சென்னை: முதுகெலும்பு தசை செயலிழப்பு சிகிச்சைக்கான உயிர் காக்கும் மருந்துகளை வெளிநாடுகளில் இருந்து இறக்குமதி செய்யும்போது விதிக்கப்படும் சுங்கவரி, ஒருங்கிணைந்த ஜிஎஸ்டி மற்றும் இதர வரிகளுக்கு விலக்கு அளிக்கத் தேவையான நடவடிக்கைகளை மேற்கொள்ளவும், இது குறித்து நிதி அமைச்சகத்திற்கு உரிய அறிவுறுத்தல்களை வழங்கிடக் கோரி, ஒன்றிய நிதி அமைச்சர் நிர்மலா சீதாராமனுக்கு முதலமைச்சர் ஸ்டாலின் இன்று கடிதம் மூலம் கோரிக்கை வைத்துள்ளார்.
எஸ்.எம்.ஏ அரிய வகை நோய்
இது குறித்து அவர் எழுதியுள்ள கடிதத்தில், முதுகெலும்பு தசைக் குறைபாடு (எஸ்.எம்.ஏ) ஒரு அரிய நோயாகும். இது நரம்பு செல்களை செயலிழக்கச் செய்கிறது. இது மூளையில் இருந்து தசைகளுக்கு மின் சமிக்ஞைகளைக் கொண்டு செல்கிறது.
இந்த நோயால் பாதிக்கப்பட்ட குழந்தைகளுக்கு, இரண்டு வயதை எட்டுவதற்கு முன்பு மரபணு சிகிச்சை அளிக்கப்பட வேண்டும். மரபணு சிகிச்சை அளிக்கத் தேவையான மருந்தின் விலை ஒரு நபருக்கு ரூ.16 கோடிக்கு மேல் செலவாகும் என்று அறியப்படுகிறது. இந்த மருந்துகள் மருத்துவமனை மூலமாக இறக்குமதி செய்யப்படுகின்றன.
ஜிஎஸ்டி- சிகிச்சை செலவு அதிகரிக்கும்
தமிழ்நாட்டில், இந்த நோயால் ஆண்டுக்கு 90-100 நபர்கள் பாதிப்புக்குள்ளாகின்றனர். ஒற்றை டோஸ் சிகிச்சை (சோல்ஜென்ஸ்மா), பல டோஸ் சிகிச்சை (ஸ்பின்ராசா) மரபணு சிகிச்சை அல்லது ரிஸ்டிப்லாம் வாய்வழி சிரப் ஆகிய மருந்துகள் விலை உயர்ந்தவை.
இந்த அரிய நோயால் பாதிக்கப்பட்ட குழந்தைகளின் பெற்றோர்கள் சிகிச்சை செலவை சந்திப்பது கடினம். இந்த மருந்துகள் இறக்குமதி செய்யப்படுவதால் சுங்க வரி, ஒருங்கிணைந்த ஜிஎஸ்டி மருந்துகளுக்கு விதிக்கப்படுவதால் சிகிச்சை செலவு மேலும் அதிகரிக்கும்.
வரி விலக்கு அளிக்க கோரிக்கை
சமீபத்தில், எஸ்.எம்.ஏ நோயால் பாதிக்கப்பட்ட ஒரு குழந்தைக்கு மருந்து இறக்குமதி செய்ததற்கான வரியை ஒன்றிய அரசு தள்ளுபடி செய்தது.
எனவே, முதுகெலும்பு தசைநார் நோய்க்கு சிகிச்சையளிப்பதற்கான மருந்துகளுக்கு சுங்க வரி, ஒருங்கிணைந்த ஜிஎஸ்டி என எந்தவொரு வரிகளும் விதிக்கக்கூடாது. வரி விலக்கு அளிக்க தேவையான நடவடிக்கைகளை மேற்கொள்ளவும், இது குறித்து நிதி அமைச்சகத்திற்கு உரிய அறிவுறுத்தல்களை வழங்குமாறும் கேட்டுக்கொள்கிறேன்" என்று கூறியுள்ளார்.
இதையும் படிங்க: பிரதமர் மோடிக்கு முதலமைச்சர் கடிதம்!
