போதையில் கார் ஓட்டுநரை தாக்கிய எஸ்.ஐ மீது வழக்குப்பதிவு

சென்னையில் ஓலா கார் ஓட்டுநரை குடிபோதையில் தாக்கிய உதவி ஆய்வாளர் மீது காவல் துறையினர் வழக்குப்பதிவு செய்துள்ளனர்.

சென்னை: விருதுநகர் மாவட்டத்தைச் சேர்ந்தவர் மயில்முருகன் (28). இவர் ஓலா (OLA) கார் ஓட்டி வருகிறார். நேற்று (ஜூலை 22) மாலை சவாரியை இறக்கிவிட்டு, எழும்பூர் ஆல்பர்ட் தியேட்டர் அருகே காரை நிறுத்திவிட்டு நின்று கொண்டிருந்தார்.

ஓட்டுநரை தாக்கிய உதவி ஆய்வாளர்

அப்போது அங்கு ரோந்து வாகனத்தில் வந்த உதவி ஆய்வாளர் ரகு (59), மயில்முருகனிடம் இங்கு காரில் நிற்கக்கூடாது, காரை எடுத்துவிட்டு செல்லுமாறு கூறியுள்ளார்.

இதனால் மயில்முருகனுக்கும், உதவி ஆய்வாளருக்கும் இடையே வாக்குவாதம் ஏற்பட்டது. இந்த வாக்குவாதத்தில் திடீரென மயில்முருகனை உதவி ஆய்வாளர் தாக்கினார்.

இதில் காயமடைந்த மயில்முருகன் ராஜிவ் காந்தி அரசு மருத்துவமனையில் சிகிச்சை பெற்றார். பின்னர், எழும்பூர் உதவி ஆய்வாளர் ரகு, குடிபோதையில் தன்னை தாக்கியதாக கூறி எழும்பூர் காவல் நிலையத்தில் புகார் அளித்தார்.