சென்னை: கோவை கார் சிலிண்டர் குண்டு வெடிப்பில் 14 ஆவது நபராக முகமது அசாருதீன் (வயது37) என்பவரை என்.ஐ.ஏ. அதிகாரிகள் கைது செய்து பூவிருந்தவல்லி நீதிமன்றத்தில் ஆஜர்படுத்தி சிறையில் அடைத்தனர். மேலும் இந்த வழக்கு தொடர்பாக என்.ஐ.ஏ. அதிகாரிகள் தொடர்ந்து விசாரணை நடத்தி வருகின்றனர்.
கடந்த 2019 ஆம் ஆண்டு, சுமார் 200க்கும் மேற்பட்டோர் உயிரிழந்த இலங்கை தேவாலயத்தில் நடந்த குண்டு வெடிப்பில், முக்கிய குற்றவாளி ஒருவருடன் தொடர்பில் இருந்ததாக அசாருதீன் என்பவரை இந்தியாவின் என்.ஐ.ஏ அமைப்பினர் கைது செய்து கேரள மாநிலம் திருச்சூர் சிறையில் அடைத்தனர்.
மேலும், கடந்த ஆண்டு அக்டோபர் 23 ஆம் தேதி கோவை உக்கடம் கோட்டை ஈஸ்வரன் கோவில் முன்பு கார் குண்டு வெடிப்பு நிகழ்ந்தது. இதில் காரை ஓட்டி வந்த ஜமேஷா முபின் (வயது28) என்பவர் சம்பவ இடத்திலேயே உயிரிழந்தார். இந்த வழக்கை தேசிய புலனாய்வு முகமை (என்.ஐ.ஏ.) விசாரித்து வந்தது. இந்த குண்டு வெடிப்பு சம்பவம் தமிழகம் முழுவதும் பெரும் அதிர்வலைகளை ஏற்படுத்தியது.
சம்பவம் தொடர்பாக, என்.ஐ.ஏ. போலீசார் 11 பேரை கைது செய்தனர். அவர்களிடமிருந்து தடை செய்யப்பட்ட இயக்கங்களுக்கு ஆதரவான ஆவணங்கள், முக்கிய ஆதாரங்கள், லேப்டாப் உள்ளிட்டவைகளை கைப்பற்றப்பட்டதாக போலீசார் தெரிவித்தனர். இந்த வழக்கில் முகமது இர்தியாஸ் என்பவரை 13 வது நபராக என்.ஐ.ஏ. போலீசார் கைது செய்த நிலையில், சம்பவத்தின் போது உயிரிழந்த நபருடன் சேர்த்து 13 பேர் மீது குற்றம் சாட்டப்பட்டது.
அதனைத் தொடர்ந்து, போலீசார் நடத்திய விசாரணையில், கோவை சம்பவம் தொடர்பாக 13 நபர்கள் கைது செய்யப்பட்டுள்ள நிலையில், அதில் கைது செய்யப்பட்ட இஸ்மாயில் என்ற நபர், கோவை கார் குண்டுவெடிப்புக்கு முன்பாக கேரள மாநிலம் சென்று சிறையில் இருந்த முகமது அசாருதீனை சந்தித்து வந்தது விசாரணையில் தெரியவந்துள்ளது.
இந்நிலையில், கோவை குண்டு வெடிப்பு வழக்கில் தொடர்புடையதாக 14 வது நபராக கேரளா மாநிலம், திருச்சூர் சிறையில் உள்ள முகமது அசாருதீனை என்.ஐ.ஏ. போலீசார் கைது செய்து நேற்று (செப்டம்பர் 1) பூந்தமல்லியில் உள்ள தேசிய புலனாய்வு சிறப்பு நீதிமன்றத்தில், நீதிபதி இளவழகன் முன்பு ஆஜர்படுத்தினர்.
மேலும், வழக்கை விசாரித்த நீதிபதி, முகமது அசாருதீனை புழல் சிறையில் அடைக்க உத்தரவிட்ட நிலையில், பலத்த போலீஸ் பாதுகாப்புடன் முகமது அசாருதீன் புழல் சிறைக்கு அழைத்து செல்லப்பட்டார். கோவை கார் சிலிண்டர் வெடி வழக்கில் இதுவரை 14 பேர் கைது செய்யப்பட்டு இருப்பது குறிப்பிடத்தக்கது.
அதனைத் தொடர்ந்து, ஐ.எஸ் பயங்கரவாத அமைப்பைச் சேர்ந்த வேறு யாருக்கெல்லாம் இந்த கோவை கார் குண்டுவெடிப்பில் தொடர்பு இருக்கிறது என்பது குறித்து அடுத்த கட்டமாக என்.ஐ.ஏ அதிகாரிகள் விசாரணை நடத்த உள்ளதாக தகவல் வெளியாகி உள்ளது.
இதையும் படிங்க: உலக தேங்காய் தினம்: தேங்காயை இப்படித்தான் பயன்படுத்த வேண்டுமா?
