் கரோனா உறுதிசெய்யப்பட்டுள்ளது.
இதையும் படிங்க: ஊரடங்கை தளர்த்திய நாடுகளில் அதிகரித்துவரும் கோவிட்-19 பாதிப்பு!
