11ஆம் வகுப்பு பயிலும் மாணவ மாணவிகளுக்கு 214 கோடியே 79 லட்சம் ரூபாய் செலவில் 5 லட்சத்து 45 ஆயிரத்து 166 விலையில்லா மிதிவண்டிகள் வழங்கும் திட்டத்தை சென்னை தலைமை செயலகத்தில் முதலமைச்சர் பழனிசாமி தொடங்கிவைத்தார்.
இந்நிகழ்ச்சியில் துணை முதலமைச்சர் ஓ.பன்னீர்செல்வம், அமைச்சர்கள் செங்கோட்டையன், ஜெயக்குமார், வளர்மதி, ராஜலட்சுமி , தலைமைச் செயலாளர் சண்முகம் உள்ளிட்ட பலரும் கலந்துகொண்டனர்.
தமிழ்நாட்டில் பெண் கல்வியை ஊக்குவிக்கும் நோக்கில், பள்ளிகளில் 11ஆம் வகுப்பு பயிலும் ஆதிதிராவிடர், பழங்குடியினர் வகுப்பை சேர்ந்த மாணவிகள் அனைவருக்கும் விலையில்லா மிதிவண்டிகள் வழங்கும் திட்டத்தை கடந்த 2001-02ஆம் கல்வியாண்டில் முதலமைச்சர் ஜெயலலிதா தொடங்கிவைத்தார்.
பின்னர் 2005-06ம் ஆண்டு முதல் அரசு மற்றும் அரசு உதவி பெறும் பள்ளிகள், பகுதியாக அரசு நிதியுதவி பெறும் பள்ளிகளில் 11ஆம் வகுப்பு பயிலும் அனைத்து பிரிவு மாணவ மாணவிகளுக்கும் இத்திட்டத்தின் கீழ் மிதிவண்டிகள் வழங்கப்பட்டு வருகிறது.
அந்த வகையில் இந்த ஆண்டு, 2 லட்சத்து 38 ஆயிரத்து 456 மாணவர்கள், 3 லட்சத்து 6 ஆயிரத்து 710 மாணவிகளுக்கு என மொத்தம் 5 லட்சத்து 45 ஆயிரத்து 166 மாணவ மாணவிகளுக்கு வழங்கப்பட உள்ளது குறிப்பிடத்தக்கது.
இதையும் படிங்க: சின்னத்திரை நடிகை சித்ராவின் உடற்கூராய்வு தொடங்கியது
