சென்னை: தமிழ்நாட்டில் உள்ள 163 அரசு கலை மற்றும் அறிவியல் கல்லூரிகளில் சேர்வதற்கு விண்ணப்பித்த மாணவர்களுக்கான தரவரிசைப் பட்டியலை நாளை வெளியிடுவதற்கு கல்லூரிக்கல்வி இயக்குநரகம் திட்டமிட்டுள்ளது. அரசுக்கல்லூரிக்கு விண்ணப்பம் செய்த மாணவர்களின் 12ஆம் வகுப்பு மதிப்பெண்கள் அடிப்படையில் வெளியிடப்படும் தரவரிசை பட்டியலைத்தாெடர்ந்து மாணவர்கள் சேர்க்கை நடத்தப்படும்.
இதுகுறித்து கல்லூரிக்கல்வி இயக்குநர் கூறும்போது, 'தமிழ்நாட்டில் உள்ள 163 அரசு கலை மற்றும் அறிவியல் கல்லூரிகளில் உள்ள இளநிலை பட்டப்படிப்பு முதலாமாண்டு மாணவர்கள் சேர்க்கைக்கான (2022-23) விண்ணப்பங்களை http://www.tngasa.in/ அல்லது http://www.tngasa.org/ என்ற இணையதள முகவரிகளில் ஜூன் 22ஆம் தேதி முதல் ஜூலை 27ஆம் தேதி வரையில் பதிவு செய்ய வசதிகள் ஏற்படுத்தித் தரப்பட்டன.
இணையதளம் மூலமாக விண்ணப்பிக்க முடியாத மாணவர்கள் கல்லூரி உதவி மையங்கள் மூலம் விண்ணப்பிக்க வசதி செய்யப்பட்டன. அனைத்து மையங்களிலும் கரோனா பாதுகாப்பு நடவடிக்கைகள் மேற்கொள்ளப்பட்டன.
மேலும் ஜூலை 27ஆம் தேதி இரவு 12 மணி வரையிலும் 4 லட்சத்து 7 ஆயிரத்து 45 மாணவர்கள் விண்ணப்பம் செய்துள்ளனர். அவர்களில் 3,34,765 மாணவர்கள் விண்ணப்பங்களைப் பதிவேற்றம் செய்துள்ளனர். 2,98,056 மாணவர்கள் விண்ணப்பக் கட்டணங்களை செலுத்தியுள்ளனர்.
மாணவர்கள் விருப்பம் தெரிவித்த கல்லூரிகளில் விண்ணப்பித்த மாணவர்களின் மதிப்பெண்கள் அடிப்படையில் தரவரிசைப் பட்டியல் தயார் செய்யப்பட்டு, அந்தந்த கல்லூரிகள் வெளியிடும்.
பி.ஏ. தமிழ் இலக்கியம், பி.லிட் போன்ற படிப்புகளுக்கான தமிழ் தரவரிசைப் பட்டியல், 12ஆம் வகுப்பில் பெற்ற தமிழ் மதிப்பெண்கள் அடிப்படையில் தயாரிக்கப்படும். கலை அறிவியல் கல்லூரிகளில் மாணவர்கள் சேர்வதற்கான தரவரிசைப் பட்டியால் நாளை வெளியிடப்படும்’ என கல்லூரிக்கல்வி இயக்குநர் தெரிவித்துள்ளார்.
இதையும் படிங்க:10 லட்சம் புதிய ரூபாய் நோட்டுக்களால் காட்சி தந்த ஊத்துக்காட்டு எல்லையம்மன்
