'லிப்ட் கொடுத்து' பணத்தை அபேஸ் செய்த பலே திருடன் !

சென்னை: கீழ்ப்பாக்கத்தில் முதியவரை வீட்டில் இறக்கிவிடுகிறேன் என்று பைக்கில் ஏற்றி அடையாளம் தெரியாத நபர் பணத்தை கொள்ளையடித்த சம்பவம் அதிர்ச்சியை ஏற்படுத்தியுள்ளது.

சென்னை கீழ்ப்பாக்கம் தியாகப்பா தெருவை சேர்ந்தவர் சதாசிவம்(95). இவர் மீன்வளத் துறையில் சூப்பிரண்டாக பணியாற்றி ஓய்வு பெற்றவர். இவர் கீழ்ப்பாக்கம் நியூ ஆவடி சாலையில் உள்ள இந்தியன் வங்கியில் 20 ஆயிரம் ரூபாய் பணத்தை பெற்றுள்ளார். பின்னர், வங்கியிலிருந்து வெளியே நடந்த வந்த மூதியவரை இருசக்கர வாகனத்தில் வந்த அடையாளம் தெரியாத நபர் பேச்சுக்கொடுத்து உங்கள் வீட்டு வழியாகத்தான் செல்கிறேன் வாருங்கள் இறக்கிவிடுகிறேன் என்று பைக்கில் ஏற்றியுள்ளார்.

அவரை நம்பி பைக்கில் முதியவர் ஏறியதும் பையை கொடுங்கள் முன்னாடி மாட்டிவைத்துக் கொள்கிறேன் என்று வாங்கி மாட்டியுள்ளார். அதன்பின்னர், முதியவரை வீட்டின் அருகே இறக்கிவிட்டுவிட்டு பையை கொடுத்துள்ளார்.

இதை தொடர்ந்து, வீட்டிற்குள் சென்ற முதியவர் பையில் பணம் இல்லாததை கண்டு அதிர்ச்சி அடைந்தார். இதுதொடர்பாக உடனடியாக காவல் நிலையத்தில் புகார் அளிக்கப்பட்டது. இந்த புகாரின் பேரில், காவல் துறையினர் வங்கியிலிருந்த சிசிடிவி கேமரா காட்சிகளை ஆய்வு செய்து விசாரணை மேற்கொண்டுவருகின்றனர்.

இதையும் படிங்க: சுகாதாரத் துறை திடீர் ஆய்வு - பிளாஸ்டிக் பைகள் பறிமுதல்!