'அமைதியான ரயில் நிலையம்' செயல்முறை ரத்து - தெற்கு ரயில்வே!

சென்னை சென்ட்ரல் ரயில் நிலையம், அமைதியான ரயில் நிலையமாக அறிவிக்கப்பட்டிருந்த நிலையில், அதனை இன்று முதல் ரத்து செய்வதாகவும், இனி பழையபடி ஒலிபெருக்கி முறை பின்பற்றப்படும் என்றும் தெற்கு ரயில்வே தெரிவித்துள்ளது.

சென்னை: சென்னை எம்ஜிஆர் சென்ட்ரல் ரயில் நிலையம் 150 ஆண்டுகள் பழமையானது. நாட்டின் முக்கியமான ரயில் நிலையங்களில் ஒன்றாகத் திகழும் சென்ட்ரல் ரயில் நிலையம், தெற்கு ரயில்வேயின் கட்டுப்பாட்டில் இயங்கி வருகிறது. சென்ட்ரல் ரயில் நிலையத்திலிருந்து கர்நாடகா, ஆந்திரா, கேரளா உள்ளிட்டப் பல்வேறு மாநிலங்களுக்கும், தமிழ்நாட்டின் பல்வேறு மாவட்டங்களுக்கும் ரயில்கள் இயக்கப்படுகின்றன.

தினமும் இருநூறுக்கும் மேற்பட்ட ரயில்களை இந்த ரயில் நிலையம் கையாள்கிறது. இதன் மூலம் நாள் ஒன்றுக்கு சராசரியாக ஐந்து லட்சம் பேர் பயணம் செய்கின்றனர். இதனால் சென்ட்ரல் ரயில் நிலையம் எப்போதும் பரபரப்பாக காணப்படும். இந்தச் சூழலில் 'அமைதியான ரயில் நிலையம்' என்ற திட்டத்தின்கீழ், கடந்த மாதம் சென்ட்ரல் ரயில் நிலையம் அமைதியான ரயில் நிலையம் என்று அறிவிக்கப்பட்டது. அதன்படி, ஒலிபெருக்கியில் தகவல் தெரிவிப்பது நிறுத்தப்பட்டு, டிஜிட்டல் திரையில் ரயில்கள் வருகை மற்றும் புறப்பாடு தெரிவிக்கப்பட்டது.

ரயில் எண், ரயில்கள் வரும் நேரம், சேரும் இடம், நடைமேடை எண் போன்ற தகவல்களும் டிஜிட்டல் திரையில் ஒளிபரப்பப்பட்டது. சென்னையில் பல மொழி பேசும் மக்கள் வசித்து வருவதால், தமிழ், ஆங்கிலம், இந்தி ஆகிய மொழிகளில் தகவல்கள் தெரிவிக்கும் விதமாக டிஜிட்டல் திரை அமைக்கப்பட்டது.

விமான நிலையங்களில் பின்பற்றப்படுவது போல ரயில் நிலையங்களிலும் ரயிலின் தகவல்கள் நிமிடத்திற்கு நிமிடம் தெரிவிக்கப்பட்டது. மேலும், சென்ட்ரல் ரயில் நிலையத்தில் உள்ள எம்டிசி பேருந்து நிறுத்தம், வால்டாக்ஸ் சாலை, புறநகர் முனையம் ஆகிய மூன்று நுழைவுவாயில்களிலும், இந்த டிஜிட்டல் திரை வைக்கப்பட்டிருந்தது. புறநகர் ரயில்களுக்கு வழக்கம் போல ஒலிபெருக்கி அறிவிப்புகள் தொடர்ந்து அளிக்கப்படும் எனவும், வெளியூர் செல்லும் ரயில்களுக்கு மட்டுமே இம்முறை அறிமுகப்படுத்தப்பட்டுள்ளது எனவும் தெற்கு ரயில்வே தெரிவித்திருந்தது.

விளம்பரங்களும் இனிமேல் ஒலிபெருக்கியில் இடம்பெறாது எனவும், கண் பார்வையற்றோருக்கு பிரெய்லி மேப்கள், மாற்றுத்திறனாளிகளுக்கு உதவும் வகையில் க்யூஆர் கோடுகளை ஸ்கேன் செய்தால் தோன்றும் வீடியோவில் ரயில் குறித்த தகவல்கள் சைகை மொழியில் விளக்கப்படும் எனவும் தெரிவிக்கப்பட்டிருந்தது.

இந்த அறிவிப்பு முறை செயல்படுத்தப்பட்டதையடுத்து, சென்னை சென்ட்ரல் ரயில் நிலையம் மிகவும் அமைதியாக காணப்பட்டது. இதற்கு பல்வேறு தரப்பினரும் வரவேற்பு தெரிவித்தனர். ஆனால், இந்த டிஜிட்டல் திரை முறையை தங்களுக்கு மிகவும் கடினமாக உள்ளதாக மாற்றுத்திறனாளிகள் கருத்து தெரிவித்தனர்.

இந்த நிலையில், இந்த டிஜிட்டல் திரை முறை ரத்து செய்யப்பட்டு மீண்டும் ஒலிபெருக்கி முறை கொண்டுவரப்பட்டுள்ளதாக இன்று(மார்ச்.6) தெற்கு ரயில்வே தெரிவித்துள்ளது. இதனால், மாற்றுத்திறனாளிகள் மிகவும் மகிழ்ச்சி அடைந்துள்ளனர். மேலும் தங்களது கோரிக்கையை நிறைவேற்றிய தெற்கு ரயில்வேக்கு நன்றி தெரிவித்துள்ளனர்.

முன்னதாக 'அமைதியான ரயில் நிலையம்' என்ற முறையை கொண்டு வரும்போது, இது தற்காலிக செயல்முறை என்றும், மக்களின் வரவேற்பை பொறுத்தே, நிரந்தரமாக கொண்டு வருவது குறித்தும், மற்ற ரயில் நிலையங்களில் நடைமுறைப்படுத்துவது குறித்தும் முடிவெடுக்கப்படும் என்று தெற்கு ரயில்வே தெரிவித்திருந்தது குறிப்பிடத்தக்கது.