சென்னை விமான நிலையத்திற்கு கடத்தல் பொருட்கள் கொண்டு வரப்படுவதாக, விமான நிலைய சுங்கத்துறை அலுவலர்களுக்கு ரகசிய தகவல்கள் கிடைத்தன. இதையடுத்து சுங்கத்துறை அதிகாரிகள் தீவிரக் கண்காணிப்பில் இருந்தனர். அப்போது மலேசியாவிலிருந்து சென்னைக்கு வந்த விமானத்தில் பயணம் செய்த சென்னையைச் சேர்ந்த ஷேகு ஷரபாத் (32), சுங்கத்துறை அலுவலர்களின் கேள்விக்கு முன்னுக்குப்பின் முரணாகப் பேசியுள்ளார்.
பின்னர் அவரது உடைமைகளை சோதனை செய்ததில் எதுவும் இல்லாததால் தனியறைக்கு அழைத்துச் சென்று சோதனை செய்தனர். அப்போது, உள்ளாடைக்குள் தங்கத்தை மறைத்து வைத்திருந்ததைக் கண்டுபிடித்தனர். அவரிடமிருந்து ரூ. 27 லட்சம் மதிப்புள்ள 689 கிராம் தங்கத்தைக் கைப்பற்றினார்கள்.
அதேபோல், சார்ஜாவிலிருந்து வந்த விமானத்தில் பயணம் செய்த கேரள மாநிலம், மலபுரத்தைச் சேர்ந்த முகமது இஸ்ரத் (27), முகமது முஸ்தபா (28), முகமது யூனுஸ் (22) ஆகியோரை சந்தேகத்தின் பேரில் அலுவலர்கள் நிறுத்தி விசாரித்தனர். இவர்களும் உள்ளாடைக்குள் தங்கத்தை மறைத்து வைத்து கடத்தி வந்தது தெரிய வந்தது. இவர்களிடமிருந்து ரூ. 31 லட்சத்து 80 ஆயிரம் மதிப்புள்ள 810 கிராம் தங்கத்தை அதிகாரிகள் கைப்பற்றினார்கள்.
எனவே, விமான நிலையத்தில் நடத்தப்பட்ட சோதனையில் நான்கு பேரிடமிருந்து ரூ. 58 லட்சத்து 80 ஆயிரம் மதிப்புள்ள 1 கிலோ 599 கிராம் தங்கத்தை சுங்கத்துறை அதிகாரிகள் பறிமுதல் செய்துள்ளது குறிப்பிடத்தக்கது. மேலும், அவர்களைக் கைது செய்து தீவிர விசாரணை மேற்கொண்டு வருகின்றனர்.
இதையும் படிங்க: சாலையில் வழிந்தோடும் பாதாளச்சாக்கடை கழிவுநீர் - போராட்டத்தில் ஈடுபட்ட மக்கள்!
