டிஎன்பிஎஸ்சி தேர்வு முறைகேடு: பத்திரப்பதிவுத்துறையில் 2 பேர் இடைநீக்கம்

சென்னை: குரூப்-2 ஏ தேர்வில் முறைகேடு செய்து பத்திரப்பதிவுத்துறையில் பணியாற்றிய இரண்டு பேர்  காவல்துறையால் கைது செய்யப்பட்டதினால் இடைநீக்கம் செய்யப்பட்டுள்ளனர்.

குரூப்-2 ஏ தேர்வு முறைகேடு குறித்து சிபிசிஐடி காவல்துறையிடம் தமிழ்நாடு அரசுத் தேர்வாணையத்தின் செயலாளர் கடந்த ஜனவரி 31ஆம் தேதி அளித்தப் புகாரில், முறைகேட்டில் ஈடுபட்டு 42 பேர் அரசுப் பணிகளில் உள்ளனர் எனக் கூறியிருந்தது.

அதனைத் தொடர்ந்து இதுசம்பந்தமாக விசாரணை மேற்கொண்ட சிபிசிஐடி அதிகாரிகள் பிப்ரவரி ஒன்றாம் தேதி காரைக்குடி மாவட்ட பதிவாளர் அலுவலகத்தில் உதவியாளராகப் பணிபுரிந்த வேல்முருகன், திருநெல்வேலி மாவட்டப் பதிவாளர் அலுவலகத்தில் உதவியாளராகப் பணிபுரிந்த ஜெயராணி ஆகியோரை கைது செய்தனர்.

அரசுப் பணியாளர் தேர்வு நடத்தை விதிமுறைகளின் அடிப்படையில், காவல்துறையால் கைது செய்யப்பட்டவர் 48 மணி நேரத்திற்கும் மேல் காவல்துறை பாதுகாப்பில் இருந்தால் அவர்களை இடைநீக்கம் செய்ய வேண்டும்.

அதன் அடிப்படையில் காரைக்குடி மாவட்ட பதிவாளர் அலுவலகத்தில் உதவியாளராகப் பணிபுரிந்த வேல்முருகன், திருநெல்வேலி மாவட்டப் பதிவாளர் அலுவலகத்தில் உதவியாளராகப் பணிபுரிந்த ஜெயராணி ஆகியோரை பத்திரப்பதிவுத் துறை தலைவர் ஜோதி நிர்மலா இன்று இடைநீக்கம் செய்யும் படி உத்தரவிட்டுள்ளார்.

இதனையடுத்து கைது செய்யப்பட்ட இருவரும் உடனடியாக இடைநீக்கம் செய்யப்பட்டனர். மேலும் தேர்வு முறைகேடு தொடர்பாக கைது செய்யப்பட்ட, மற்ற அரசுத்துறை பணியாளர்களையும் இடைநீக்கம் செய்வதற்கான சாத்தியக்கூறுகள் உள்ளதாக அரசுப் பணியாளர் தேர்வாணையம் தகவலளித்துள்ளது.

இதையும் படிங்க: ‘டிஎன்பிஎஸ்சி முறைகேட்டிற்குப் பொறுப்பேற்று ஜெயக்குமார் பதவி விலக வேண்டும்’