சென்னை நுங்கம்பாக்கத்திலுள்ள பெண்கள் தனியார் கல்லூரியில், சைபர் குற்றங்களைத் தடுப்பது குறித்த விழிப்புணர்வு நிகழ்ச்சி நடைபெற்றது. இந்நிகழ்ச்சியில் பெண்கள் மற்றும் குழந்தைகளுக்கு எதிரான குற்றத் தடுப்புப் பிரிவு துணை ஆணையர் ஜெயலட்சுமி பங்கேற்று, சைபர் குற்றங்களைத் தடுப்பது குறித்து கல்லூரி மாணவிகளிடம் உரையாற்றினார்.
பின்னர் செய்தியாளர்களிடம் பேசிய அவர், ' பெண்கள் சமூக வலைதளங்களில் அறிமுகம் இல்லாத நபர்களிடம் பேசக்கூடாது. தகவல்களைப் பரிமாறக்கூடாது.
கடந்த 6 மாத காலத்தில் பெண்கள் மற்றும் குழந்தைகளுக்கு எதிரான குற்றங்களில் ஈடுபட்ட 25 பேரை தனிப்படையினர் கைது செய்து குண்டர் தடுப்புச் சட்டத்தில் சிறையில் அடைத்துள்ளனர். காவலன் செயலி மூலம் இதுவரை 25க்கும் மேற்பட்ட குற்றவாளிகள் கைது செய்யப்பட்டுள்ளனர்.
மேலும், கடந்த 2012ஆம் ஆண்டு முதல் இதுவரை 1000 குற்றவாளிகள் போக்சோ சட்டப் பிரிவின் கீழ் கைது செய்யப்பட்டுள்ளனர்’ என்றார். அதில் பல வழக்குகளை விசாரித்து வருவதாகவும் தெரிவித்த அவர், சைபர் குற்றங்கள் குறித்த விழிப்புணர்வு நிகழ்ச்சிகளை பெண்கள் கல்லூரிகளில் தொடர்ச்சியாக நடத்தவும் திட்டமிட்டுள்ளதாகவும் தெரிவித்தார்.
இதையும் படிங்க: முகநூலில் சிறார்களின் ஆபாச படங்களைப் பகிர்ந்த அஸ்ஸாம் இளைஞர் கைது!
