சென்னை மாநகராட்சியில் கரோனா தடுப்பூசியை முன்கள பணியாளர்களுக்கு வழங்குவதை தீவிர படுத்துவதற்கான கூட்டம் பெருநகர மாநகராட்சி ஆணையர் பிரகாஷ் தலைமையில் இன்று (பிப்:12)நடைபெற்றது.
இதையடுத்து செய்தியாளர்களை சந்தித்து பேசிய அவர், ”இதுவரை சென்னையில் 33 ஆயிரம் பேருக்கு கரோனா தடுப்பூசி போடப்பட்டுள்ளது. அவர்களுக்கு எந்தவித பக்கவிளைவும் ஏற்படவில்லை. முன்கள பணியாளர்களான காவல்துறையினர், உள்ளாட்சி அமைப்பினர் அங்கன்வாடி பணியாளர்கள் ஆகியோருக்கு ஒரு வாரத்திற்குள் தடுப்பூசி போட்டு முடிக்க திட்டமிடப்பட்டுள்ளது. முதல் தவணை தடுப்பூசி போட்டுக் கொண்டவர்களுக்கு நாளை முதல் இரண்டாவது தவணை தடுப்பூசி போடப்படும். சென்னையில் தேவையான அளவு தடுப்பூசி கையிருப்பில் உள்ளது. தினமும் 10 ஆயிரம் தடுப்பூசிகளை போடுவதற்கு நடவடிக்கை எடுக்கப்பட்டு வருகிறது.
அதைத்தொடர்ந்து 50 வயதிற்கு மேற்பட்டவர்கள், இணை நோயுள்ளவர்கள், அரசு ஊழியர்கள் உள்ளிட்டவர்களுக்கு தடுப்பூசி போடப்படும். தடுப்பூசி போடுவதற்கு பதிவு செய்து அனைவரும் அவர்களுக்கு ஒதுக்கப்படும் நேரத்தில் தவறாமல் போட்டுக் கொள்ள வேண்டும்.
சென்னையில் உள்ள 200 வார்டுகளிலும் வார்டிற்கு ஒரு மினி கிளினிக் தொடங்க அரசு உத்தரவிட்டுள்ளது. தற்பொழுது 120 மினி கிளினிக் தொடங்கப்பட்டுள்ளது. இந்த வாரம் 50 மினி கிளினிக் தொடங்கப்படும். அனைத்து வார்டுகளிலும் இம்மாத இறுதிக்குள் மினி கிளினிக் திறக்கப்படும். மினி கிளினிக்கில் பணியாற்றும் மருத்துவர்கள், செவிலியர்கள், சுகாதாரப் பணியாளர்கள் அனைவரும் அவுட்சோர்சிங் முறையில் தேர்வு செய்ய வேண்டும் என சுகாதாரத் துறை அறிவுறுத்தியுள்ளது.
தமிழ்நாடு முழுவதும் இதே நடைமுறைதான் பின்பற்றப்படுகிறது. எனவே இவர்கள் யாரும் பணி நிரந்தரம் செய்யப்பட மாட்டார்கள்.வைரஸ் நோய் தொற்று குறைந்துவிட்டது எனக்கருதி தடுப்பூசி போட தயக்கம் காட்டுகின்றனர். போலியோ இல்லாவிட்டாலும் சொட்டு மருந்து போட்டுக் கொள்வது போல் அனைவரும் தடுப்பூசி போட்டுக்கொள்ள வேண்டும். அப்போது தான் முழுமையாக கரோனா வைரஸ் தொற்றை ஒழிக்க முடியும்” என தெரிவித்தார்.
இதையும் படிங்க:
முதலமைச்சர் மட்டும்தான் வெற்றிநடை போடுகிறார் - கனிமொழி எம்.பி.
