சென்னை சைதாப்பேட்டை மகளிர் கல்லூரி நிகழ்ச்சியில் கலந்துகொண்ட கல்லூரி மாணவிகளுக்கு 'காவலன் SOS' செயலியின் பயன்பாடு குறித்து சென்னை காவல்துறை ஆணையர் ஏ.கே. விஸ்வநாதன் விளக்கினார்.
இந்நிகழ்வில் அவர் பேசியதாவது, "பெண்கள் பாதுகாப்பிற்காக காவலன் SOS செயலி உருவாக்கப்பட்டுள்ளது. இந்தச் செயலியை பதிவிறக்கம் செய்துகொள்ளுங்கள். இருந்தாலும் இதனை பயன்படுத்த உங்களுக்கு வாய்ப்பே வரக்கூடாது என்பதை கடவுளை வேண்டி கேட்டுக் கொள்கிறேன். ஆனாலும் பாதுகாப்பிற்காக அது தேவை.
இந்தியாவிலேயே சென்னைதான் பெண்கள், குழந்தைகளுக்கும் பாதுகாப்பான நகரம். தேசிய குற்ற ஆவண காப்பகத்தின் புள்ளிவிவரத்தின் அடிப்படையில் பெண்களுக்கு எதிரான குற்றங்கள் மிகக் குறைவு என்பது எடுத்துரைக்கிறது.
காவலன் செயலி காவல்துறை கட்டுப்பாட்டு அறையுடன் இணைத்துள்ளோம். அந்தச் செயலியில் உங்களுடைய பெற்றோர் அல்லது உறவினர்களின் செல்போன் எண்ணை பதிவு செய்துகொள்ளலாம். பாதுகாப்பில்லாத சூழ்நிலையில் இருக்கும்போது அந்தச் செயலியில் SOS என்பதனை அழுத்தலாம்.
ஒரு சில விநாடிகளில் காவல் கட்டுப்பாட்டு அறையிலிருந்து போன் வரும். உதவி செய்வார்கள். அப்போது பேச வேண்டிய சூழ்நிலை இல்லாத பட்சத்தில் அதில் தானாகவே வீடியோ பதிவு செய்யப்படும்.
இதனோடு புதிய சிறப்பு தொலைபேசி எண்ணை அறிமுகப்படுத்தவுள்ளோம். அதன்மூலம் இந்தப் பகுதியில் பெண்களுக்கு பாதுகாப்பில்லை என்பதனை அந்தச் சிறப்பு தொலைபேசி எண்ணில் தெரிவிக்கலாம். தற்போதைய டிஜிட்டல் காலத்தில் ஃபேஸ்புக், வாட்ஸ்அப் மூலமாக முகம் தெரியாத நபர்களுடன் நெருக்கமாக பழகும் சூழ்நிலை ஏற்படுகிறது.
இதனால் ஏற்படும் பிரச்னைகளை தவிர்க்க முகம் தெரியாத நபர்களிடம் தனிப்பட்ட விவரங்களைப் பகிரக் கூடாது. சமூக வலைதளங்களை கவனமாகக் கையாள வேண்டும்" என்று எச்சரித்தார்.
இதைத் தொடர்ந்து சென்னை காவல் துறை ஆணையர் ஏ.கே. விஸ்வநாதன் செய்தியாளர்களிடம் கூறுகையில், "சென்னையில் பெண்களுக்குத் தேவையான அனைத்துவிதமான பாதுகாப்பும் வழங்கப்பட்டுவருகிறது.
விரைவில் சென்னையில் எந்தப் பகுதி பாதுகாப்பு குறைவு என்பதை பெண்கள் தெரிவிக்க சிறப்பு தொலைபேசி எண் அறிமுகப்படுத்தவுள்ளோம்" என்றார்.
இதையும் படிங்க: ஐஸ் ஸ்கேட்டிங் திருவிழாவில் சறுக்கி விளையாடும் மக்களின் க்யூட் புகைப்படங்கள்!
