கரோனா பாதிப்பு காரணமாக, தமிழ்நாடு முழுவதும் தளர்வுகளுடன் கூடிய ஊரடங்கு உத்தரவு பிறப்பிக்கப்பட்டுள்ளது. இதன் காரணமாக, ஆட்டோ ஓட்டுநர்கள் ஐந்து மாதங்களாக வேலையின்றி தவித்து விருகின்றனர். இந்நிலையில், இன்று (ஆக.18) ஆட்டோ ஓட்டுநர்களின் வாழ்வாதாரத்தைப் பாதுகாக்கக் கோரி அனைத்து ஆட்டோ தொழிற்சங்க கூட்டமைப்பு சார்பில் அதன் ஒருங்கிணைப்பாளர் பாலசுப்பிரமணியம் தலைமையில் தொழிலாளர் நலத்துறை ஆணையரிடம் கோரிக்கை மனு அளிக்கப்பட்டுள்ளது.
அந்த மனுவில், "நலவாரியம் மூலம் ஆட்டோ ஓட்டுநர்களுக்கு மாதம் 7,500 ரூபாய் நிவாரண தொகை வழங்க வேண்டும். நிகழாண்டு(2020) மார்ச் முதல் ஆட்டோ எப்சி, பர்மிட், இன்சுரன்ஸ், ஓட்டுநர் உரிமம் ஆகியவற்றுக்கு அவகாசம் வழங்க வேண்டும். பெட்ரோல், டீசல், கேஸ் விலை உயர்வை ரத்து செய்ய வேண்டும்.
ஆட்டோ தொழிலாளர்களிடம் கட்டாய கடன் வசூல் செய்யும் தனியார் வங்கிகள், பைனான்ஸ் நிறுவனங்கள் மீது நடவடிக்கை எடுக்க வேண்டும். நலவாரியத்தில் உறுப்பினராவதற்கு வருவாய்த்துறை ஆய்வாளர் அல்லது கிராம நிர்வாக அலுவலரின் சான்று கேட்கும் நடைமுறையை கைவிட வேண்டும். கூட்டுறவு வங்கிகள் மூலமாக தொழிலாளர்களுக்கு ஒரு லட்சம் கடன் வழங்க வேண்டும்.
ஊரடங்கு காலத்தில் ஆட்டோ ஓட்டுநர்கள் மீது பதியப்பட்ட வழக்குகளை வாபஸ் பெற வேண்டும். தற்கொலை செய்து கொண்டு ஆட்டோ தொழிலாளர்களின் குடும்பத்திற்கு, 10 லட்சம் இழப்பீடு வழங்க வேண்டும்" என குறிப்பிடப்பட்டிருந்தது.
இது குறித்து ஆட்டோ ஓட்டுநர்கள் கூறுகையில், "நலவாரியம் மூலம் கொடுக்கப்பட வேண்டிய இறப்பு நிதி, கடந்த ஐந்து மாதங்களாக வழங்கப்படவில்லை. ஆட்டோ தொழிலாளர்கள் வாரிய புதுப்பித்தலும் கடந்த 5 மாதங்களாக நடைபெறவில்லை. பேரிடர் காலத்தில் ஆட்டோ ஓட்டுனர்களுக்கு அரசு அறிவித்த நிவாரண தொகை வெறும் 5 விழுக்காடு நபர்களுக்கு மட்டுமே கிடைத்துள்ளது" என வேதனையோடு தெரிவித்தனர்.
இதையும் படிங்க: நிவாரணம் வழங்காததை கண்டித்து ஆட்டோ ஓட்டுநர்கள் ஆர்ப்பாட்டம்!
