சென்னை வளசரவாக்கம் வேலன் நகரைச் சேர்ந்தவர் தாரகேஸ்வரி (54). இவரின் கணவர் 15 வருடங்களுக்கு முன்பு இறந்துவிட்டதால் இலங்கையிலிருந்து தன் தாய், மூன்று குழந்தைகளுடன் வந்து சென்னையில் குடியேறினார்.
இந்தநிலையில் இலங்கையில் வசித்துவரும் தாரகேஸ்வரியின் சகோதரர் குகதாசன் (54), வருடந்தோறும் சபரிமலைக்குச் சென்றுவிட்டு தனது சகோதரி வீட்டில் வந்து ஒரு மாதம் தங்கி செல்வது வழக்கம். அதேபோல் இந்த வருடமும் வந்து தங்கியிருந்த நிலையில், வீட்டில் தான் வைத்திருந்த மது பாட்டிலை காணவில்லை என்று குடும்ப உறுப்பினர்களிடம் வாக்குவாதத்தில் ஈடுப்பட்டுள்ளார்.
பின்னர் உச்சபட்ச கோபமடைந்த குகதாசன், வீட்டில் இருந்த கத்தியினை எடுத்து தனது அக்கா தாரகேஸ்வரியை சரமாரியாகக் குத்தியுள்ளார். இதனைத் தடுக்க முயன்ற தாய் வேதநாயகி மற்றும் தாரகேஸ்வரியின் மகன் ஆதிசேஷன் என்பவரையும் கத்தியால் குத்தியுள்ளார். இவர்கள் அனைவரும் கூச்சலிடும் சத்தத்தினைக் கேட்ட அக்கம் பக்கத்தினர் இருவரையும் குகதாசனிடம் இருந்து மீட்டனர்.
