அதிக வட்டி தருவதாக 360 கோடி மோசடி… ஹிஜாவு நிறுவனம் மீது வழக்குப்பதிவு

அதிக வட்டி தருவதாகக் கூறி பொதுமக்களிடம் 360 கோடி வசூல் செய்து மோசடி செய்த ஹிஜாவு நிறுவனம் மீது பொருளாதார குற்றப்பிரிவு போலீசார் வழக்குப்பதிவு செய்தனர்

சென்னை: தமிழகத்தில் கடந்த சில மாதங்களாக அதிக வட்டி தருவதாகக் கூறி பொதுமக்களிடம் பணத்தை வசூல் செய்து மோசடி செய்யும் நிறுவனங்கள் மீது பொருளாதார குற்றப்பிரிவு போலீசார் வழக்கு பதிவு செய்து கைது நடவடிக்கை மேற்கொண்டு வருகின்றனர். குறிப்பாக ஆருத்ரா கோல்ட் டிரேடிங் நிறுவனம், இன்டர்நேஷனல் பைனான்சியல் சர்வீஸ், எல்வின் போன்ற நிறுவனங்கள் பொதுமக்களிடம் கோடி ரூபாய் வசூல் செய்து மோசடி செய்த விவகாரத்தில் வழக்குப்பதிவு செய்யப்பட்டு விசாரணை நடைபெற்று வருகிறது.

இந்த நிறுவனங்கள் அனைத்தும் மாதம் அதிக வட்டி தருவதாகக் கூறி பொதுமக்களிடம் வசூல் செய்து கோடிக்கணக்கான ரூபாய் மோசடி செய்துள்ளது. இதன் தொடர்ச்சியாக ஹிஜாவு குழுமம் என்ற நிறுவனம் ஒரு லட்ச ரூபாய் முதலீடு செய்தால் மாதம் 15 ஆயிரம் ரூபாய் முதல் 20 ஆயிரம் ரூபாய் வட்டி தருவதாகக் கூறி, கடந்த நான்கு வருடத்திற்கு மேலாக சுமார் ஒரு லட்சம் பேரிடம் வசூல் செய்தது தெரியவந்துள்ளது. கடந்த ஏப்ரல் மாதத்தில் இருந்து பணத்தை முதலீடு செய்தவர்களுக்கு மாதம் கொடுக்க வேண்டிய வட்டி வராததால் முதலீட்டாளர்கள் அந்த நிறுவனத்தின் நிர்வாகிகள் மற்றும் உரிமையாளர்களை அணுகியுள்ளனர்.

குறிப்பாக இந்தக் குழுமத்தின் தலைவராக சௌந்தர்ராஜன், மற்றும் நிர்வாக இயக்குநர், அவரது மகன் அலெக்சாண்டர் மற்றும் பல நிர்வாகிகள் சேர்ந்து பொதுமக்களிடம் பணத்தை தமிழகம் முழுவதும் வசூல் செய்துள்ளனர். முதற்கட்டமாக வசூல் செய்யும் போது பணத்தைப் பெற்றவர்களிடம் 15% வட்டி தருவதாக ஆவணங்கள் கையெழுத்திட்டு கொடுத்துள்ளனர்.

ஹிஜாவு நிறுவனம் மீது வழக்குப்பதிவு

இந்த நிறுவனம் www.mypayhm.com என்ற இணையதளத்தின் மூலம் உறுப்பினர் எண் கொடுத்து, ஆன்லைன் மூலமாக உறுப்பினர்களையும், அவர்கள் கணக்குகளையும் கையாண்டு வந்துள்ளனர். இந்த இணையதளத்தின் மூலம் எவ்வளவு பணம் முதலீடு செய்யப்பட்டுள்ளது, மாதம் எவ்வளவு வட்டி வருகிறது உள்ளிட்ட தகவல்களை மட்டுமே தெரிந்து கொள்ள முடியும்.நிறுவனங்களில் பலர் முதலீடு செய்ய ஆரம்பித்தவுடன், பெரும்பாலானோர் நம்பிக்கையின் அடிப்படையிலேயே இந்த நிறுவனத்தில் பணத்தை முதலீடு செய்துள்ளனர். குறிப்பாக எண்ணெய் கிணறுகள் துபாய், சிங்கப்பூர், மலேசியா ஆகிய நாடுகளில் வைத்திருப்பதாகவும்; அதில் வசூல் செய்யப்பட்ட பணத்தை முதலீடு செய்து லாபம் பெறுவதாகவும் கூறி பொதுமக்களை ஏமாற்றியுள்ளதாகப் புகார் அளித்துள்ளனர்.கடந்த நவம்பர் 3ஆம் தேதி நூற்றுக்கணக்கான பேர் அசோக் நகரில் உள்ள பொருளாதார குற்றப்பிரிவில் ஒன்று சேர்ந்து புகார் அளித்தனர். இந்த புகாரின் அடிப்படையில் விசாரணை மேற்கொண்ட பொருளாதார குற்றப்பிரிவு போலீசார், ஹிஜாவு குழுமத்தின் தலைவர் சௌந்தர்ராஜன் மற்றும் அவரது மகன் அலெக்சாண்டர், நிறுவனத்தின் நிர்வாகிகள் உட்பட 21 பேர் மீது வழக்குப் பதிவு செய்துள்ளனர்.தற்போது வரை 1500 நபர்கள் புகார் அளித்ததன் அடிப்படையில் விசாரணையிலும் 360 கோடி ரூபாய் அளவிற்கு மோசடி செய்துள்ளதாக தெரியவந்துள்ளது. இருப்பினும் தொடர்ந்து நிறுவனத்தின் மீது புகார்கள் வந்த வண்ணம் இருப்பதாகவும் மோசடி செய்யப்பட்ட தொகையின் அளவு அதிகரிக்க வாய்ப்பு இருப்பதாக பொருளாதார குற்றப்பிரிவு அதிகாரிகள் தெரிவித்துள்ளனர்.

வாடிக்கையாளர்கள் அளித்தப் புகாரின் அடிப்படையில் இந்நிறுவனத்தின் ஏஜென்ட் நேரு என்பவரை பொருளாதார குற்றப்பிரிவு போலீசார் கைது செய்துள்ளனர். மேலும் தலைமறைவாக உள்ள மற்ற நிர்வாகிகளை பொருளாதார குற்றப்பிரிவு போலீசார் தேடி வருகின்றனர். இந்த நிறுவனம் செயல்பட்டு வந்த இடங்களிலும் நிர்வாகிகள் வீட்டிலும் விரைவில் பொருளாதார குற்றப்பிரிவு அதிகாரிகள் சோதனை மேற்கொள்ள உள்ளனர்.

சோதனையின் அடிப்படையில் கிடைக்கப்பெறும் ஆவணங்கள் அடிப்படையாக வைத்து மோசடி செய்யப்பட்ட பணத்தை எங்கு முதலீடு செய்யப்பட்டுள்ளது என்பதை கண்டறிய திட்டமிட்டுள்ளதாக பொருளாதார குற்றப்பிரிவு போலீசார் தெரிவித்துள்ளனர். இந்நிறுவனத்தில் பாதிக்கப்பட்ட பொதுமக்கள் hijaueowdsp@gmail.com என்ற இமெயில் மூலமாக புகார் அளிக்கலாம் என பொருளாதார குற்றப்பிரிவு போலீசார் தெரிவித்துள்ளனர்.

இதையும் படிங்க: 'திருடிய நகைகளை விற்று பலருக்கு உதவினேன்' - கொள்ளையனின் பகீர் வாக்குமூலம்