சென்னை வள்ளுவர் கோட்டத்தில் மத்திய பாஜக அரசைக் கண்டித்து, மார்க்சிஸ்ட் கம்யூனிஸ்ட் கட்சி, இந்திய கம்யூனிஸ்ட் கட்சி, விடுதலைச் சிறுத்தைகள் கட்சி, இந்திய கம்யூனிஸ்ட் கட்சி (எம் எல்) ஆகிய கட்சிகள் சார்பாக கண்டன ஆர்ப்பாட்டம் நடைபெற்றது.
இதில் சிபிஎம் மாநிலச் செயலாளர் கே.பாலகிருஷ்ணன், சிபிஐ மாநிலச் செயலாளர் முத்தரசன், விடுதலை சிறுத்தைகள் கட்சியின் தலைவர் திருமாவளவன், சிபிஐ(எம்.எல்.) மாநிலச் செயலாளர் நடராஜன் ஆகியோர் தலைமையில் ஆர்ப்பாட்டம் நடைபெற்றது.
ஆர்ப்பாட்டத்தின்போது செய்தியாளர்களைச் சந்தித்த சிபிஐ மாநிலச் செயலாளர் முத்தரசன், ’அண்டை நாடான இலங்கையில் எப்படி விலைவாசி உயர்ந்து உள்ளதோ அதே போன்று தான் இந்தியாவிலும் உயர்ந்துள்ளது. மோடி அரசின் நடவடிக்கைகளால் மக்கள் கடும் நெருக்கடிக்கு ஆளாகி உள்ளனர்.
அண்ணாமலை செங்கோட்டைக்குப் போகலாம்: மேலும் பெட்ரோல் , டீசல் விலையை மாநில அரசு குறைக்க வேண்டும். இல்லையெனில் அண்ணாமாலை கோட்டையை முற்றுகையிட போவதாக கூறுகிறார். என்னைப் பொறுத்தவரையில் அண்ணாமலை கோட்டைக்குப் போவதைவிட செங்கோட்டைக்கு போவது நல்லது. அதற்கான பாதையை தான் சொல்லத் தயார்’ கூறினார்.
அண்ணாமலை ஒரு அரைவேக்காடு: தொடர்ந்து பேசிய சிபிஎம் மாநிலச் செயலாளர் கே.பாலகிருஷ்ணன், ’அரசியல் பண்பில் அண்ணாமலை ஒரு அரைவேக்காடு’ என கடும் விமர்சனம் செய்தார். மேலும், ’நேற்று நடைபெற்ற அடிக்கல் நாட்டு விழாவில் முதலமைச்சர் ஸ்டாலின் வைத்த கோரிக்கைகளுக்கு பிரதமர் பேசாததற்கு வாய் திறக்காத அண்ணாமலை முதலமைச்சரை குறை சொல்வது சரி அல்ல’ என்று சாடினார். மேலும் அண்ணாமலையின் சிந்தனையில் கோளாறு ஏற்பட்டுள்ளது என்றும் தெரிவித்தார்.
முன்னதாக பேசிய விடுதலைச் சிறுத்தைகள் கட்சியினர் தலைவர் திருமாவளவன், ’மோடி அரசு எளிய மக்களுக்கு எதிரான அரசு. எண்ணெய் நிறுவனங்களுக்கு சாதகமாக செயல்படக் கூடிய அரசாக இருக்கிறது’ என்று விமர்சனம் செய்தார்.
இதையும் படிங்க: மு.க.ஸ்டாலினின் அரசியல் நாடகம்; தமிழ்நாடு சரித்திரத்தில் கரும்புள்ளி: அண்ணாமலை
