சென்னை: சென்னை மாநகராட்சியில் 2016ஆம் ஆண்டுக்குப் பிறகு நகர்ப்புற உள்ளாட்சித் தேர்தல் நடைபெறாமல் இருந்ததால், ஆறு ஆண்டுகளாக மாநகராட்சி ஆணையர் மற்றும் துணை ஆணையர்கள் மாநகராட்சி பட்ஜெட்டை மறைமுகமாகவே வெளியிட்டு வந்தனர்.
கடந்த ஆண்டு மாநகராட்சி தேர்தலில் வெற்றி பெற்று, திமுகவைச் சேர்ந்த பிரியா ராஜன் சென்னை மேயராக பதவி ஏற்றுக்கொண்டார். மேயர் பிரியா பதவியேற்ற பின்னர், ஆறு ஆண்டுகள் கழித்து கடந்த ஆண்டு சென்னை மாநகராட்சி பட்ஜெட் தாக்கல் செய்யப்பட்டது. 2022-2023ஆம் ஆண்டுக்கான பட்ஜெட், குறைந்த வயதுடைய மேயரான பிரியா தலைமையில் தாக்கல் செய்யப்பட்டது.
இந்த நிலையில் 2023-2024ஆம் ஆண்டுக்கான பட்ஜெட் வரும் 27ஆம் தேதி தாக்கல் செய்யப்படவுள்ளது. பட்ஜெட் கூட்டம் காலை 10 மணிக்கு மாநகராட்சி மாமன்றக் கூட்டத்தில் நடைபெற உள்ளது. இந்த ஆண்டுக்கான வரவு செலவு திட்ட கணக்கையும், கடந்தாண்டு வரவு செலவு கணக்கையும் மேயர் பிரியா முன்னிலையில், வரிவிதிப்பு மற்றும் நிதிக்குழுத் தலைவர் சர்பஜெயாதாஸ் தாக்கல் செய்ய உள்ளார்.
தொடர்ந்து வரும் 28ஆம் தேதி பட்ஜெட் மீதான விவாதம் நடைபெறும் எனவும், கூட்டத்தின் இறுதியில் 2023-2024ஆம் ஆண்டிற்கான வரவு-செலவு திட்டத்திற்கான ஒப்புதல் அளிக்கப்படும் எனவும்; மாநகராட்சி நிர்வாகம் தகவல் தெரிவித்துள்ளது. இந்த பட்ஜெட்டில் புதிய நலத்திட்டங்கள் இருக்கும் என சென்னை மாநகர மக்கள் மத்தியில் எதிர்ப்பார்ப்புகள் உள்ளன.
இந்த பட்ஜெட்டில் குறிப்பாக மழைநீர் வடிகால் அமைத்தல், பாலம் அமைத்தல் உள்ளிட்ட முக்கியத் திட்டங்களுக்கு நிதி ஒதுக்கப்படும் என எதிர்பார்க்கப்படுகிறது. முன்னதாக இன்று 2023 -24ஆம் ஆண்டிற்கான தமிழக பட்ஜெட் தாக்கல் செய்யப்பட்டது. சட்டப்பேரவையில் நிதியமைச்சர் பிடிஆர் பழனிவேல் தியாகராஜன் பட்ஜெட்டை தாக்கல் செய்து உரையாற்றினார்.
தமிழக பட்ஜெட்டில், சென்னை நகரில் அதிநவீன விளையாட்டு நகரம், அடையாறு - கூவம் நீர்வழிப்பாதைகள் மறுசீரமைப்பு, அண்ணா சாலையில் நான்கு வழி மேம்பாலம் உள்ளிட்ட திட்டங்கள் செயல்படுத்தப்படும் என அறிவிக்கப்பட்டுள்ளது. இதில் குறிப்பாக 621 கோடி ரூபாய் மதிப்பீட்டில் தேனாம்பேட்டை முதல் சைதாப்பேட்டை வரை அண்ணா சாலையில் நான்கு வழி மேம்பாலம் கட்டப்பட இருக்கிறது.
பன்னாட்டுப் பொறியியல் நிபுணர்களின் ஆலோசனைப் பெற்று, சென்னை மெட்ரோ ரயில் சுரங்கப் பாதைக்கு மேல் கட்டப்படவுள்ள இந்த மேம்பாலம் ஒரு நவீன பொறியியல் சாதனையாக அமையும் என நிதியமைச்சர் தெரிவித்தார்.
இதையும் படிங்க: 6 ஆண்டுகளுக்கு பிறகு சென்னை மாநகராட்சி பட்ஜெட்
